طبعا هالاسم غني عن التعريف وبيعبر عن حالو ... فهوي كل تصميم تم تنفيذو ليعلن عن :

شي بضاعة " مثل المأكولات والمشروبات والسيارات .... إلخ "
او شركة " كأي شركة بالعالم سواء قطاع عام او خاص سواء كانت بتنتج شي او بتبيعو أو حتى بتسوقو "
أو خدمة " مثل الخدمات التى بتتقدم للصالح العام أو حتى مقابل مادي "
او للمشاريع الصغيرة " حتى لو ( دكـــان صغير عم يعلن عن حالو ) "
وممكن كمان تكون عن أي شي تاني مالو هدف تجاري" مثل الاعلان عن تبرعات ... إلخ "
او حتى تعلن عن حالك عن طريق الكروت الشخصية فهي كمان بتعتبر نوع من الاعلان التجاري عن الشخص وكمان شو عميقدم
وبالمختصر هو كل تصميم يكون الهدف منه الاعلان عن شيئ ما ، وخطف الانظار اليه



أنواع الاعلان :

بتتعدد أنواعو وبتكتر يوم عن يوم وهنيك كتير من الافكار بس لابد انو ناخد بعين الاعتبار انو كل اعلان لازم انو نختار الو طريقة العرض المناسبة اللي منشوف انها رح تساعد على نشر اللي بدنا ياه او زيادة ارباح المنتج المعلن عنو وكمان نختار نوع الاعلان المناسب فى التكلفه
مثلا " منتج تكلفته 5 ليرات ومكسبو بالنسبه الي 8 ليرات وبدي طلع منو مليون قطعة يعني المربح 3 ملايين اجي اعملو اعلان بشي 5 مليون اي مو منطقية بالمرة .. واسمحلي قلك وقتها تضرب بهالراس من بين المصممين :p

رح اذكر انواع الاعلان اللي لساتني متذكرهن... من كترهن ماني متذكرهن كلهن لكن رح اعرض اللي متذكرو حالياً

اللافتات المكتوبه : وهى تصمم على الكمبيوتر وبعدين بيتم طبعها وشدها على شاسيه بمقاسات مطلوبه
وكمان اللافتات المضيئة
وكمان اللافتات الالكترونية وهي بتشتغل باجهزة الكترونية وبتكون اسعارها ناررر
وكمان الملصقات بجميع انواعها ال 4 لون او اللونين او حتى اللون الواحد تعتبر من انواع الاعلان التجاري
وكمان اللافتات المعلقه على العواميد وايضا بتتعلق على اساطيح البيوت و الابراج العالية
اعلانات المجلات والصحف والمجلات المتخصصه بالاعلان هى ايضا نوع من الانواع
هنيك كتير من الشركات اللى بتطلب من المصممين عمل مجلات خاصه بالشركة تعرض منتجاتها فيها
وكمان البروشور وهو عبارة عن ورقة مطوية صغيرة بتعرض فيها منتجاتك وممكن اسعارها كمان
واخيرا اعلانات التلفزيون


شغلات لازم ناخدها بالاعتبار لما منبدأ بتصميم إعلان
:

دراسة كيفية اختيار النوع المناسب من انواع الاعلان للشركة مثلاً ... كمان مناخد بالحسبان نقطة التكلفة
منحاول انو نحط فكرة للاعلان عن المنتج ويستحسن رسم الفكرة على ورق ابيض قبل البدء بالتنفيذ
منحاول انو نختار صور معبرة عن المنتج او السلعة او الخدمه وما نكتر استخدام الصور بالتصميم
كل تصميم لازم يكون فيه فكرة وتكون فكرة مفهومه مش بالنسبة الك بس ولكن بالنسبه لألاف بل ملايين من البشر اللي ممكن يشوفو هالاعلان
حاول انو يكون ذهنك فاضى ورايق كتير قبلما تبلش بالتصميم لأنك استحالة انو تنتج شي وانت غير صافي البال
شي كم باكيت دخان وابريق متة بيروقو البال ترى :lol:
في كتير ملاحظات بس رح اكتفي بهالملاحظات هي مع العلم انو هالملاحظات فكرية ونفسيهاما بالنسبة للملاحظات التقنيه رح نحكي عليها بعدين



