هل السوري شجاع !!! [الأرشيـــــف]

صفحات : [1] 2 3 4

Elephant And Castle

25/02/2009, 19:43

بعد ما أحد الأصدقاء بأخوية ذكر انو الشعب السوري بيتميز بالشجاعة و الكرم والأخلاق العالية ..ذلك كان ردا علا ما كتبته انا بأن السوري ضعيف و مهزوز الشخصية ...فكرت اطرح هالشي كموضوع و اسمع أرائكم بموضوعية ...بس خلوني أول شي اذكر كم بقطة ...

الفساد منتشر بكل مؤسّسات الدولة بشكل مستحيل تشوفوا ببلد تاني ,,يعني بدون رشوة ما فيك تعمل شي ,,هادا بيتسمى أخلاق !!

مين فينا ما سعى ورا الواسطة مشان شي وظيفة او شي مسابقة بالجامعة او شي تاني ....هادا بيتسمى اخلاق !!

الجريمة بسوريا بمعدلات مرتفعة كل سنة بسبب زيادة الفقر و الجهل ,,و هادا الكلام مدعوم متقارير منظمات مختلفة ,,,كمان مرة تانية ,,هيك الأخلاق

السرقة من مؤسّسات الدولة صارت حلال بمفاهيمنا هالأيام حتى صارت الأم تدعي للولد (روح الله يوفقك بشي وظيفة تقدر تقص منها دهب !! ) ...اخلاق !!

هلأ منجي عالشجاعة !!

مين فينا بيقدر ينتقد سياسات النظام بالداخل او بالخارج !! هادي شجاعة !!

مين فينا بيقدر يثور عالظلم والواقع المتردى !!
كيف الجميع بيسكت وقت بتنجاب سيرة احد الشباب المعتقلين ظلما بالسجون خوفا من انو يوصل البل لدقنا !! ما شا الله عالشجاعة

كام سنة صرلها الجولان محتلة دون اي محاولة لتحريرها ,,,شاطرآين بس بالكلام !!

مين فينا بيقدر بيحكي مع واحد من الشباب الشبيحة وقت بشفط بسيارتو بالليل و بكون قصدو يسمع شي بنت بالحارة ...!! لسا شغلة الشبيحا ما موجودة غير بسوريا !!

وقت القاضي بيحكم ظلم و ما حدا عندو ا الشجاعة يقول ليش !!!!!

بالغربة بتشوف استغلال السوري للسوري بأبشع الطرق !! مثلا صاحب عمل بيستغل حاجة احد العمال السوريين بطريقة قريبة للأستعباد !! ..هادا الكرم السوري ! هههه

مختصر الكلام ,,السوري مهزوز و لئيم بطبعوا ..وقت بكون محكوم بتلاقي ذليل ,,وقت بكون حاكم بتلاقي ظالم !!

شباب صححولي اذا غلطان

ayhamm26

25/02/2009, 21:21

من الخطأ برأيي انك تحكم على السوري هيك من فراغ, يعني يا ترى كل عمرو الانسان السوري هيك؟؟

قديش برايك النظام قتل ناس ونفى ناس و حط ناس بالمعتقلات مشان يقدر يكسر نفسية الشعب؟؟

لحد الان انصار النظام والمدافعين عنو بيتفاخروا انو اللي صار بحماة ربى الشعب كلو وخلى الناس تبطل حتى تفكر بالحكي بالسياسة.

فمشان هيك اللي مر على الناس بسوريا صدقني مو قليل ابدا ولو مر على اي شعب بالعالم لكان صار في نفس الشي.

Marooshe

25/02/2009, 21:51

مني سورية ، وصعب ناقش بصفات شعب مو معاشرتو ..
بس في شغلة الكل بيقدر يشوفها وهيي الأسباب لي خلت الشعب السوري يحمل هي الصفات او بعض منها ..
السوريين عايشين بواقع معين لي بيفرض عليهن غصب عن الله يكونو هيك ..

عندك بدائل شي ؟؟
ازا الدولة فاسدة .. كيف رح يقدر الشعب يتعامل معها بنضافة ؟
ازا حدا تمرد ضد الحكومة وعاتبها ع أسرى الفكر والحرية والضمير .. رح تضمنلو انو يفيق تاني يوم بفرشتو ؟
ازا شخص استرجى يتمرد ع الرئاسة .. رح تقدر تأمنلو مستقبل عيلتو ؟

انت شايف الشعب السوري مخيّر ؟ عم يعمل هيك لانو الشغلة مزاج ؟
عم يغترب لانو عايش بالجنة؟
عم يمسح جوخ لانو عايش بديمقراطية؟
عم يسكت لانو عايش بحرية ؟

بس بتعرف ،
أنضف وأفضل عالم تعرفت عليهن كانو سوريين .. يا ترى هالصدفه بتناقض نظريتك شي ؟

Elephant And Castle

25/02/2009, 22:32

بدكن تعرفوا انو انا سوري ابا عن جد يعني مو شخص غريب حتى مثلا يجي اي سخص و يحاول يقنعني انو هالمظاهر المريضة مو موجودة بالمجتمع عنا ...انا طالب ببريطانية بس بعرف حالي انو مستحيل العالم هون تتعامل معي غير ك foreigner مشان هيك بحس بحسرة لأنو بعرف مهما العالم عاملتني هون ,,بتبقى احسن من معاملة اهل البلد !!
في امور غريبة بسوريا عنجد ,,خلينا نفكر فيها شوي ...شباب ما بتلاحظوا انو عنا شي طبيعيي الواحد يتمسخر على اصل واحد تاني ,,او دينو او الحارة الساكن فيها او على لبسو او هندامو ..او على طريقة كلاموا او على شكلوا او حالتو المادية او احيانا على اعاقتو الجسدية او العقلية !!! كل هالشي شفتو بعيوني لما كنت عايش بسوريا ,,

اكيد الطيبيين كتار ,,والمثقفيين عنجد لسا اكتر ...بس لأسف وقت بكون الجهل هو الأغلبية فهالعالم بضييع بين هالحثالة!!

مجتمع ملئ بلأمراض بغض النظر عن السبب

حنين.

