حبش : آن الأوان للتخلص من مادة جرائم الشرف [الأرشيـــــف]

The morning

23/02/2009, 07:40

علمت سيريانيوز أن مجلس الشعب يعتزم مطلع آذار المقبل تعديل قانون العقوبات بما يلغي المادة التي تعطي الأسباب المخففة لمرتكبي ما يسمى "جرائم الشرف".

كشف حبش عن عزمه "تقديم مشروع قانون في أول آذار المقبل إلى مجلس الشعب يعدل بمقتضاه قانون العقوبات بما يلغي العمل بالمادة 548 والتي تأخذ بالأسباب المخففة لجرائم الشرف", مشيرا إلى أن "التعديل سيلحظ أيضا تشديد العقوبات التي تنص عليهما المادتين 473 و474 من قانون العقوبات والمتصلة بجرائم الزنا مع المساواة بين المرأة والرجل في هذه العقوبات".

وتنص مواد قانون العقوبات الخاصة بتجريم الزنا على عقوبة المرأة الزانية من ثلاثة أشهر إلى سنتين فيما يقضى بالعقوبة نفسها على شريك الزانية إذا كان متزوجا وإلا فالحبس من شهر إلى سنة, فيما يعاقب الزوج بالحبس من شهر إلى سنة إذا ارتكب الزنا في البيت الزوجي أو إذا اتخذ له خليلة جهارا في أي مكان كان، وتنزل العقوبة نفسها بالمرأة الشريك.

وأشار حبش إلى أن "هناك من يدعو إلى إبقاء المادة المتعلقة بجرائم الشرف بحجة عدم التشجيع على الزنا والفحشاء، إلا أنه بوجود عقوبات قانونية صارمة على مرتكب الفحشاء والتزاني يمكن إلغاء المادة 548 التي تأخذ بالأسباب المخففة لمرتكب هذه الجريمة".

ويستفيد, وفقا للقانون السوري, من العذر المحل من فاجأ زوجه أو احد أصوله أو فروعه أو أخته في جرم الزنا أو في صلات جنسية فحشاء مع شخص أخر فأقدم على قتلهما أو ايذائهما أو قتل أو إيذاء احدهما بغير عمد, فيما يستفيد من العذر المخفف في حال فاجأهما في حالة مريبة.

واعتبر حبش أنه "آن الأوان للتخلص من مادة تحل القتل بغير حق", مشيرا إلى أن هذه المادة تتنافى مع العقل والمنطق والشرائع السماوية والشرف وبالتالي تتنافى مع النواميس الإنسانية".
وشهد العام الماضي انعقاد الملتقى الوطني الأول حول جرائم الشرف برعاية حكومية حيث دعت التوصيات الختامية التي وافق عليها رجال الدين الحاضرين دون تحفظ إلى "تشديد عقوبة الزنا للرجل والمرأة على قدم المساواة، وتعميم فتاوى تحرم ارتكاب جرائم الشرف، ومنع استفادة مرتكبيها من العذر المحلل أو السبب المخفف للعقاب".

ووفق أرقام قدمها ممثل إدارة الأمن الجنائي في الملتقى فإن عدد الجرائم التي وقعت في سورية بدافع الشرف وصلت إلى 38 جريمة من أصل 533 جريمة قتل حصلت في العام 2007 .
ووصلت جرائم الشرف حتى الشهر الثامن من العام الماضي إلى 29 جريمة شرف, وسجلت محافظة إدلب أعلى نسبة من جرائم الشرف بواقع 22% ثم محافظة حلب بـ 15%.

سيريانيوز :gem:

MadMax

23/02/2009, 13:41

الله يدملنا هالتفكير العلماني عند رجال الدين بسوريا :larg:

nour333

23/02/2009, 13:48

الله يدملنا هالتفكير العلماني عند رجال الدين بسوريا :larg:
على فكرة هاد مو تفكير علماني ولو واحد راح لرسول او احد الخلفاء وقلو انو قتل اختو بسبب جريمة شرف رح يوقعو عليه حد القتل

بعدين ملاحظة جريمة الزنى من الجرائم التي يستحيل(يعني صعب كتير) اثباتها بالدين لأنو لازم يشوف الزاني والزانية اربع شهود وهن بفعل الزنى يعني مو يقولو شفناهم بالغرفة او بلباس غير محتشم وما الى ذلك هاي ما بتساوي قشرة بصلة كدليل
هاد ازا استثنينا امر الحمل للغير متزوجه

MadMax

23/02/2009, 14:04

على فكرة هاد مو تفكير علماني ولو واحد راح لرسول او احد الخلفاء وقلو انو قتل اختو بسبب جريمة شرف رح يوقعو عليه حد القتل