*-*

التطبيق *-*



1- اختصر اللي فهمتو من الدرس بشي 3 نقط ... او بشرح موجز عن اللي فهمتو

2- خيو بضيعتك - ازا افترضنا انك صاحب مكتب دعاية واعلان واضرب واطرح ويا ارض اشتدي ما احدا قدي -

وكمان بفرض اني صاحب شركة للصناعات الغذائية وعرفت اني ناوي أطرح منتج جديد بالسوق وليكن نوع من انواع الزيت وانت نتعت هالبقجة شيتك وبوجهك عالشركة وعرفت شوية معلومات عن المنتجوهى كالتالى :

*قسم التسويق بالشركة ساوى دراسة جدوى توصلت هالدراسة إلى انو هالمنتج بيحتاج لتسويق عالي كتير ليكون منافس للمنتجات الشبيهه الو بالاسواق


* القسم المالى كمان ساوى دراسه وقرر انو الميزانيه المطروحه للدعايه لهالمنتج مانها اكتر من 100000 ليرة - مئة الف ليرة - ومن غير الممكن زيادة هالمبلغ نظرا لسوء الحالة المادية للشركة

بدي تقدملي عرض ودراسة جدوى ... بالمشرمحي تقنعني انا صاحب هالشركة بشي وسيلة اعلانية انت بتختارها بشرط انو ما تتعدى هالمبلغ المذكور وبنفس الوقت تكون ذات وصولية كبيرة للمستهلك مباشرةً

ملاحظة : ما عمنطلب منك اسعار ولكن بنظرتك ولفهمك للدرس كون بعض الخامات والادوات اللي بتساعدك بنشر المنتج وبنفس الوقت ما تكون غالية .

مرحبا ابو حميد ..

بدي تقدملي عرض ودراسة جدوى ... بالمشرمحي تقنعني انا صاحب هالشركة بشي وسيلة اعلانية انت بتختارها بشرط انو ما تتعدى هالمبلغ المذكور وبنفس الوقت تكون ذات وصولية كبيرة للمستهلك مباشرةً
اول شي .. زكاتك شرحلي هالنقطة ..
..
بالنسبة للشرح ..
بدك ياه يكون شرح نظري ولا بدك يكون معو شوية وسائل ايضاح؟
و100 ميرسي .. عم نتعبك معنا

1- اختصر اللي فهمتو من الدرس بشي 3 نقط ... او بشرح موجز عن اللي فهمتو

2- خيو بضيعتك - ازا افترضنا انك صاحب مكتب دعاية واعلان واضرب واطرح ويا ارض اشتدي ما احدا قدي -
الاولانية فهمتا انو نشرح اللي قريناه كتابيا ما؟
بس التانية اشرحلنا ياها بزكاتك
حمود ...وربي انسطلت خلص ابتدا الياس يتغلغل في دمي الله يوفقك حبيب لا تتاخر علينا
ووين بيكون التطبيق هون؟
وميرسي :D

بدي تقدملي عرض ودراسة جدوى ... بالمشرمحي تقنعني انا صاحب هالشركة بشي وسيلة اعلانية انت بتختارها بشرط انو ما تتعدى هالمبلغ المذكور وبنفس الوقت تكون ذات وصولية كبيرة للمستهلك مباشرةً





:sick::sick::sick:هاذي ما فهمتها كيف يعني :sick::sick::sick::sick:

مرحبا ابو حميد
اول شي فهمنا انو اهمية التصميم الاعلاني هي اللي بتحدد نجاح الاعلان وطريقة العمل عليه
وانو لازم المصمم يعرف اساسيات التصميم من نوع المنتج وصولا الى الالوان واكيد الفكره اهم شي