25/02/2009, 22:55

مساء الخير بالنسبة لمسالة الرشوة والواسطة والسرقة وباقي الافات مو بس بسوريا
نحن كمان منتشرة عندنا بشكل رهيب ونحنا كمان بنشوف انو الفساد مستحيل يكون منتشر فاي مكان بالكرة الارضية اكتر مما هو منتشر عندنا
مستحيل تصير سرقة بالعالم بحجم سرقة عبد المؤمن خليفة اذا سمعتو عنها بتقدرو تفهمو قصدي
نجي على مسالة الشجاعة
بالنسبة للسورين السياسة والدولة مصدر الخوف والرعب
عندنال الرئيس بحد ذاتوا بشفق عليه كيف كل مين طلع على بالوا يشتم قد مابدوا وصلت لحد يعيرو مغني انطرد من تونس ولساتو عايش عادي ويعمل حفلات عادي
بس ماعاد حدايسال على حدا بالطريق
يشوف الظلم السرقة التحرش وما يقدر ينطق كلمة وهذا من نتائح الارهاب اللي تعرضنالوا طيلة العشرية السوداء
باكدلك او حتى في ناس يتنازلوا عن حقهم مو للدولة لا لاي صايع بالشارع خوف انو يكون ارهابي
حتى طبيعة الحياة اتغيرت صارت المحلات بالعاصمة تقفل بعد المغرب بعد ما كانت ما تقفل اساسا
طولت المختصر المفيد
ظروف الحياة بتفرض على المجتمع صفات وطبائع بس ابدا ما يجوز التعميم ولا التخيل ان هذه طبائع جبل عليها اهل البد

Ultimat_Ya

26/02/2009, 07:14

بالغربة بتشوف استغلال السوري للسوري بأبشع الطرق !! مثلا صاحب عمل بيستغل حاجة احد العمال السوريين بطريقة قريبة للأستعباد !! ..هادا الكرم السوري ! هههه

مختصر الكلام ,,السوري مهزوز و لئيم بطبعوا ..وقت بكون محكوم بتلاقي ذليل ,,وقت بكون حاكم بتلاقي ظالم !!

شباب صححولي اذا غلطان[/quote]

بالخارج مو كل الناس متل ما عبتقول
هوا فيه مو أنو ما في
بس هي برأيي انا مو طبع لئيم هي انا بسميها " عقدة نقص "
لأنو السوري بكون بالداخل ما عندو كراامة فبطلع لبرة بدو يساوي بالناس متل ما ساوو فيه .
وبعتقد هي كل القصة
بس ابداً لاتفكر انو هي شجاعة
والله جبن وقمة الجبن كمان

whiterose

26/02/2009, 07:29

whiterose

26/02/2009, 07:32

بالغربة بتشوف استغلال السوري للسوري بأبشع الطرق !! مثلا صاحب عمل بيستغل حاجة احد العمال السوريين بطريقة قريبة للأستعباد !! ..هادا الكرم السوري ! هههه

اهل الخليج مابيستغلو العماله الاجنبية عندهم وخاصة الهنود والباكستانيين وبيعاملوهم معاملة مزرية
وبيعطوهون رواتب بتبكي لانو بيعرفو فرق العمله عندهم كبير يعني 200 دولار بغص الهندي من الفرحة عليهم بالوقت يلي عندون ياها من طرف طرف الجيبة هي مو استغلال

العرب عطيهم مال واتفرج عالاستغلال

whiterose

26/02/2009, 07:37

Elephant And Castle

26/02/2009, 07:37

شو هالحكي هاد

لغة التعميم لغة فاشلة الاشياء اللي ذكرتها موجودة بنصف دول الوطن العربي وخاصة الرشوة
وعلى مستوى عالي

انا بشوف الشب السوري بالفعل اخلاقة عاليه
واكتر من اي شب تاني بالوطن العربي
اكيد في حالات شاذة بسوريا وبراتها
بس هاد مابيمنع انو الشعب السوري اخلاقي
بعدين شو مشانك جايه بحضنا وعم تنتف دقنا
عفوا ..فيني أعرف شو بتقصدي جاية بحضنا و بتنتف بدقنا !!

ثانيا يا عيوني بعرف انو نصف هالظوهر و اكتر موجود بكل الدول العربية ,,,,بس انا بهمني بلدي سوريا ...يعني قالو للحرامي ليش سرقت راح قلن شوفو جاري عابيقتل !! ما عذر ابدا انو نقول شوف الدول العربية التانية ,,,يروحو كلن عالجحيم ,,,,رجاء يلي بدو يناقش يحصر الموضوع بسوريا ,,,

Elephant And Castle

26/02/2009, 07:40

يعني ماشاء الله عليك مثئف وفهمان وعم تدرس ببريطانيا
وجاية تتهم 18 مليون نسمة بالمرض واللئم والرشوة والمابعرف شو

18 مليون؟؟!!!
يعني مع عدم المؤاخزة هيك بتكون شملت عيلتك الأهل وأهل الأهل انو يعني معقولي انت
و بضيف عليهم قلة الكرامة والأخلاق

whiterose

26/02/2009, 07:41

مين فينا بيقدر بيحكي مع واحد من الشباب الشبيحة وقت بشفط بسيارتو بالليل و بكون قصدو يسمع شي بنت بالحارة ...!! لسا شغلة الشبيحا ما موجودة غير بسوريا

كلامك مو صحيح
هالشي ماعاد موجود وفعلا اتغير
بس التغيير انو انسمح لغير ابن المسؤول يشفط:o
معك x5 خمسا وشوف شو بصير

Elephant And Castle

26/02/2009, 07:42

و بضيف عليهم قلة الكرامة والأخلاق
انا قلت اغلبية الشعب يعني اكتر من النصف ...ما قلت 18 مليون

whiterose

26/02/2009, 07:43

و بضيف عليهم قلة الكرامة والأخلاق

لو كانو اهلك؟؟؟ وانت متاكد من نزاهتون

يعني حكمت على ال18 مليون نسمة هواء

Elephant And Castle

26/02/2009, 07:46

لو كانو اهلك؟؟؟ وانت متاكد من نزاهتون

يعني حكمت على ال18 مليون نسمة هواء
عيوني شو مشكلتك مع اهلي ,,,بعرف انو اهلي سوريين ,,,و هال كلام بيشملون كلون كسوريين ,,,,

whiterose

26/02/2009, 07:46

انا قلت اغلبية الشعب يعني اكتر من النصف ...ما قلت 18 مليون

واكيد اهلك من هالقله؟؟؟

مابصير يلي عم تحكي مو زابط
اوكي معك انا في ناس مو شريفة ولا نزيها ولا سارية
بس تحكم على 9 ملايين لا هيك كتير يعني حدا متصرف بحقك غلط وهو سوري؟
حتى عم تجيب هالحكي
ولا لبناني معك الجنسية:p

Elephant And Castle

26/02/2009, 07:51

واكيد اهلك من هالقله؟؟؟

مابصير يلي عم تحكي مو زابط
اوكي معك انا في ناس مو شريفة ولا نزيها ولا سارية
بس تحكم على 9 ملايين لا هيك كتير يعني حدا متصرف بحقك غلط وهو سوري؟
حتى عم تجيب هالحكي
ولا لبناني معك الجنسية:p
دخيل عينك هالموشح ملينا منو ,,انو كل ما واحد بينتقد شي بهالبلد لازم يكون يا لبناني او امريكي او اسرائيلي ...طبعا بفهم هالشي ,,لأنو الشعب السوري صرلوا ساكت اكتر من قرن ,,,

Elephant And Castle

26/02/2009, 07:53

دخيل عينك هالموشح ملينا منو ,,انو كل ما واحد بينتقد شي بهالبلد لازم يكون يا لبناني او امريكي او اسرائيلي ...طبعا بفهم هالشي ,,لأنو الشعب السوري صرلوا ساكت اكتر من قرن ,,,
لكن بلد عشرين مليون ما فيها غير تلات جرايد ناطقة باسم الحزب ,,,,و لسا بتقولي شعب مو جاهل !! ..

whiterose

26/02/2009, 07:55

كنت صدقتك لو طريقة طرحك للموضوع كانت اعلى مستوى شوي
او بطريقة جديرة بالوقوف عندها ومناقشة هالشي من نافذة واحدة جنسيتها سورية

whiterose

26/02/2009, 07:58

لكن بلد عشرين مليون ما فيها غير تلات جرايد ناطقة باسم الحزب ,,,,و لسا بتقولي شعب مو جاهل !! ..