طيب ممكن تخبرينا شو حكم الزانية ( المتزوجة ) في الاسلام ..؟؟

بعدين ملاحظة جريمة الزنى من الجرائم التي يستحيل(يعني صعب كتير) اثباتها بالدين لأنو لازم يشوف الزاني والزانية اربع شهود وهن بفعل الزنى يعني مو يقولو شفناهم بالغرفة او بلباس غير محتشم وما الى ذلك هاي ما بتساوي قشرة بصلة كدليل
هاد ازا استثنينا امر الحمل للغير متزوجه

هادا موضوع تاني ..... يعني فرض عقوبة القتل .. في حال انثبتت
و إذا الزوج أو الاخ شاف بعينو .... شو بقى بدو إثبات أكتر من هيك ... أكيد بدافع الدين ... رح يقوم بالقتل
يعني على هالحكي .... لازم يكون الحكم .. حكم الزنى بالأماكن العامة ...مو يشترطو 4 شهود بغرفة النوم

ماريا78

23/02/2009, 14:15

حكم الزاني والزاني في الاسلام الرجم حتى الموت للمتزوجة
ولكن لا يطبق هذا الحكم مين ما أجا على بالو يطبقو
في دولة حكومة هي اللي بتطبقو

ayhamm26

23/02/2009, 15:25

[/size] [/color][/size]

طيب ممكن تخبرينا شو حكم الزانية ( المتزوجة ) في الاسلام ..؟؟

هادا موضوع تاني ..... يعني فرض عقوبة القتل .. في حال انثبتت
و إذا الزوج أو الاخ شاف بعينو .... شو بقى بدو إثبات أكتر من هيك ... أكيد بدافع الدين ... رح يقوم بالقتل
يعني على هالحكي .... لازم يكون الحكم .. حكم الزنى بالأماكن العامة ...مو يشترطو 4 شهود بغرفة النوم

ما عم بعرف ليش مصر تربط هيك نوع من الجرائم بالدين؟؟

وين في نص بالدين شفتو بيقول للواحد اذا شك مجرد شك بتصرف اختو او بنتو او زوجتو , يروح يقتلها؟؟

متل ما قالوا فوق, الحكم بالرجم لا يطبق الا من قبل الدولة, وبوجود 4 شهود واذا الشهود شافون نايمين بسرير واحد ومتغطايين ما عد اسمو زنى والو عقوبة تانية غير القتل

اما اذا الزوج او الاخ شاف هيك شي, فما عندو اي حق ياخد حقو بايدو.

القضية ما رح تنحل حتى ولو غيروا القانون وصاروا يحكموا بالاعدام على قضايا الشرف(وهو شي كتير مستبعد برأيي)

القضية هي رؤوس متعفنة متحجرة ما رح يردعها اي قانون, والحل الوحيد هو التوعية والبدء من رجال الدين اللي المفروض يتحملوا المسؤولية الاكبر على اعتبار هالشي عم يتم نسبو للدين فورا.

الاسبوع الماضي بالمانيا قصة جريمة شرف هزت المجتمع, واحد افغاني قتل اختو عمرها 17 سنة لانو غابت عن البيت ولانو شك انو عندها بوي فريند, وبعد ما صدر حكم بحقو بالسجن المؤبد وهو اقسى حكم بالقانون الالماني, اهلو طار عقلن وبلشو قدام الكاميرات يسبوا على القضاة وعلى الدولة والمجتمع الالماني, ليش لانن مو شايفين انو ابنن ارتكب هالجريمة العظيمة اللي بتستاهل هيك حكم.

هي العقول اللي في عنا منها كتير هي المشكلة مو التشريع.

بنفسجة

23/02/2009, 15:57

اي ياريت
بيريحونا كتير
بس ياترى اذا حذفت المادة من الدستور رح تحذف من عقول الناس؟؟

MadMax

23/02/2009, 19:06

حكم الزاني والزاني في الاسلام الرجم حتى الموت للمتزوجة
ولكن لا يطبق هذا الحكم مين ما أجا على بالو يطبقو
في دولة حكومة هي اللي بتطبقو
في كتير أمور ... لما بيتواجه فيها الدين مع القانون .... الانسان البسيط ( بكم طبيعة مجتمعنا و تقاليدو و تربيتو ) رح يختار الدين

MadMax

23/02/2009, 19:20

ما عم بعرف ليش مصر تربط هيك نوع من الجرائم بالدين؟؟
لأنو الدين هو أهم عامل بيتحكم بمجتمعنا ..... و هو عم يشجع على هالشي

وين في نص بالدين شفتو بيقول للواحد اذا شك مجرد شك بتصرف اختو او بنتو او زوجتو , يروح يقتلها؟؟

ما حدا جاب سيرة الشك
نحنا عم نحكي في حال إثبات الزنى
في حال شافها بأم عينو
بهالحالة هو متأكد انو في زنى
و بيعرف أنو حكم الزنى بالاسلام القتل .... فـ بأغلب الاحيان ... رح يقتل و ضميرو مرتاح