كمان اهم شي الباكيت مع الابريق :lol:



بخصوص التطبيق:

بما انو متل ماحكيت بضيعه وامكانية الشركه محدوده بــ 100000 وبما انك حاطط الجواب سلفا بانواع الاعلان بالبند الرابع والبند الثامن

بظن انو البروشور والملصقات بجميع انواعها لكن بطريقه تصميميه رائعه مع احترام المنتج والالوان كافيه لاعلان ينتشر ويو صل بسرعه للمعلن لهم (الاسواق والمستهلكين)
واكيد هالشي بيتناسب مع الميزانيه الضعيفه
تحياتي الك :D

مرحبا أستاذ ..

* السؤال الأول :
1. الإعلان تعبير وشرح عن سلعة ما، خدمة ما، شركة ما، مشروع ما أو شخص ما .. ولفت النظر ألو .
2. الإعلان أنواعو كتيرة ومتعددة منها مكتوبة ومضيئة والكترونية وملصقات واعلانات المجلات والجرايد والتلفزيون والبروشورات
3. دراسة تكلفة المشروع وانو نعرف منيح أنو إعلان هو الأنسب ويللي رح يستقطب زباين أكتر وأنو إعلان يكون معبّر أكتر عن الشي يللي عم نعلن عنو وهل يا ترى رح يفهموا الجماهير ماهية الإعلان وفكرتو ؟


* السؤال التاني :
خيّر صاحب الشركة بنوعين هني قليلي التكلفة و وبتوصل للجمهور مباشرة وأنسبهون للسعلة يللي هي زيت .

النوع الأول: رايجة كتير وهي طبع ملصقات حائطية تلصق بالشوارع العامة "وأكيد مو بأماكن مخصصة ألها لأن مافي أماكن مخصصة أصلاً للملصقات بسوريا :lol: " وهيك بتوصل للزباين المتوقّعين مباشرة وتكلفتون قليلة ما بين تصميم وطبع المطبوعات بلون أو لونين وبين سعر الصمغ يللي رح يلزق الملصقات وبين أجرة عمّال اللصق ، وكمان محاولة شرح نوع الزيت ومواصفاتو وهالأمور بالملصقات باعتبار في منافسين للسلعة بشان هيك ما رح يكون مجرّد إعلان عن شي جديد فـ لازم يكون تفاصيل أكتر من مجرد أنو زيت .

النوع التاني: دعاية عن طريق قلي بطاطا ! هلئ باعتبار ما تحدد زيت قلي وللا زيتون ولا غير .. فأفترضت زيت نباتي ، وتكون بقلي بطاطا أمام المارة بشي شارع أو شارعين عامين ، وتوزيع البطاطا وهي ساخنة بكرتونات صغيرة ليذوقوا طعم البطاطس الشهية بهل الزيت وطبعاً وقت بيعطي العامل البطاطا للزبون المتوقّع يقولّوا مواصفات السلعة بشكل بسيط وسريع "مثلاً: ترى البطاطا طعما كتير طيب وخفيفة الهضم وخالية من المواد المسرطنة والمؤذية وهيك .." وطبعاً الناس ما رح تمانع انو تأكل البطاطا الأكلة المحببة لدى الكل .. كمان لازم يكونوا العمال مرتبين ويكون في وراهون لافتة كبيرة وملفتة عن اسم الزيت وما هنالك ..
بالنسبة للتكاليف فـ رح يكون في مجموعتين كل مجموعة بشارع عام معين وبتتألف كل مجموعة من 3 أو 4 عمال للقلي والتوزيع والإعلان رح يكون ليوم واحد بس ، والتكاليف الاجمالية رح تكون ع الشكل التالي : تكاليف اللافتات يللي كبيرة نوعاً ما ، تكلفة الزيت المستهلك للقلي ، البطاطا "وتكون مقشرة ومقطّعة قبل النزول ع السوق" ، ملح ، إناء القلي وغاز ولواحق ، كراتين صغيرة ينحط فيون البطاطا وشوك بلاستيك صغيرة ، محارم ، أجار العمال وتدريبون شي بسيط "إذا ما كان بيعرفوا يقلوا مثلاً" ، اجار هوندايتين لنقل المعدات والعمال للسوق ومن السوق . وع فكرة كـ جمع للتكاليف الاجمالية فما رح تتعدى هالعملية الـ 100000 ، وهالطريقة بتحتك كتير بالجمهور وبعد ما يدوقوا البطاطا فنفسياً رح يحبّوا القصة ويشتروا من هالزيت .