هاد اكبر دليل انك ما سوري

صار في بالبلد اكتر من 5 جرايد خاصة وغير ناطقة باسم الحزب
يالطيف هالحزب شو أهركم

ابرزهم
بلدنا
ابيض اسود
الوطن

Elephant And Castle

26/02/2009, 08:02

لك يا ضيعان يلي عابتقضي حياتا كلها بالسجن مشان تدافع عن حقوق السوريين .,...وبلأخير بيجي كتير من السوريين (الشجعان) ي بيتهموا لهالشخص انو عميل ......يا عزيزتي سوريا صارت مقبرة ..حلم الشب ياخد visa....ولا شو ..ما معك تدفعي مشان visa ...أسف اذا تكلمت هيك ,,بس هيك طريقتك بالنقاش

Elephant And Castle

26/02/2009, 08:03

من انو فرع مخابرات عابتحكي ,,و كام عابتقبضي بالشهر ??

Elephant And Castle

26/02/2009, 08:05

من انو فرع مخابرات عابتحكي ,,و كام عابتقبضي بالشهر ??
هلئ هيك عابأحكي بطريقتك ,,شفتي قديش هالطريقة تافهة

Elephant And Castle

26/02/2009, 08:15

هههههههه ...يا حرام هالحزب أديش أهركم !!! ههه
صح هالحزب أهرنا ,,,لأنو قتل و شرد و هجر مئات الألاف ,,,,روحي الله يقويكي و تشمتي فينا علا طول بهالطريقة يا سوريّة يا أصيلة

loui

26/02/2009, 08:56

تحياتي لكاتب الموضوع
ولك آخ شو بدي قول لقول ..قلبي مليااان ورح يطق ... انا مغترب يا جماعة وعايش بالسعودية والله والله ما شفت الضيم والظلم متل ما شفتو على يد "شقيقي في الارض" ابدع السوري بطق البراغي وبولدنة الحرام ومحاولة اكل لقمة الخبز من تمك متل الصراصير ولك قدامو كل انواع الاكل ومعبا الخير بالدنيا ما بتضييق عينوو الا على كسرة الخبز اللي بتمي ..ولك حرقان القلب انو وحياتكون "كسرة خبز" الله وكيلكون اللي حاربوني سوريين مع انو الشركة فيها كل الجنسيات وعدد موظفينها بالالاف ومع هيك كل سوري وسوري ولك أخ بس لا تقلولي ما عمم لا بدي عمم وعمم كمان لان مو معقول شركتي عم تنقي الأندال بس ... لا ما خلصت ارجوكون لان قلبي مليان من ها القصة ولك فوق الغربة عصة قبر
اسمعوني منيح انا وصلت لمرحلة صرت متاكد انو نحنا حلنا الوحيد قنبلة نووية تمحينا ونرجع نبذر من جديد ..
المصاروة مثال صغير بتلاقي الواحد مننون بيطقطق براغي على ابو موزة وسهيان وسلال بس بيجي عا المصري وبيضرب فرام ..عنا مدير قسم مصري اول ما اجا من سنتين كان لحالو مع موظف سوري هلق هوي وعندو ست موظفين مصريين جابهون من مصر بروات "خيالية" وكان هدفوا الاول انو يجيبهون برواتب عالية ليرفع من سقف رواتب المصريين بالشركة "وهادا اللي صار" لا هادا مو استثناء كمان عنا مدير احدى الشركات "مصري" استلم وهي سنة ونص كان طاقم الشركة كللو مصاروة "وشوي هنود " وحاليا هي الشركة اعلى شركة بين سلسلة الشركات بسلم الرواتب , طيب بالمقابل عنا شركة فيها المدير "سوري عزيز " صاحب الشركة عم يقللوا انزل عا سورية جيب موظفين برواتب سقفها الادنى 4 نقط اقسملكون بالله يا جماعة نزل وكل مرة يروح يلم شباب مسكين من سورية ويجيبهون ب 2 او 3 نقط ويرجع لعند صاحب الشركة سعيد يقلله "شايف كيف انا جبتلك باقل من كنت متوقع " اللي بيحرق القلب انو كللون خريجين جامعات ومثقفين وما بيفرقوا شي عن الاخرين الا اننون تحت ادارة ها الابن الحرام ... يووه وغيروا وغيروا والله على قد ما المدراء السوريين عنا عملوا "خروج نهائي" للموظفين السوريين اقسملكون بالله يا ناس انو صاحب الشركة "سعودي" طالع قرار ملزم يمنع منعا باتا "الخروج النهائي" بدون سرقة او ما شابه ...يعني تخيلوا ..وقيسوا على هيك ..
انا بعرف اني طولت بس اللي عم يدافع عننا بقللوا نحنا ما منستاهل احسن من اللي نحنا فيه لانو ما منحب الخير لبعض ولك حتى لحالنا ما منحب الخير يعني مستعدين ناذي حالنا مقابل ينأذى جارنا ... وانا اولكون
لئيمين وحقودين وعيننا ضيقة بشكل ما بيتصوروا عقل .. منغار من النجاح وبدل ما نعمل لنوصل متلوا منعمل لنحرق اهله للنجاح .. متل ما قلتلكون يعني اذا شفت جاري سعيد مستعد احرق بيتي مشان يحترق بيتوو ....هادا السوري
انا سوري اه يا نيالي

loui

26/02/2009, 09:00

Elephant And Castle

26/02/2009, 09:11

شكرا صديقي لؤي عالمشاركة ,,عابقلك والله العظيم ما عابأحكي هيك غير من قهري ...يا رجل شفت هون ارباب عمل ببريطانية سوريين و بيستغلوا الأوضاع الصعبة لبعض السوريين يلي عندوا مشاكل بأوراق الأقامة او عندوا مشكلة بأوراق العسكرية بسوريا فبيصيير ارباب العمل السوريين يعاملوا (اخوتهم) السوريين بطريقة ابس ما يقال عنها انها استعباد !! مستغليين اوضاعهم الصعبة ,,,لك يا رجل بيعطوهم ربع ما بيعطي صاحب العمل البريطاني !!