بينما حكم الزانية بالقانون المدني ... أكيد مو إعدام

اما اذا الزوج او الاخ شاف هيك شي, فما عندو اي حق ياخد حقو بايدو.
ما عندو حق ... أكيد
بس منرجع لأساس الحكم بالاسلام
الاربع شهود ... هدول مشان إثات الزنى .... بس مو هني شرط الحكم بالقتل ( يعني مو معنى الحكم أنو يللي بتزني قدام 3 حلال و قدام 4 حرام )
بقى يللي بشوف بعينو ... فبينو و بين حالو شرط الاثبات تحقق .. و جازت العقوبة

القضية هي رؤوس متعفنة متحجرة ما رح يردعها اي قانون, والحل الوحيد هو التوعية والبدء من رجال الدين اللي المفروض يتحملوا المسؤولية الاكبر على اعتبار هالشي عم يتم نسبو للدين فورا

هيك أنا معك
يجب توعية المجتمع.

هي العقول اللي في عنا منها كتير هي المشكلة مو التشريع.

يمكن العلة بالتفسير أو بالتأويل
يعني البعض راح بتفسير هالحكم على انو لردع الفجور و الانحلال بالمجتمع ....يعني لما الوحدة بتزني على علم 4 شهود .... بتكون ما عم تمارس مجرد زنى .. بل صار نوع من الفجور .... بس مو هادا موضوعنا
موضوعنا قانون و مجتمع مدني ...
و إزالة الاسباب التخفيفية لجرائم الشرف .... برأيي هو مطلب مهم

sandra

23/02/2009, 21:45

لنشوف شو رح يصير
ناطرين هالتعديل

I_Love_Syria

23/02/2009, 22:04

لأنو الدين هو أهم عامل بيتحكم بمجتمعنا ..... و هو عم يشجع على هالشي

و بيعرف أنو حكم الزنى بالاسلام القتل
بس منرجع لأساس الحكم بالاسلام

في مجال تجبلنا إثبات واحد انو الشخص الي عم يقتل بنتو أو اختو أو مرتو عم يقتلهون لأنو هيك الدين قايل, أو لأنو هو ماشي عالدين ومابيقدر يخالف تعاليم الدين

أغلب الجرائم الي عم تصير عم تصير بالمناطق الي نسبة الجهل فيها عالية جداً, ومابظن انو كل مابتصير جريمة شرف بيكون مرتكبها مسلم...
بما انو صاير كلشي بينرما عالمسلمين

nour333

23/02/2009, 22:44

[/size] [/color][/size]

طيب ممكن تخبرينا شو حكم الزانية ( المتزوجة ) في الاسلام ..؟؟
حكمها بالدين الرجم حتى الموت
بس عارف بالاول بجيبو اربع شهود عدول انهم شافوها وشافو بوضع الجماع مو بقميص نوم او ماشابه بعدين لو كانو مو اربع شهود يعني 3 بيتنبهو يسكتو او كل واحد بينجلد فيهم 80 جلده
غير هيك انت واحد زكي كيف ممكن تثبت انو وحده متزوجه زنت الا متلا لو كان زوجها غايب وطلعت حامل يعني اثبات هالشي مستحيل الا شوي
لك حتى الزوج ازا وجعو راسو وروح من الشغل بكير وشاف زوجتو بواقعة الزنى ما بيحقلو يقتلها بس بطلعلو الملاعنه وهي بأختصار بيشهد اربع شهادات انه من الصادقيين والخامسة ان لعنة الله عليه ان كان من الكاذبين وبتدرأ عن نفسها العذاب انها تشهد اربع شهادات انو من الكاذبين والخامسة ان غضب الله عليها ان كان من الصادقيين وهون بيجي دور القاضي بيفرق بينهم بلا عودة وكل واحد بروح ع بيت اهلو

هادا موضوع تاني ..... يعني فرض عقوبة القتل .. في حال انثبتت
و إذا الزوج أو الاخ شاف بعينو .... شو بقى بدو إثبات أكتر من هيك ... أكيد بدافع الدين ... رح يقوم بالقتل
يعني على هالحكي .... لازم يكون الحكم .. حكم الزنى بالأماكن العامة ...مو يشترطو 4 شهود بغرفة النوم

العقوبات بالاسلام بقوم فيها ولي الامر وما حد الو الحق يطبقها سواء زوج او اخ
آخر شي ماحد قد ما كان قليل ادب بيزني بالاماكن العامه إلا ما ياخدو زاوية تحت الشجر مثلا
لهيك ازا صدف وحد شافهم ما بيروح ينادي التلاته إلا هن مخلصين

nour333

23/02/2009, 22:54

لأنو الدين هو أهم عامل بيتحكم بمجتمعنا ..... و هو عم يشجع على هالشي

ممكن تشرحلي كيف بشجع هالشي ؟ يعني في اماكن بالجنه مخصصة للي بغسلو عارهم متلا

ما حدا جاب سيرة الشك
نحنا عم نحكي في حال إثبات الزنى
في حال شافها بأم عينو
بهالحالة هو متأكد انو في زنى
و بيعرف أنو حكم الزنى بالاسلام القتل .... فـ بأغلب الاحيان ... رح يقتل و ضميرو مرتاح