وهيك عرضت على صاحب الشركة الخيارين وهو فيو يختار الأنسب ألو :pos:..
وبنستنى الأستاذ ورأيو ..

/ أستاااااذ عطيني عشرةةةةةة :cry:/

بعمل خطة بالمليون ليرة

يستفيد منها صحابين البقاليات بالضيعة . وتخلي بقلبهم جشع كل ماباعو أكتر من صنفي بيستفيدوا أكتر من العرض . وهيك بخلي كل البياعين يبيعوا صنفي بس ومايبيعوا التاني . ويمدحوا بنوع الزيت تبعي ومناقبو :larg: . طبعا بعد ماينشهر الصنف . بتتغير طريقة الدعاية

سلام عليكم ..

1

ممكن نلخص الدرس في ثلاث شغلات:
- الإعلان هو أحد الأنشطة اللي بتركز عليها أي مؤسسة ويعتبر إتصال غير شخصي بين المنتج والمستهلك
- الهدف من الإعلان الترويج والتعريف بشي سلعة معينة أو أي شي آخر قصد زيادة الطلب على المنتج ورفع المبيعات إلى مستوى محدد من الشركة.
- قبل إنزال الإعلان لازم تكون دراسة وافية على ها الإعلان ونراعي فيها
* إمكانيات المؤسسة المادية
* كلفة الإعلان اللي تكون متماشية مع مستوى المبيعات المحددة من المؤسسة
* منطقة إنزال الإعلان بحيث أن لازم نراعي طبيعة المستهلك وتفكيرو

2

بالنسبة لمنتوع الزيت أرى أن أفضل طريقة للإعلان هي البند الرابع والثامن لأن تكلفتهم أقل ويرجع أيضا إلى المنطقة اللي رح ينزل فيها الإعلان وهي الضيعة وهنا نشوف أن أهل الضيعة يتقبلوا الصور أكثر من أي شي آخر لدى راح أعرض على صاحب الشركة البند الرابع مع استعمال شوئ ألوان للفت انتباه المستهلك
وفينا نستعمل البند الثامن أي استعمال البروشور وتوزيعها على أصحاب المحلات اللي بدورها توزعها على المستهلكين.
أعطيني رايك نجحت ولا سقطت ....:sick::sick::sick:

طيب رح جاوب ع حسب ما فهمت


1* الاعلان عن شئ هو التعريف بمنتج معين ووصفه بطريقة ملفتة للانظار بحيث تثير المستهلك وتدفعهة الى معرفة المزيد عن هذا المنتج
2*انواع الاعلان بتعدد وبتتنوع ع حسب التكلفة في منا بروشورات لافتات اعلان تلفزيوني ع الراديو لافتات الكترونية... اعلانات الجرايد والصحف وغير ذلك .....
3* لانجاز لااعلان يجب احترام ما يحتويه المنتج وعلى ما يدل ومراعاة طلب الشركة المنتجة بدون ان ننسى الدقة في اختيار الالوان والتصميم المناسب وهذا طبعا يكون باختيار تكلفة معينة لا غالية ولا رخيصة يعني في المتناول لتجسيد الفكرة المناسبة


التطبيق :
انا بنصح رئيس هالشركة انو بالاول نحدد كمية معينة من الزيت ونوزعها ع عدد معين من التجار او المستهلكين بما انو هي ضيعة ففينا نتحكم بالبيدجيت مرافقة بملصقات اعلانية تيعلقوها بالدكاكين مع بروشورات اعلانية توضح المنتوج وبعدين منرجع نعمل جولة احصاء ومنشوف ازا الزيت حقق ربح يما لاء

ويارب نتوفق..