Elephant And Castle

26/02/2009, 09:18

اسف عا الاطالة بس كلمة اخيرة مهمة كتير
انا الحمد لله نجحت وعبرت "ونسيت" وهادا الكلام اللي كتبتو مو كلام انسان فشل وبدو يحط الحق عا الاخرين "تبريرنا الدائم" هادا الكلام اللي قلتو ما هو الا الحقيقة المرة .... انا تخلصت من كل مشاكل الماضي واستتب الامن بحياتي بعد ما "طلبت نقلي" لقسم خال من السورين ومن وقتها وانا عايش مرتااح البال وآتي الى عملي مبتسم "مع العلم اني هيهه والله العظيم اتحاشى الابتسام امام الزملا السوريين في اقسام اخرى خوفاً من انو يحقدوا علي ويلاحقوني من هنيك "

لك ابتسم و اضحك و ما تاكل هم هل مجموعة الفاشلة ,,المهم انك زبطت امورك ا هادا الشي الاساسي ....صح في ناس بتفكر انو نحنا عامنحط فشلنا عا غيرنا ,,,لا ..عامنحكي من قهرنا عا بلدنا كيف صارت مسخرة من جميع النواحي ...
انا هون بحاول اتحاشي شي اسمو سوري ...عابأدرس بجامعة و عابأشتغل بمخبر الجامعة ,,و هيك مريح راسي من السوريين و مشاكلون

شامي للنخاع

26/02/2009, 11:21

الموضوع كبير..........عامل حرئة بي صمصوم الئلب......غريب ادي نحن سوريون شو عم نعمل بي بعض.......انا وبعدي الطوفان.......ان كان جوا البلد........ولا براتها........يعني شباب ما ئصرو بنوب حكو كتير نئط مزبوطة........يعني سوري مستعد يبيع الي خلفو كرمال يصل..........يمكن تربايتنا داخل المدارس.......وبل البيت.......والشارع.....يوم بيربي الاب ابنو........انو انت وبس......ثقافة الانانية رضعناها من الصغر..........ولسه ولسه.........طبعا مو الكل ولو خليت خربت
تحياتي لصاحب الموضوع

loui

26/02/2009, 12:42

معليشي اسمحولي بمداخلة تانية ...
من الامور المخزية اني أحيانا ولما بقعد بفكر انو لازم انفض توب العبودية وقدم صك "الاستقالة" مقابل حريتي وانو صار بمقدوري اني روح وافتحلي اي محل بسيط ببلدي باي مجال المهم انو كون ملك نفسي وانو وقتي ملكي وحياتي وتعبي الي انا وما كون خادم "مع اختلاف الصور" عند أي حدا ..بفكر ملياً وبراجع صور الماضي وحتى صور بلدي وحارتي وزقاقي ..بفكر اديه رح تضيق عينو لجاري بالمحل على محلي واديه بدو يعمل كل جهده ويخبر البلديات ويخبر عني ويرشللي مي عا باب المحل و و و وكيف اني اذا نجحت رح يحاربوني صحاب الكار "بغض النظر شو هوي" ليدمرولي شغلي على اعتبار اني جبت افكار جديدة وهوين عايشين بموضة "العفنيات" .. وكيف بدي عيش الدمار النفسي وضل حارب للقمة العيش ....حارب للقمة العيش كم هي مقرفة هذه الصورة ... التي اقنعونا بها ...لقمتك يجب ان تكون مغمسة بالدم .... اي لقمة ستساغ وهي مغمسة بالدم !!! ابدا يمكننا ان نعيش متجاورين لك عملك ولي عملي انت تكسب اكثر مني بل اضعاف اضعافي ..لكنني مرتاح البال لدي عملي الخاص ولا ابالي ..سعيد بما لدي ..ولكن ..كيف اكون سعيد وانا سوري ...كيف اكون سعيد وانت تكسب اكثر مني ...لن افكر بان اعمل اكثر او اطور طريقة عملي اكثر او ان اهتم بديكورات المحل او بتنسيق البضاعة او حتى افكار خلاقة للتسويق والانتاج ...لا هذا ولا ذاك ..هناك طريقة اسهل بكثير ...تدميرك وتدمير عملك ....
لهيك يا حبايبي بتمشوا بشوارع الشام سنة ورا سنة ورا سنة ..نفس الفترينات العتيقة نفس المحلات ذات الطابع البالي وكاننا ليس لدينا ذوق ... نفس الاوجه الحالكة وكان الابتسامة بفلوس ... نفس البهدلة اذا بدك ترجع غرض اشتريتو وما اجا مقاسك ... نفس الاستهتار بالمستهلك لانو ما في وقت لتفكر بالناس لان الناس بنظرك مالها اي راي ولا ولا اهمية لانها مجبرة غصب عن عين اهلها تاخد بضاعتك القبيحة والقديمة والمستهلكة ليش..... لانك دمرتو .....لجارك اللي كان عم يجيب افكار جديدة ....وهيك يا سوري عشت قرير العين مرتاح البال
مو هيييك عمييييي.....

رجل من ورق

26/02/2009, 14:28

اسمع تحزن جرب تفرح

ابو نجبو

26/02/2009, 18:32

الشباب اللي حكت .. كلامها صحيح و المواقف و القصص مابتخلص..
بس كمان في جوانب مضيئة و مشرقة ...مثلاً محل مالي موجود هلاء السوريين ايد وحدة..واللي بيتورط أو بيعلق شي مشكلة ...الكل بيركضو للمساعدة...الشهادة لله
وعلى فكرة ..مجال المنافسة والحساسيات كتير موجودة ...بس وقت الجد بتلاقينا أيد وحدة..

Elephant And Castle

26/02/2009, 20:53

شكرا شباب عالردود ,,حبب ضيف نقطة يمكن بتفسر لحد ما سبب غياب شي اسمو الروح الأاجتماعية يلي ادى انو نشوف هالظواهر المريضة ..
انا برأيي انو الغياب الكامل للنشاطات الشبابية الأجتماعية والثقافية والسياسية بخلي الشباب مشلوح بهالشوارع متل ما مبشوف ,,,سبب غياب النشاطات هو الأحتكار الجاهل لكامل النشاطات المزكورة سابقا من قبل حزب الجهل العربي الأشتراكي ....

كمان ما لازم نحط كل امراضنا برقبة الحزب الواحد ...الأهل والتربية الخطأ كمان بتلعب دور اكبر ....

البعض بقول ما رح وجع راسي بهالمواضوع لأ نو انا ما بهتم بالسياسة ...يا عمي هالوضع المريض بالبلد ,,كان الو الأثر السلبي عالتربية والتعليم والدين والثقافة والأقتصاد ....كل شي تراجع ..بزمان الرشوة والواسطة والشبيحة والفساد والأضطهاد و الخوف والسكوت ...لك يارجل كان في من خمسين سنة ادب المهجر و ادب السجون ,,مع انو هلئ ازدادو المهاجرين او يلي بالسجن ,,ما عاد نسمع لا عن ادب مهجر ولا ادب سجون ,,لك ولا عن اي نوع ادب تاني بالبلد ....