بشروط اما بالنسبه لضمير بالاول ليصير عنا ضمير بعدين بنفكر براحتو

بينما حكم الزانية بالقانون المدني ... أكيد مو إعدام
انو قانون مدني تبع اوروبا ولا تبع الناس بمجتمعنا اللي ما بيتركو اخواتها بحالهم مو بس الزانية

ما عندو حق ... أكيد
بس منرجع لأساس الحكم بالاسلام
الاربع شهود ... هدول مشان إثات الزنى .... بس مو هني شرط الحكم بالقتل ( يعني مو معنى الحكم أنو يللي بتزني قدام 3 حلال و قدام 4 حرام )
بقى يللي بشوف بعينو ... فبينو و بين حالو شرط الاثبات تحقق .. و جازت العقوبة

هلا بالنسبه للحلال والحرام حتى لو زنت قدام العلاقة اللي بغرفة نومها حرام بس احنا بنحكي عن الاثبات

هيك أنا معك
يجب توعية المجتمع.

يمكن العلة بالتفسير أو بالتأويل
يعني البعض راح بتفسير هالحكم على انو لردع الفجور و الانحلال بالمجتمع ....يعني لما الوحدة بتزني على علم 4 شهود .... بتكون ما عم تمارس مجرد زنى .. بل صار نوع من الفجور .... بس مو هادا موضوعنا
موضوعنا قانون و مجتمع مدني ...
و إزالة الاسباب التخفيفية لجرائم الشرف .... برأيي هو مطلب مهم
اكيد مطلب مهم وبنضم صوتنا لصوتك

Elephant And Castle

23/02/2009, 23:15

العقوبات بالاسلام بقوم فيها ولي الامر وما حد الو الحق يطبقها سواء زوج او اخ
آخر شي ماحد قد ما كان قليل ادب بيزني بالاماكن العامه إلا ما ياخدو زاوية تحت الشجر مثلا
لهيك ازا صدف وحد شافهم ما بيروح ينادي التلاته إلا هن مخلصين
جريمة الشرف ما بيرتكبها غير كل قليل شرف و انسانية !!

مشان قصة الشجرة !!اذا راح و صاح لرفقاتوا ورجعوا و شافوهون لسا مع بعض مشغوليين ...انا مع قتل الشب,,مو مشان الشرف ..بس مشان شي تاني

i m sam

23/02/2009, 23:20

لأنو الدين هو أهم عامل بيتحكم بمجتمعنا ..... و هو عم يشجع على هالشي

صحيح انو اهم عامل لكنه لا يشجع على القتل. يحكم بالقتل معك انما تاخد الحق بايدك فهاد لا يبرره اي قانون ولا اي تشريع ولا اي دين ايضا.

ما حدا جاب سيرة الشك
نحنا عم نحكي في حال إثبات الزنى
في حال شافها بأم عينو
بهالحالة هو متأكد انو في زنى
و بيعرف أنو حكم الزنى بالاسلام القتل .... فـ بأغلب الاحيان ... رح يقتل و ضميرو مرتاح
" من قتل نفسا فكأنما قتل الناس جميعا ومن أحياها فكأنما احيا الناس جميعا"
فيلي عم يقتل ما عم يطبق قانون عم يقتل مشان يسترد شرف للاسف جعلوه محصور بالمنطقة هي

بينما حكم الزانية بالقانون المدني ... أكيد مو إعدام

منرجع منقول هو ما قتل لتطبيق قانون لانو حكم الزانية بالقانون السوري هو الحبس متل ما ورد

ما عندو حق ... أكيد
بس منرجع لأساس الحكم بالاسلام
الاربع شهود ... هدول مشان إثات الزنى .... بس مو هني شرط الحكم بالقتل ( يعني مو معنى الحكم أنو يللي بتزني قدام 3 حلال و قدام 4 حرام )
بقى يللي بشوف بعينو ... فبينو و بين حالو شرط الاثبات تحقق .. و جازت العقوبة
كانك عم تفسرها تماما متل ما هنن عم يفسروها لنفسهم انت برأيك طالما شاف بعينو لازم يطبق القانون بايدو؟؟ بغض النظر نوع القانون او نوع العقوبة.