و منكم نستفيد
شكرا AHMAD على الدرس

مرحبا شباب .. منعتذر عالتاخير .. صار في شوية ظروف ..

المهم :
مرحبا ابو حميد ..

اول شي .. زكاتك شرحلي هالنقطة ..
..



هلا علوء...

بالنسبة لتوضيح النقطة .. بـ بساطة هي النقطة بترتكز على انك تعطيني طريقة لـ تقنع فيها صاحب هالشركة بانو يعلن عندك ووتفصلي هالطريقة بحيث انو تبين الوسائل اللي رح تتبعها بنشر إعلانو

اما بالنسبة لـ
بالنسبة للشرح ..
بدك ياه يكون شرح نظري ولا بدك يكون معو شوية وسائل ايضاح؟
و100 ميرسي .. عم نتعبك معنا

الشرح هوي بيكفي انو يكون نظري ... وازا حابب تحط شي وسائل إيضاحية مافي أي مشكلة .. الي بيريحك حبيب :D

الاولانية فهمتا انو نشرح اللي قريناه كتابيا ما؟


هلا ساريتا :D

الاولانية انو تلخيص للي فهمتيه من هالدرس كلو بـ 3 نقط .. انو اي مو شرح .. انما فيكي تقولي تلخيص بسيط جداً للي تم طرحو بالدرس ... وكتابياً اي ..

بس التانية اشرحلنا ياها بزكاتك

هي شرحتا لعلاء .. فوق تماماً .. ازا ما وضحت الفكرة .. احكيلي ... مشان وضحلك ياها اكتر قد ما بقدر...
حمود ...وربي انسطلت خلص ابتدا الياس يتغلغل في دمي الله يوفقك حبيب لا تتاخر علينا
ووين بيكون التطبيق هون؟
وميرسي ////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

له ساريتا :lol: لسا ما بلشنا ..
انو الدرس بسيط كتير .. ولو انو فيه حكي .. ومابدو تفكير الا بالنقطة التانية من التطبيق .. اكتبي شو بيطلع براسك انتي .. مو اكتر ...

والتطبيق اكيد رح يكون هون بهالموضوع على شكل رد متل باقي الشباب

ولا تواخزينا عالتاخير ...

وديريان :D

////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////هاذي ما فهمتها كيف يعني ////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

مراد هي شرحتا فوق .. ازا مافهمتا خبرني لاسترسل بالشرح اكتر :D

و منكم نستفيد
شكرا AHMAD على الدرس

اهلا وسهلا
------------------
محارب ... :sly: قعود عاقل :lol:

طيب ... الدرس التاني رح يكون يوم الخميس شباب...
والاربعا منعطيكن التقييم تبع هاد الدرس

:d

وديريان :D
يؤبش :p
ناطرينك مان :D

مممممممممم ..
انا بدي رد كونت من زمان .. بس المشكلة كل الشباب كتبو كل شي بدي قولو ..
وخصوصا سارة الهبلة .. المهم