..AHMAD

27/02/2009, 05:24

بلدنا
ابيض اسود
الوطن

عفواً بس ..
جريدة بلدنا معروف مالكها مجد سليمان ، ابن اللواء بهجت سليمان ، المعروف تماماً من أهم ألوية النظام السوري الأسدي.
بشو بلدنا أحسن من تشرين أو الثورة أو البعث ؟
رح افصلك الصفحات وحدة وحدة على اعتبار انا فيها

الصفحة الأولى معروفة Cover .
الصفحة 2 + 3 = استقبل الرئيس و ودع الرئيس واستقبل الوزير وودع الوزير .. واستقبل امين الحزب فرع 1 أو 2 أو 99 ما بتفرق .. وودع والي نازلة تحت مسمى محليات
4 + 5 + 6 + 7 = معنية بالتحقيقات ... من نوع ..
دكتورة في الجامعة تمت سرقة موبايلها من قبل طالب ولم يتم القبض على الطالب
تحقيق عن الزواج المبكر واسبابو
تحقيق عن الزواج المتأخر واسبابو
تحقيق عن العنوسة واسبابها
تحقيق عن الفجل ليش اغلى من البقدونس
وتحقيق عن غطا هالريغار ليش لساتو مفتح
8 + 9 + 10 + 11 = معنيين بالتغطيات ... اي الاخبار الي بتخص مثلاً اتحاد الفلاحين واتحاد العمال وباقي هالشبيحة
12 + 13 = صفحات شبابيك أي معنية بتصوير احداث اجتماعية متل معرض او حفل عشاء او عشاء عمل او شي قصة
14 = صفحة اعلانات للمطاعم
15 = Cover الاقتصاد فيه عناوين للي داخل صفحات الاقتصاد
16 + 17 + 18 = اقتصاد محلي
وللتنويه نص صفحة عامودية من الـ 16 محجوزة لأسعار العملات
ونص صفحة أفقية من الـ 17 فيها اسعار الدهب والمدري شو كمان
الاخبار المتوزعة بالصفحات 16 + 17 + 18 معنيين باخبار الاقتصاد المحلي .. لكن انو اخبار ؟
شو بيهمو المواطن لما بينزل خبر عن وزير الاقتصاد عامل محاضرة ؟ او معاون وزير الاقتصاد عمل جولة بالاسواق ؟ او وزير المالية عقد مؤتمر ؟
الصفحة 19 + 20 = اقتصاد عالمي
21 + 22 + 23 + 24 + 25 + 26 + 27 + 28 + 29 + 30 + 31 = معنيين بالثقافة ( مسرح - معارض - موسيقى .. الخ... )
32 صفحة اسمها احلى صورة
33 تكنولوجيا
34 + 35 + 36 + 37 + 38 + 39 + 40 رياضة موزعة بين محلي وعالمي
41 صفحة خدمات ( فيها ارقام الطوارئ وحركة المطار والصيدليات المناوبة )
42 + 43 مبوب
44 وفيات
45 طقس
46 تسلية
47 + 48 مرتبطين مع الثقافة والفن

طيب .. ازا منشيل الصفحات الثقافية ع جنب .. لانو بفتخر بهيك جريدة انها عاملة هالحيز الضخم بالجريدة للاهتمامات الثقافية ( شي نص الجريدة صفحات ثقافية ) منرجع للمحليات والاقتصاد هدول اهم شي ... شو جابو شي جديد عن تشرين والثورة ؟ ازا كلهن استقبل وودع وقام ونام وفز ونط وحط ومدري شو .. شو جابو شي جديد عن جرائدنا المسيّسة ؟
وين الفساد بالموضوع ؟ وين شي اسمو وسيلة إعلامية لتوعية المجتمع؟
وين اللي اسمو نزاهة بنقل الأخبار ؟ وين الأخبار السياسية ؟
بصراحة عندي أمل بجريدة الثورة أكتر من بلدنا .. كونا لا تشبه إلا جريدة البعث لا أكثر ولا أقل
بقعة ضوء لا زالت جديدة عالساحة وما عندها هالانطلاقة العظيمة.. وحتى ان كان ببالها شي تساويه مستقبلاً فـ هاد عالمدى البعيد .. ولا هلئ ولا بعد شهر ولا سنة ولا سنتين حتى.
مجد سليمان لما خطط ليعمل الجريدة شي نزيه .. عند أول محاولة تسكرت الجريدة بالشهر السابع من الـ 2006 علما أنو المجموعة المتحدة عمرها 10 سنين !!!! وعلماً انو ابوه ايدو واصلة ! وعلماً وعلماً وعلماً ... الخ ازا هيك مؤسسة اعلامية عاساس صار فيها هيك بعد عشر سنين
طيب جريدة عادية جداً متل بقعة ضوء شو بدي اتامل منها ؟
الوطن .. اي مزبوط الوحيدة الي بتنشر بقليل من الحيادية ... بشهدلها بهالشي .. لكن ما بضمنلها الاستمرارية ... شيلك عن قلة التنوع فيها.

منجي للموضوع الاساسي وعذرا عالشطّ الي شطّينا فيه

بعد ما أحد الأصدقاء بأخوية ذكر انو الشعب السوري بيتميز بالشجاعة و الكرم والأخلاق العالية ..ذلك كان ردا علا ما كتبته انا بأن السوري ضعيف و مهزوز الشخصية ...فكرت اطرح هالشي كموضوع و اسمع أرائكم بموضوعية ...بس خلوني أول شي اذكر كم بقطة ...

معك انا ممكن يكون الشعب السوري مهزوز الشخصية نوعاً ما .. مع انو ما حبيت هالمصطلح بس ما لقيت شي بديل ..
لكن شعب خلال قرن من الزمن مر عليه عشرات الانقلابات بعد فترة من الاحتلال حوالي ال 5 قرون ... شو بدك تتأمل منو ؟
ازا طلع من نكسة الاحتلال فات بنكسة الانقلابات .. طلع من نكسة الانقلابات فات بنكسة الاحتلال مرة تانية ما لحق يطلع منها اجتو نكسة دكتاتورية مفعمة بالحيوية .. شو بدك تتوقع منو ؟
شعب مل وقرف من كل هالقصص ، بدك تتوقع منو يضل ضهرو قوي ومشدود متل ما كان بالأول ؟
شعب كل يوم كان عايش بجو وتحت قيادة شكل وبأوامر تناقض بعضها البعض وقوانين الله ما بيفهمها ودستور.. لسا دستور غوار الطوشة بمسرحية غربة واقعي ومنطقي أكتر منه. لسا بدك يضل هالشعب واقف ع رجليه متل الأول ؟

ما بظن هالشي .. وما منقدر نلومو ... بالعكس يمكن منسجلها نقطة لصالح الشعب السوري انو لساتو قادر على العيش والتأقلم على الرغم من كل هالظروف عندو القدرة على مواصلة الحياة .. هاد شي عظيم جداً ..