هيك أنا معك
يجب توعية المجتمع.
وأنا معكما مليون بالمية

يمكن العلة بالتفسير أو بالتأويل
يعني البعض راح بتفسير هالحكم على انو لردع الفجور و الانحلال بالمجتمع ....يعني لما الوحدة بتزني على علم 4 شهود .... بتكون ما عم تمارس مجرد زنى .. بل صار نوع من الفجور .... بس مو هادا موضوعنا
موضوعنا قانون و مجتمع مدني ...
و إزالة الاسباب التخفيفية لجرائم الشرف .... برأيي هو مطلب مهم
وانا معك كمان بازالة الاسباب التخفيفية لما يدعى جرائم شرف
حابب اذكر بالاخير شغلة
ورد في صحيح البخاري " قال سعد بن عبادة لو رأيت رجلا مع امراتي لضربته بالسيف غير مصفح فبلغ ذلك رسول الله صلى الله عليه وسلم فقال: أتعجبون من غيرة سعد لأنا أغير منه والله أغير مني"
والله انزل انو حد الزنا حتى يقام لازم يشهد عليه اربعة او باعتراف صاحبه . المقصد انو ما حدا يقتل ويقول غيرة وشرف لانو الله اغير مننا والله هيك قال ( طبعا هالكلام ليلي بيحلل لنفسو القتل لهالاسباب).
ومتل ما قلت انو العلة بالتفسير لما نزل قانون السير الجديد معظم السائقين شو قالو؟؟ انو هالقانون لحتى ينهبوا مننا اكتر ولحتى تزيد رشوة الشرطي... وبكل قناعة.
نسيوا انو القانون وضع لحماية مجتمع ولصالح مجتمع كامل فما لازم يتشوه القانون بتفسيرنا الخاطئ الو.
وسامحونا للاطالة.

MadMax

24/02/2009, 00:42

في مجال تجبلنا إثبات واحد انو الشخص الي عم يقتل بنتو أو اختو أو مرتو عم يقتلهون لأنو هيك الدين قايل, أو لأنو هو ماشي عالدين ومابيقدر يخالف تعاليم الدين

لا ... و مو هادا يللي بهمني
بس يللي بدي قولو أنو الدين عم يشجع على هيك جرائم

أغلب الجرائم الي عم تصير عم تصير بالمناطق الي نسبة الجهل فيها عالية جداً,

ما هو بالعادة .... المناطق الجاهلة ... بيحكمها الدين بالدرجة الاولى

MadMax

24/02/2009, 00:45

حكمها بالدين الرجم حتى الموت
بس عارف بالاول بجيبو اربع شهود عدول انهم شافوها وشافو بوضع الجماع مو بقميص نوم او ماشابه بعدين لو كانو مو اربع شهود يعني 3 بيتنبهو يسكتو او كل واحد بينجلد فيهم 80 جلده
غير هيك انت واحد زكي كيف ممكن تثبت انو وحده متزوجه زنت الا متلا لو كان زوجها غايب وطلعت حامل يعني اثبات هالشي مستحيل الا شوي
لك حتى الزوج ازا وجعو راسو وروح من الشغل بكير وشاف زوجتو بواقعة الزنى ما بيحقلو يقتلها بس بطلعلو الملاعنه وهي بأختصار بيشهد اربع شهادات انه من الصادقيين والخامسة ان لعنة الله عليه ان كان من الكاذبين وبتدرأ عن نفسها العذاب انها تشهد اربع شهادات انو من الكاذبين والخامسة ان غضب الله عليها ان كان من الصادقيين وهون بيجي دور القاضي بيفرق بينهم بلا عودة وكل واحد بروح ع بيت اهلو

أنو معول لسا ما فهمتي شو بقصد ..
أنا عم احكي أنو إذا الزوج شاف زوجتو و هيي عم تزني و تأكد ( بينو و بين نفسو ) فهو بيعرف أنو بالشرع الزنى عقوبتو القتل
فما بكون عندو مشكلة أخلاقية تمنعو من القتل لأنو الشرع حلل قتل الزانية

العقوبات بالاسلام بقوم فيها ولي الامر وما حد الو الحق يطبقها سواء زوج او اخ
آخر شي ماحد قد ما كان قليل ادب بيزني بالاماكن العامه إلا ما ياخدو زاوية تحت الشجر مثلا
لهيك ازا صدف وحد شافهم ما بيروح ينادي التلاته إلا هن مخلصين

يعني خلاصة الموضوع
الزانية عقوبتها القتل ..؟؟
و لا عقولتها القتل إذا شافوها 4 أشخاص عم تزني ..؟؟

يعني إذا أثبتنا زناها من دون 4 شهود تقتل .. أو لا ..؟؟

MadMax

24/02/2009, 00:54

ممكن تشرحلي كيف بشجع هالشي ؟

لما بيفرض عقوبة القتل الزانية ...معناها عم يشجع على قتلها
مع أنو هيك عقوبة ( إنسانياً ما بتتناسب ) مع فعل الزنا

انو قانون مدني تبع اوروبا ولا تبع الناس بمجتمعنا اللي ما بيتركو اخواتها بحالهم مو بس الزانية