انو خيو مرحبا يا صاحب الشركة ..
اول شي بدنا الزيت يكون متوافر بالسوق كتير ..
يعني مثلا بقترح عليك .. ومانك ملزم بهالشي .. بس هادا الحكي عسبيل الدعاية كمان ..
منفوت على محل ..
مناخد مساحة تكون مبينة .. وحلوة ..
منحط فيها رفّين تلاتة .. الزيت تبعنا ..
وطبعا مقابل هالشي .. منعملّو حسم للزلمي .. مثلا بياخد البضاعة المحطوطة عالرفوف.. بحسم 5%
الرفوف طبعا بدّا تكون ملوّنة .. بالوان متناسبة مع الرسمة اللي عالزيت ...
ومنحط هدول الشناشيل:o اللي بينزلو من السقف ..
يعني الفكرة تبعيتي ..
تكثيف الدعاية داخل المحلّات ..
طبعا برات المحل .. تركيزنا رح يكون خفيف عالتلفزيون .. بسبب المادية الخفيفة ..
رح تكون تركيزنا .. بالمحلّات وبالطرقات ..

وشكرا :lol:

انشالله ما ينحذف الرد . شنو خارج عن سياق الموضوع:oops:

هاموش :
رامي فكرتك التانية .. حلوة ومبتكرة .. بس انو بحياة ربك
وبعد ما يدوقوا البطاطا فنفسياً رح يحبّوا القصة ويشتروا من هالزيت
انتي بتفرق بين بطاطا مقلية بزيت .. وبطاطا مقلية بزيت تاني .. ما فاتت لمخي ..

هاموش الهاموش :
عم غش مشان الاستاذ يطلع عليي .. ويحطلي عشرة الي:p

وخصوصا سارة الهبلة .. المهم
دبدوب ما تحكي معي :cry:

1_
هلأ الاعلان متل ما فهمت ...
* هو تعريف بمنتح معين او شخص معين او مشاريع معينة .. ولفت النظر الها ..
*بيكون لفت النظر يعني الاعلان عنها بوسائل متعددة منها المرئية والمقروئة.. كـ الملصقات واللوحات الالكترونية في الشوارع واعلانات التلفزيون .واعلانات الجرائد .. او مسموعة .. متل الاعلانات يلي بتطلع بالراديو ...الخ
* كمان لازم ناخد التكلفة بعين الاعتبار .. ونبحبش عن طريقة الاعلان يلي بتتناسب مع تكلفة الشركة يلي عم نأعلن عن منتجاتها....

2_
التطبيق ....
هلأ انو رح اعرض عليه خيارين
خيار (1) : بما اننا بضيعة .. فا منوزع كميات قليلة من المنتج عالباعة والمستهلكين .. .. كـ دعاية .. حتى يجربوا نوع هالمنتج ويعجبهن منشان بعدين يشتروا هالمنتج .. وتكلفة هالعملية .. حسب الاوضاع .. ما بتتعدى 75.000 ليرة .. لأنو نحنا عم نوزع بعبوات صغير ة ومو كبيرة ...
الخيار(2) :
انو نعمل دعايات طرقية .. على عواميد الكهربا .. يلي بتكون بمنصف الشارع .. او ملصقات عالحيط ...

بس هالدعايات ما رح تكون عادية .. وبنفس الوقت ما حا تكون منتشرة بشكل كبير .. يعني نحنا حا نعمل دعاية محمسة للمستهلكين .. بمعنى انو نحط تاريخ مثلاً 9/1/2009 .. بعدين نحط اشارت اتسفهام وتعجب !! ؟؟
انو منشان يصير شكل المستهلك هيك :?
بعدي بفترة يعني وقت هالتاريخمنحط هالاعلان .. ومنحط فثيه مثلاً ولد او امرآة حلوة عم تاكل بطاطا .. بس اكيد ما لازم تكون هالشغلة بطريقة سخيفة .. ومنحط بعدها اسم الزيت ونوع المنتج ..
يعني بالنهاية الخيار التاني هوي بمبدأ تحميس المستهلك .. على انو يتعرف على هالمنتج الجديد ... وانا بفضل الاعلانات الطريقة لانو تكلفتها اقل من اعلانات عواميد الكهربا .. بس انو التنين ما بتوقع تجاوزهن لمبلغ الـ 100.000 ل.س