الفساد منتشر بكل مؤسّسات الدولة بشكل مستحيل تشوفوا ببلد تاني ,,يعني بدون رشوة ما فيك تعمل شي ,,هادا بيتسمى أخلاق !!

الأخلاق وقفت عالرشوة ؟

طيب ... اذكرلي مصدر واحد غير القرآن .. او جبلي شي مصدر قبل نزول القرآن كان يحكي انو الرشوة عادة غير صحية بالمجتمع وتؤدي الى فساد الأخلاق
لك عمي بأي دولة في رشوة
لك السويد فيها رشوة
روسيا
امريكا
هدول قديش عظماء هالدول ؟ فيهن رشوة

ازا بدك تقيم شعب كامل ودولة كاملة على الرشوة

اي طز بهالبشرية كلها ، بشرية فاسدة مافيها ذرة اخلاق

مين فينا ما سعى ورا الواسطة مشان شي وظيفة او شي مسابقة بالجامعة او شي تاني ....هادا بيتسمى اخلاق !!

لك أيه !!!
ازا واحد مالو غير هالطريقة ليشتغل ؟ شو بقعد ببيتي مثلاً على حساب هالأخلاق
يحرئ اخت هالأخلاق اللي بدها تخليني عيش متل الكلب عماتشحود شحادة من الرايح ومن الجاي
طيب .. مو عاجبتك قصة الوسايط والرشاوي .. عطيني حل بديل ؟

الجريمة بسوريا بمعدلات مرتفعة كل سنة بسبب زيادة الفقر و الجهل ,,و هادا الكلام مدعوم متقارير منظمات مختلفة ,,,كمان مرة تانية ,,هيك الأخلاق

هون اللوم عـ الدولة والحكومة والنظام ... بتحكيلها الها بلا اخلاق .. مو بتوجه هالحكي للشعب
شو دخل هالشعب ازا افترضنا متل ما بدك انو كلو ازا مو كلو الغالبية منهن جاهلين ...
شو دخل هالشعب ازا دولتو بنت حرام ؟ ازا دولتو بدها ياه يضل حمار ازا الدولة عدوها الأول المثقفين شو دخل هالمواطن هاد ؟

السرقة من مؤسّسات الدولة صارت حلال بمفاهيمنا هالأيام حتى صارت الأم تدعي للولد (روح الله يوفقك بشي وظيفة تقدر تقص منها دهب !! ) ...اخلاق !!

يا لطيف ... :lol:

هلأ منجي عالشجاعة !!

مين فينا بيقدر ينتقد سياسات النظام بالداخل او بالخارج !! هادي شجاعة !!

مين فينا بيقدر يثور عالظلم والواقع المتردى !!

مانك مضطر تحكي وتنتقد .... وتعلي صوتك ... وانت عرفان شو مصيرك
بس فتح عيونك .. تطلع منيح .. وتلفت حواليك ...
سجن صيدنايا لحاله .. وال 6000 سجين .. وشوف السجون السياسية الباقية ببلدك ..
ومتل ما انت عمتجهّل معظم الشعب ... انا بدي عمم ع معظم هالمساجين بهيك سجون انهن من شرفاء السجون ...
تطلع عهالمساجين .. بتعرف انو في مين حكا قبلك .. وفي مين من قبلهن كمان .. وفي مين رح يجي بعدهن ..

كيف الجميع بيسكت وقت بتنجاب سيرة احد الشباب المعتقلين ظلما بالسجون خوفا من انو يوصل البل لدقنا !! ما شا الله عالشجاعة

وين شفت انو في مين سكت ؟
من تاريخ 2005 وهو التاريخ الي تم اعتقال أو أخ عنا هون بأخوية .. ولحد هلق .. فيك تراجع مواضيع اخوية من هداك التاريخ وللآن ... بتشوف انو ما حدا سكت .. وما حدا كن .. وما حدا خايف ع حالو ...
لانو برا سجن و جوا سجن .. مانها فارقة كتير .. لا معي ولا مع غيري من الي بدهن يحكو

كام سنة صرلها الجولان محتلة دون اي محاولة لتحريرها ,,,شاطرآين بس بالكلام !!

كمان هاد السؤال بيتوجه لنظام العتيد .. مو للشعب الدولة المسؤولة عن حماية البلد .. قبل الشعب الدولة مسؤولة عن التحرير .. قبل الشعب الدولة المفروض تكون هية من قلب الشعب لتساوي الشي الصح الي بدو ياه .. مو لتكون دايماً باعصتو ... وانو اي اخدو الجولان .. وخدو هالخازوق يا شعب ما رح نتحرك شو طالع بايد الشعب لك خيي ؟ واحد لسا ما بيلحق يفتح تمو .. عمينضب .. الباقي مو خوف من هالشي عميسكتو .. لكن عميسكتو لانو بيعرفو مافي امل بالوقت الحالي

مين فينا بيقدر بيحكي مع واحد من الشباب الشبيحة وقت بشفط بسيارتو بالليل و بكون قصدو يسمع شي بنت بالحارة ...!! لسا شغلة الشبيحا ما موجودة غير بسوريا !!

شو المطلوب هلئ يعني ..
انو هاي العقلية التشي جيفارية تبعك ما بتمشي هون بالبلد بالمرة
عقليتك الثورية هون بدك تشيلها ع جنب .. وتحاول تصلح حالك .. قبل ما تصلح هالنسبة من الشعب

وقت القاضي بيحكم ظلم و ما حدا عندو ا الشجاعة يقول ليش !!!!!

ازا القاضي معو حصانة كاملة... واضرب شرطي حقو فرنكين بيلعن ربك بنص بيتك ما بتقدر تساويلو شي لانو هالشرطي معلمو شي عميد باعتو وهالعميد باضرب الاحوال بمحكمة عسكرية بكون القاضي ابن عمو او رفيقو او او او الخ ..
شو بدو يساوي المواطن بهالحالة
اي اجباري بدو يلتعن ربو ويسكت ... شو رح تفيدو شجاعتو هون غير انو تكون مدة حكمو سنة تصير خمسة والخمسة عشرة والعشرة مؤبد؟؟

بالغربة بتشوف استغلال السوري للسوري بأبشع الطرق !! مثلا صاحب عمل بيستغل حاجة احد العمال السوريين بطريقة قريبة للأستعباد !! ..هادا الكرم السوري ! هههه

ما عشت بالغربة ولا بدي عيش .. لاقدر احكم بهالنقطة

مختصر الكلام ,,السوري مهزوز و لئيم بطبعوا ..وقت بكون محكوم بتلاقي ذليل ,,وقت بكون حاكم بتلاقي ظالم !!