إذا مو مقتنعة بمبدأ القوانين المدنية ... فهادا بدو نقاش آخر

هلا بالنسبه للحلال والحرام حتى لو زنت قدام العلاقة اللي بغرفة نومها حرام بس احنا بنحكي عن الاثبات

الرجل بهيك مواقف ما رح ينظر للاثبات ....طالما الجرم وقع من وجهة نظرو ... و العقوبة مطروحة دينياً

مجنون يحكي وعاقل يسمع

24/02/2009, 01:18

على فكرة هاد مو تفكير علماني ولو واحد راح لرسول او احد الخلفاء وقلو انو قتل اختو بسبب جريمة شرف رح يوقعو عليه حد القتل

بعدين ملاحظة جريمة الزنى من الجرائم التي يستحيل(يعني صعب كتير) اثباتها بالدين لأنو لازم يشوف الزاني والزانية اربع شهود وهن بفعل الزنى يعني مو يقولو شفناهم بالغرفة او بلباس غير محتشم وما الى ذلك هاي ما بتساوي قشرة بصلة كدليل
هاد ازا استثنينا امر الحمل للغير متزوجه
فيكي تقوليلي شو التفكير العلماني , يعني واحد شاف زوجتو ربي كما خلقتني (بلا ولا شي) بالسرير مع شخص آخر واشتكى عليها بحجة ممارسة الزنا وفي المحكمة قالت للقاضي : إنه كاذب يا سيدي فهو لم ير عضو الرجل يقبل ويدبر ، وسألها محامي الرجل وماذا كنتما تفعلان في السرير بدون ثياب فترد عليه
- كنّا عم نلعب باصرة يا سيدي والثياب تعيقنا في لعب الورق
أو تقول للقاضي :يا سيدي زوجي هذا يفتري علينا والدليل أنه لم يشاهدنا أحد غيره فأين الشهود الثلاثة الآخرين
طيب عين ما شافت ، عقل ما شاف
وسلملي عليه وبوسلي عينيه

ayhamm26

24/02/2009, 01:26

أنو معول لسا ما فهمتي شو بقصد ..

يعني خلاصة الموضوع
الزانية عقوبتها القتل ..؟؟
و لا عقولتها القتل إذا شافوها 4 أشخاص عم تزني ..؟؟

يعني إذا أثبتنا زناها من دون 4 شهود تقتل .. أو لا ..؟؟

برجع بقلك ما بصير حدا ينفذ العقوبة بايدو, يعني اذا واحد انقتل ابو وهو بيعرف انو عقوبة القاتل الاعدام اصبح بيوفر على الشرطة البحث عن القاتل وبيروح بيقتلو و خلصنا.

طيب شو رايك انو معظم حالات قتل الشرف عم تكون لبنات باعمار صغيرة وغير متزوجات , طيب القاتل عم تفرق معو انو حكم الشرع بهالحالة مو القتل؟؟

بعدين مين قلك انو القاتل عم يحركو الدين, او هو اصلا متدين او بيعرف شو حكم الزاني بالدين او هو اصلا عندو ادنى حد من الثقافة بتخلي يسال ليعرف.

صدقني القتل عم يصير مو حرصا على تطبيق الشريعة وانما خوفا من المجتمع اللي حوالي, جيرانو ورفقاتو وقرايبينو اللي رح يتهموا بقلة الشرف اذا ما عمل هيك.

اما قضية تطبيق حد الزنى , فلا يمكن تطبيق عقوبة القتل بدون ال 4 شهود, او انو يعترف الزاني او الزانية بالجرم علنا , وحتى لو صوروهن بالكاميرا و اثبتوا انو التصوير حقيقي مو مونتاج و تركيب يعني , فهو دليل غير معترف في
وحتى لو الزوج ادعى على زوجتو, فلازم يحلف على القران امام القاضي خمس مرات بهالشي, واذا الزوجة انكرت هالشي بتحلف هي كمان خمس مرات على القران لتدفع عن نفسها العقوبة

بتعرف انا مشتهي اسمع بس عن واحد متدين ارتكب هي جريمة, بس لحتى هيك بلش اقتنع انو فعلا الدين هو السبب.

The morning

24/02/2009, 07:58

هلئ بغض النظر ان كان الدين عم يشـجع او جارنا عم يـصفّر .. المهم انو اخيرا تمّ طـرح هالـموضوع على طـاوله النقاش بـعد الـعديد و الـعديد من البرامج و المـسلسلات و الحملات و الـخ الـخ اللي كانت تنادي بهالـشي ..

يعني في احتـمال بكـرا نقلون لولادنا انـّو بزمنـاتو كان في شـي اسمـو جريمه الشـرف .. و نحكيلون عنها و يـفتحو تمـون هيك باستغراب متل وقت بيحكولنا عن وئـد البنات :clap: ..