آسف استاز لاني متل العادة بتأخر عالدرس .... طبع .. مو بايدي الله وكيلك :p
شكراً استاز ..ناطرين العلامات .. :gem:

طيب ... الدرس التاني رح يكون يوم الخميس شباب...
والاربعا منعطيكن التقييم تبع هاد الدرس


....
شو واقفين مشان غزة ؟

شو واقفين مشان غزة ؟

لا بس مشلوش شوي .. طولو بالكن علينا هاليومين بس :D

لا بس مشلوش شوي .. طولو بالكن علينا هاليومين بس ////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

خدو راحتكن ..
نحنا بانتظاركن ..:D

نحن عمّالنا ننطر
بس عنجد التاخير افادني لاني كنت مشغولة حبتين ه اليومين

لا بس مشلوش شوي .. طولو بالكن علينا هاليومين بس :D
يومين وعشرة أضعاف كمان !
ليش كم أبو حميد عنا :lol:

سلامات .. لا تواخذونا نيمناكن بهالموضوع .. ورح نرجع نكفي من اليوم
رح اعطي هلئ التقييم الآخير
+
نوه لأنو موعد الدرس الجاية هوي يوم الثلاثاء أي بتاريخ 10/2/2009


LiOnHeArT.3LA2
6.5/10

3 حضور
2 مشاركة
1.5 قوة اقناع - هامش صغير : حدا قلك بدي اعمل بارتي انا :pos: ... هالعلامة القليلة الي اخدتها رح قلك ليش اخدتها .. لانو علوء الاقتراح الي حكيتو انت ممكن يتساوى وينجح بشكل كبير كتير كتير .. لكن هي مو من مهمتك كـ مكتب للدعاية والإعلان ...:) هي بتجي من مهمة الإدارة التنفيذية للشركة :)
so sorry man :(




saman
8.5/10

3 حضور
2 مشاركة
3.5 اقناع ... العلامة ونص طارو على فكرة انو بالاضافة للتوزيع ب 75000 ...

دعايات طرقية .. على عواميد الكهربا .. يلي بتكون بمنصف الشارع .. او ملصقات عالحيط ...

بس هالدعايات ما رح تكون عادية .. وبنفس الوقت ما حا تكون منتشرة بشكل كبير .. يعني نحنا حا نعمل دعاية محمسة للمستهلكين .. بمعنى انو نحط تاريخ مثلاً 9/1/2009 .. بعدين نحط اشارت اتسفهام وتعجب !! ؟؟


انو ما بتزبط .. بهالحال بدها تكلف بحدود ال 180 الف :?




Sarita
8/10

3 حضور
2 مشاركة
3 قوة اقناع




مررررررررررررراد
8/10

3 حضور
2 مشاركة
3 قوة اقناع :)





Syrian Gay
9/10

3حضور
2 مشاركة
4 قوة اقناع " ليش 4 مو 5 ؟ ... قابلية الاقناع قوية جداً لكن الشيء الي اقترحتو انت ما بيندرج تماماً تحت مسمى إعلان .. أي هو إعلان لكن كيف بدي اشرحلك ياها .. لا يندرج تماماً تحت مسمى إعلان فني . لهيك طايرة علامة :)




satoman
7/10

3 حضور
2 مشاركة
2 قوة بالاقناع " لا تشوف انو 2 قليل" هالـ 2 ما عمتاخدها من 10 انت ... عمتاخدها من 5 علامات متبقية .. :)





yamen_h

ابو نجبو

كلمة حب

يمان Rooooonaldo

YaSeR

suryoyo


:frown:

أي تساؤل - اعتراض - نقاش بما يخص هاد الدرس وتوزيع النتائج .. الموضوع مفتوح حتى موعد الدرس القادم أي 10 / 2 / 2009

:D

يسلّمن حبيب
وناطرين تكملة الدروس
موفق ... :D