شباب صححولي اذا غلطان

اي غلطان .. وغلطان كتير ..
قبل ما تصحح كل هالشي بشعبك ...
وبتمنى ما تاخدها بنبرة سلبية
بتمنى منك تصحح حالك وتصحح نظرتك للمواطن السوري
بتمنى منك تتأكد انو هالموضوعية الي عمتحكي فيها انت ... هية تجريح لكل مواطن سوري
وبتمنى تفهم انو هالمواطن السوري هوي بشر وبني ادم .. وبيحس بالوجع ..
وما حدا حاسس بالوجع قدو ..

سلامات .. بس الي رجعة ع كم رد تانيات

Elephant And Castle

27/02/2009, 05:52

وجهة نظرك صديقي احمد بحترمها جدا ..يعني ما فيني رد عاكلامك ,,ببساطة لأنو موزون ...
بس فهمت من كلامك انو الكل بيتحمل المسؤلية من نظام الحكم للأحتلال للظروف الصعبة يلي مرينا فيها ..للتاريخ والجغرافية ..!!.....بس الشعب ما إلو علاقة !! ...في شعوب كتير مرت بشي اكتر من يلي مرينا في نحنا و مشي حالون بعدين ,,خود مثلا دول شرق اوروبا يلي عاشت سنيين تحت الحكم الشيوعي ....

...صديقي احمد ما تعتبر كلامي تهجم ابدا ...بس هاي طبيعتي ..ما بحب تبويس الشوارب ,,,,فينك تنتقضني قد ما بدك انا رح اقبل بروح رياضية

Elephant And Castle

27/02/2009, 06:53

jankasanova

27/02/2009, 07:47

لك خيو والله دوختني معك بهالموضوع و ما بقا اقدر الحقك..
عنوان الموضوع هو عن شجاعة السوري.. بلشت بالشجاعة و الاخلاق و الكرم اللي يحكو فيها عن الشعب السوري
انتقلت للفساد و الرشاوي و وصلت للواسطة.
بعدين انتقلت و حكيت عن معدلات الجريمة بسوريا و السرقة من مؤسسات الدولة.
وانتقاد سياسات النظام و الثورة و الجولان و تحرير الجولان..
و وصلنا للشبيحة و التشفيط. و القاضي اللي يحكم بالظلم..
الغربة و استغلال السوري للسوري ...
و انو الواحد بيتمسخر على التاني و على اصلو و حالتو المادية..
و عممت هالمواصفات كلها على اكتر من نصف الشعب السوري..
يعني اكتر من 9 مليون سوري بنظرك هني حرامية و جاهلين و ضعفاء و مجرمين حتى السوريين المغتربين ما سلمو منك كمان..حرام عليك هالتعميم كلو..يعني اللي بيسمعك بيقول انت عامل احصائية لصفات الشعب السوري في سوريا و خارج سوريا..
يعني اذا بدك تنقد اي مجتمع بدك تاخذ بعين الاعتبار كل الظروف اللي عم بيمر فيها الشعب و المراحل التاريخية اللي مر فيها و الحروب و الاوضاع الاقتصادية و السياسية. بشكل عام بدك تدرس هالمجتمع من كل النواحي و بتعطي الاسباب و النتائج. بس انو تعمم على اكتر من نصف الشعب هالصفات هالشي بنظري غلط...

Elephant And Castle

27/02/2009, 08:17

هل السوري شجاع ليعترف انو المجتمع مليء بلأمراض !!!

ثانيا الكل وافق انو نسبة كبيرة من هالظواهر موجودةبلفعل ,,حتى يلي مو عجبهم طريقة كلامي ,,,,و انا بقدر تحفظهم ...و بقدر مشاركتك كتير ..و بالنهاية كل شخص عندو رأي ...انا قلت ببداية الموضوع ,,رجاء اذا غلطان صححولي ,,,بس ما حدا صحح ...بس انتقدو طريقة كلامي ,,

بوس رجلك صححلي !! هههه

Elephant And Castle

27/02/2009, 08:21

حبب اسمعها منكن يا سوريين ...قولوها بكل صراحة بوجهي " يا كلب انتي غلطان لأنو كيت كيت كيت ..." ..بس ما تقلي يا كلب ....و توقف بعدها ,,,,,

شكرا

Elephant And Castle

27/02/2009, 08:31

ما بهمني اذا الله والأنبياء والمبريالية والغزوات الصليبية وارتفاع درجة حرارة الكوكب والزلازل و غتيال ديانا عا طريق باريس و خسارة اليوفي بستامفورد بريدج كانوا سبب وجود الأمراض .....

حدا يقلي انو مجتمعنا ما في امراض

Elephant And Castle

27/02/2009, 08:57

Elephant And Castle

27/02/2009, 09:08

فما تقولوا انو انا حكمت علا نصف الشعب انو ....

الشعب السوري حكم على نفسوا انوا اكتر من 80 بالمية .....

هادا غلط !! ..شي شفتو بعيني ...بس حبب قول انو بمدينتي غير الحبيبة فلاخو هني يلي بشكلو اكتر من تسعين بالمية من اساتذة الجامعة والطلبة !! ... اهل المدينة شاطرين يقعدو عالقهوة !! هههه ..على فكرة هدا نقض ذاتي !!!

مـــــداد

27/02/2009, 11:01

مرحبا بالأول..
بظن انو الظواهر اللي عم يحكي فيها الموضوع أشياء موجودة وملموسة بالمجتمع السوري، يعني ما فينا ننكر هالشي ونخترع تبريرات لا طائل لها.
من جهة تانية مو كل الممارسات الخاطئة ناتجة من رحم نظام الحكم القائم.. في أشياء شخصية جداً كالأخلاق مثلاً.. وقس على هالشي بقية الأمور.. وعلى جميع الأحوال التعميم عالشعب أو على نصف الشعب أو الحكي بالإجمال هو نوع من الظلم.. ففي بالشعب شجعان وفي جبناء وفي أغبياء وفي أذكياء .. إلخ..
لو في تحديد أكثر للسؤال كان ممكن أعطيك إجابة أدق..
بالنهاية هادا رأيي الشخصي فقط..
شكراً..

رجل من ورق

27/02/2009, 13:14

ما كنت حابب أوصل لهون ,,,بس لفرجيكم انو السوريين قمة الأخلاق
عندك اهل كل المناطق الشرقية بسوريا بيتسموا بدو ,,,والبقية بتنظر الن بدونية !!
عندك اهل الريف بحلب و ادلب بيتسموا شوايا !!
اهل المدينة بمدينتي غير الحبيبة بيسموا اهل الريف فلاخو لهلق !!