ما هو بالعادة .... المناطق الجاهلة ... بيحكمها الدين بالدرجة الاولى

بس ملاحظه سـريعه سـمرا , انت عم تـخلط بين الـدين و التخلـّف الديني .. يعني مثلا الدين قلها للمرأه تغطي راسها بس ما قلها تلبس كـيس أسـود متـحرّك :? ! الدين حرّم المناظر الـمخله بالحياء بس الدين ما حرّم ميكي ماوس بحجّـه انـّو مـثير !!
يعني في دين - و هون ما عم اطرق لكون صح او غلط هالاحكام لانو كل مين عدينو الله يعينو مو قد هالفوته انا :p - و في ناس عم تتاجر بالدين و ناس جـهلها عالي و ما عندها وعـي عم تنجر وراهم ..

nour333

24/02/2009, 12:54

أنو معول لسا ما فهمتي شو بقصد ..
أنا عم احكي أنو إذا الزوج شاف زوجتو و هيي عم تزني و تأكد ( بينو و بين نفسو ) فهو بيعرف أنو بالشرع الزنى عقوبتو القتل
فما بكون عندو مشكلة أخلاقية تمنعو من القتل لأنو الشرع حلل قتل الزانية

انا فاهم قصدك بس حبيت احكيلك عن الشرع هلا ازا قصدك انو الزوج رح يقتل وضميرو مرتاح لا الموضوع اكتر من هيك رح يقتلها وهو رافع راسو لأنو انتقم لنفسو حتى لو ما بيعرف بالشرع شي بتعرف انا مبارح تخيلت حالي رجال ( مع اني نوعا ما قريبه لرجال) ومرتي عملت هيك ما رح اطلع ع شرع بصراحة بقتلها وبشرب من دمها
يعني خلاصة الموضوع
الزانية عقوبتها القتل ..؟؟
و لا عقولتها القتل إذا شافوها 4 أشخاص عم تزني ..؟؟

لا عقوبتها ازا شافوها 4 لأنو المعصية لو ماحد شافها بتكون ساعة ضعف وربنا بحب انها توب وتصير ورقتها بيضه
اما ازا شافوها 4 صارت فضيحة وعليها شهود وصدق رقم اربعة صعب كتير الا ازا كانت بمكان مكشوف وبجوز يشوفوها 10 وهيك بتكون مجاهرة بالمعصية
يعني إذا أثبتنا زناها من دون 4 شهود تقتل .. أو لا ..؟؟
لأ بس ما بقدر جاوبك ازا صورها فيديو
لما بيفرض عقوبة القتل الزانية ...معناها عم يشجع على قتلها
مع أنو هيك عقوبة ( إنسانياً ما بتتناسب ) مع فعل الزنا

هلا فعل الزنى بختلف من واحد لتاني انا من وجهة نظري لو من كل مليون حاله نتج طفل ينرمي بمزبلة لازم المليون يتعاقبو وصراحه ما بهمني سبب اكتر من هالسبب

إذا مو مقتنعة بمبدأ القوانين المدنية ... فهادا بدو نقاش آخر
مو قصة مو مقتنعه بس القوانين بسيطة المشكلة بناس انو تصير تحترمها

الرجل بهيك مواقف ما رح ينظر للاثبات ....طالما الجرم وقع من وجهة نظرو ... و العقوبة مطروحة دينياً

مطروحة بشروط يعني ازا قلت سامر ازا حاصل على شهادة جامعية رح يستلم منصب المدير العام
مو معناتها سامر رح يستلم منصب المدير العام حتى لو ما بفك الخط
صار بدها فنجان قهوة:D:D

nour333

24/02/2009, 13:04

جريمة الشرف ما بيرتكبها غير كل قليل شرف و انسانية !!

مشان قصة الشجرة !!اذا راح و صاح لرفقاتوا ورجعوا و شافوهون لسا مع بعض مشغوليين ...انا مع قتل الشب,,مو مشان الشرف ..بس مشان شي تاني
قصدك الشب اللي راح نادا صحابو فوق ماهو مو اناني وحرم حالو من كل المشاهد بدك تقتلو عن جد انك غريب

فيكي تقوليلي شو التفكير العلماني , يعني واحد شاف زوجتو ربي كما خلقتني (بلا ولا شي) بالسرير مع شخص آخر واشتكى عليها بحجة ممارسة الزنا وفي المحكمة قالت للقاضي : إنه كاذب يا سيدي فهو لم ير عضو الرجل يقبل ويدبر ، وسألها محامي الرجل وماذا كنتما تفعلان في السرير بدون ثياب فترد عليه
- كنّا عم نلعب باصرة يا سيدي والثياب تعيقنا في لعب الورق
أو تقول للقاضي :يا سيدي زوجي هذا يفتري علينا والدليل أنه لم يشاهدنا أحد غيره فأين الشهود الثلاثة الآخرين
طيب عين ما شافت ، عقل ما شاف
وسلملي عليه وبوسلي عينيه
هلا ازا انكرت ما بيقدر يثبت هلا افرض انك شفت واحد بيسرق وما في دليل ما بتقدر تحبسو وبجوز يرفع عليك قضية رد شرف كمان
في شي اسمو البينة على من ادعى واليمين على من انكر

MadMax

24/02/2009, 13:36

بس ملاحظه سـريعه سـمرا , انت عم تـخلط بين الـدين و التخلـّف الديني .. يعني مثلا الدين قلها للمرأه تغطي راسها بس ما قلها تلبس كـيس أسـود متـحرّك :? ! الدين حرّم المناظر الـمخله بالحياء بس الدين ما حرّم ميكي ماوس بحجّـه انـّو مـثير !!
يعني في دين - و هون ما عم اطرق لكون صح او غلط هالاحكام لانو كل مين عدينو الله يعينو مو قد هالفوته انا :p - و في ناس عم تتاجر بالدين و ناس جـهلها عالي و ما عندها وعـي عم تنجر وراهم ..
شوش ... أنا ما عم احكي عن دين معين .... أنا عم احكي عن الدين بالمطلق كــــ تابو ..... بس على اعتبار الموضوع عن حبش بالذات .. اجا كلامنا عن الاسلام

و بالاماكن المتخلفة .... بياخدو قشور الدين ....و بيطغى يللي سميتيه انتي تخلف ديني

عالهامش
كل فترة بينفتح موضوع عن هيك فكرة .. بكون في عنا أمل هالمرة نقدر نناقش أفضل من المرة السابقة
بس أملنا بخيب مرة بعد مرة

ماريا78

24/02/2009, 13:48

العقوبة المحاكم هي اللي بتنفذها مو أي حدا
بعدين ماسمعتو بألف حادثة عن جرائم قتل كان غطاؤها الشرف و هدفها الأساسي ميراث مثلا او حضانة أولاد مثلا
وبعدين ليش هالمرة مابيحقلا تقطع ايد الرجال إذا سرق أو لسانو إذا افترى أو أو أو أو ولا الشرف بيبدا وبينتهي عند المرة ليكو عمي ماحدا رب حدا
فيه رب بيحاسب الجميع
بعدين تصحيحا أنو مو دائما عقوبة الزنى القتل القتل فقط للمتزوجات يعني البكر إذا زنت تجلد 100 جلدة اقتضى التنويه

nour333

24/02/2009, 14:07

حنين.

24/02/2009, 14:46

يعني إذا أثبتنا زناها من دون 4 شهود تقتل .. أو لا ..؟؟
لا لا تقتل وحتى لو بلغ عنها هو ما عندو اربع شهود
يعتبر قذف
حد القذف:
القاذف هو فاسق بنص القرآن الكريم.قال تعالى: {والذين يرمون المحصنات ثم لم يأتوا بأربعة شهداء فاجلدوهم ثمانين جلدة ولا تقبلوا لهم شهادة أبدًا وأولئك هم الفاسقون. إلا الذين تابوا من بعد ذلك وأصلحوا فإن الله غفور رحيم}[النور:4-5].
ويقام هذا الحد على كل قاذف، رجلا كان أم امرأة، مسلمًا كان أم غير مسلم، يرمى غيره بالزنى دون أن يأتى بأربعة شهداء صادقين يشهدون بما قال، سواء كان المقذوف رجلا أم امرأة، مسلمًا أم غير مسلم، حرَّا أم عبدًا، كبيرًا أم صغيرًا، صحيحًا سليمًا أو غير سليم.
حد القذف حق من حقوق الله:
حد القذف حق من حقوق الله لا يسقط عن القاذف أبدًا حتى وإن عفا عنه المقذوف،
////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////
تخيل هاد بس حكم اللي قال عن وحدة زانية وما عندوا اربع شهود حتى لو شاف بعينو فكيف يا ترى من قتلها

ابو ريتا

24/02/2009, 15:22

يا لطيف نحنا شو بنحب اللعي , منضل ناغش وناغش وناغش , لنفطس بأفكارنا , شباب البنت نزلت خبر
حلو , انو يا عمي خلونا نطلع من دائرة التخلف الي اسمها جريمة الشرف , كتير منيح هالمشروع ومنشدد عليه
, ليش لتتناقشو هلأ بالدين , خلوه للدين عاجنب الله يستر عليكم جميعا , انو على الأقل شي كتير ايجابي
انو تنخفض جريمة الشرف من سنتين لهلأ , خلو الناس تتربى يا جماعة , العالم عم يسبقنا بأشواط
ونحنا لساتنا , على مين شاف مين ,,, ومين كان عم يتمشى مع مين , ويا حرام عليها ويا حرام عليه
منرجع لقصة انو أنا ما عم دافع عن حدا , بس خلونا بصلب الموضوع , وصدق سعدو فيما أتاه !