اهل المدنبشكل عام بينظروا للبقية انو فلاحيين ,,,,
عناصر جيشنا البطل الكل بيعرف شو رأي اهل المدن بالناس يلي بتلتحق في

عندك كلمة نازح !! مو لاجئ !! بتعني riffraff ..or low class
قديش الك ما جيت لسوريا؟؟؟؟؟
كلامك في كتير من اللاصحة
واحمد حكى كتير من اللي كان بدي قوله
بس لفتتني هاي الشغلة
كل المناطق الشرقية بسوريا بيتسموا بدو؟؟؟؟ منين جبت هالحكي؟؟؟؟يعني في بالاخوية كتار من المنطقة الشرقية ما حدا قلون بدو وانا اصلي من دير الزور وعايش حياتي بالشام وماحدا قلي ياها وبعرف كتار متلي ما تقلون هالشي
بعدين اهل الريف بحلب وادلب بيتسموا شوايا؟؟؟؟ شو هالحكي يا عمي اللي بعرفه اهل الريف بالمنطقة الشرقية بيتسموا شوايا واساسا الكلمة بطلوا يحكوها كتير
اهل المدينة بينظروا لاهل الريف انون فلاحين؟؟؟؟ لك منين بتجيب هالحكي طيب يا سيدي وينظروا شو الفلاح ضلع ناقص
بس هاي اخر وحدة شحكتني قال عناصر جيشنا البطل الكل بيعرف شو راي اهل المدن بالناس اللي بتلتحق فيه :lol::lol::lol:
لك عمي بحياة الغوالي خدنا بحلمك
من وين عم تجيب هالحكي ؟ دخلك شو بينظروا يعني نورنا بالله عليك لايكون سوريا اللي بنعرفا غير اللي بتعرفا انت

نوح عواضة

27/02/2009, 17:57

ليك سؤال بحير
طب لو نفترض شجاع ليه ما عمل ثورة ضد الحكم ؟ مثل ما منسمع انو في حكم مش عادل
وشجاع عشين عم يواجه إسرائل وتحمل ضغوطات دولية .

Elephant And Castle

27/02/2009, 20:06

صديقي مداد كلامك صح مية بالمية باستثناء انو ما بجوز التعميم لأنو في ناس منيحة و في ناس لأ !! ,,,طيب لو هلشي مزبوط ..كنا شفنا فترات منيحة و فترات كمان سيئة يعني متل مابقولوا Ups and Downs !..بس من اكتر من 100 سنة ما شفنا غير كل شي سيء ,,,طيب هدا شو بيعني !!

مشان رد اخي رجل من ورق ..ما كتير صرلي زمان من اخر مرة زرت البلد ..ما تفكر انو انا ذكرت موضوع الشوايا والبدو والفلاخو والفلاحيين و غيرو مشان اتهجم عليهم ,,اولا .,,هدون اشرف الناس بالبلد ..ثانيا ذكت هالكلام ردا عاكتير اخوة اتهموني بلأساءة للشعب ,, فحبت فرجي انو الأساءة هي ثقافة سوري بحتة ,, !!

مشان الاخ البناني نوح ...يا صاحبي ما انتبهت انو اول الموضوع في اخت فاضلة اتهمتني انو انا لبناني !! هههه ,ما رح رد عا مشاركتك مشان ما يقولوا انو انا من 14 اذار .رجاء اعذرني.ا شكرا عالرد

ليلاسة

27/02/2009, 23:11

هلأ كل اللي حكيتو موجود بس هادا ما بيعني انو السوريين كلون ما بيسوو وبيضل في شجعان وبيضل في ناس تحب بعضا المشكلة انو ما ضل عنا ثقة ببعضنا يعني صارو كتير ناس ينظرو لاي شخص تاني على انو بيوم من الايام ممكن يتحول لعدو فلا بيساعدو ولا بيحكي ادامو بشي وممكن متل ما قلت يحاربو ليتغدى في قبل ما يتعشا هداك

Elephant And Castle

28/02/2009, 04:16

طيب ماشي شباب ,,,بما انو لغة التعميم ما عجبتكن ,,,رح احكي عالناس بس يلي بحارتي ,,,,

حارتي يلي فيها من كل الأطياف ...

ما حدا يضايق ,,اهل حارتي فاصلين ما بيمثلوا غير انفسن !!!

المسلمين بحارتي بروحوا عالصلا يوم الجمعة كنوع من اداء واجب حزبي اذ انو الخطبة بتجي من وزارة الداخلية بعد تنقيح من جهاز المخابرات

المسيحيين بحارتي بروحوا عالكنيسة ليقارنوا الثياب يلي لابسينها ,,مين شيك اكتر و مين بتجيب تيابا من بيروت ,,و مين بتجيب العطر من باريس

المسلمين العلويين بحارتي ما بيروحوا عالجامع ببساطة لأنو مانن بحاجة !! بروحوا عالجيش ,, ليش ليروحوا و يدعوا لله مشان يحل شي مشكلة ! اي ضابط بالجيش قادر يحل اكبر مشكلة

المرشدية عنا بالحارة هني من السكان الأصليين تماما متل ال Aborigines بأستراليا ,,يعني اذا بعرف شي عنن فأنا بعرف شيي عن المرشدية !!

السمعولية بحارتنا اكتر شي مظلومين بما انو الكل بيحكي عنن شروي غروي ..مع انو جارنا ابو محمد هو رجال سمعولي عمروا تسعين سنة و لهلق بيضرب مرتو وقت ما بتزبط معها المجدرة ...( النكتة الواضحة هون انو هني ما بيعبدو النسوان !! )

في شب بيبقي واقف عا زاوية الحارة بضل بسب البقية ومو عاجبوا شي ....شكلوا ملحد واليعوذبالله ,,,,بس ما معو يدفع نص مليون دولار مشان شي كورس ,,لهيك ما بيعرف بلألحاد غير انو يسب البقية !! ملحد جاهل !

برجع و بأكد انو اهل حارتي فاصليين و ما بيمثلو غير انفسن ...

بعرف انو المسلمين والمسيحيين والعلويين والسمعولية والمرشدية وحتى الملحدينمو هيك ابدا ...

عابحاول قول لأهل حارتي هالشي بس ما عبيفهموا على كلامي !!!

(All Rights reserved )

Elephant And Castle

28/02/2009, 04:19

ساعدوني لأقدر فهّم ولاد حارتي ...بليييييز

mhsen77

28/02/2009, 05:52

ساعدوني لأقدر فهّم ولاد حارتي ...بليييييز

كيف خيو ان شا الله تمام
بالنسبة لولاد حارتك خيو فيك كل يوم تعزم شب او شبين منهم لعندك عالبيت او انت تروح تسهر عندو وتاخدو وتعطو شوي بالحكي بيمشي الحال
وبخصوصا جماعتنا المرشدية خيو انا فيني ساعدك بلي فيني عليه واهلا وسهلا فيك اخ وصديق :D

بعدين انت عاى اساس مغترب وبدك ترجع على بلدك؟:?