السلام عليكم يا شباب وصبايا
مابعرف ليش سميت الموضوع هيك بس أعتقد أن ألو علاقه بالمطبات يللي بالشارع بس موضوعي مو عن المطبات يللي بالشارع بل بالمطبات اللي في حياتنا بس خليكون معي وما تطلعو من الصفحه تا حتى تعرفو عن شو أنا بحكي .......
المطب الأول
*********
علاقة المدّرس والتلميذه
************
مثلاً هيك طالبه حلوة فرفورة مراهقة عم تشوف مدرس الأنجليزي تبعها وسيم وشب صغير وحليوه دغري تعجب فيه وتتحول العلاقه من علاقة مدرس بتلميذه لعلاقة عشاق مع بعضهن والبنت تحاول وتبحبش وتحركش تاحتى تعرف رقم موبايل هالمدرس وتحاكيه في الليل على أساس أنها معجبة وبعد التليفون تبدأ تحكيلو بدي أقابلك وتتطور العلاقه أذا كان المدرس هاد أبن حرام يعلق مع البنت وهوب يا معليم يتزوجها عرفي من ورا أهلها وهوب تصير البنت حامل وهوب يطفش هالمدرس على أي دوله تانيه من غير ما حدا يعرف وتصير البنت في خبر كان وأديها أكلت مطب .

المطب الثاني
*********
روتين الحكومه
**********
مثلاً عمك الحج جارك هيك حولوه على المعاش من بعد ما خدم في الوظيفه يللي كان فيها طول عمرو وصرفوه منها بطريقه لا تليق فيه ولا بسنو وبعدو ضايلو أوراق بدو يخلصها من شان يصرف المعاش وكل يوم عمك الحج يطلع من بيتو عم يتسند على عكازو من شان يروح يخلص الأوراق ومن بعد ما يدق مشوار طويل ويوصل يضل منتظر بطابور طويل وأول ما يوصل للكاونتر يحكولو ( معلش حجي بس فوت علينا بكره بركي تكون خلصت أوراقك ) وتمر أيام وتعدي أيام وعمك الحج عم يروح ويجي نفس المشوار وبعدو ما خلصت أوراقو وهوب عمك الحج يتوفى وهوب الورثه يتابعو أوراق المعاش وبعدها ما خلصت وأديهن أكلو مطب .

المطب التالت
*********
الوظيفه
******
أيش ياعم أتخرجت بمجموع يخزي العين ما شاء الله ووين راح تشتغل ؟! راح تنتظر جواب التعيين طيب خلينا نستنى معاك بركي نشوف ألنا كمان يمكن يكون الجواب تبعنا يوصل ونضل ناطرين ياسيدي أسبوع شهر شهرين عم بتمر الأيام وبعدنا ناطرين مرت علينا 3 سنين وبعدنا منتظرين كمان صارو 7 سنين منتظرين أبوك داق خلقو منك بعدك قاعد بالدار لا شغله ولا مشغله فاتت 10 سنين وبعدنا منتظرين وهوب تطلع في دماغك تهاجر على أمريكا وهوب يجي ألك واحد أبن حرام ياخد المصاري اللي معك على أساس أنو يطلعك أمريكا وهوب تلاقي الفيزا مضروبه وهو اللزلمه اللي جابلك الفيزا ما ألو وجود وهوب تقعد تندب على حظك وتحط تراب على راسك وأديك يا حلو أكلت مطب .

المطب الرابع
*********
الزواج
******
وهادا يا أخوان مو مطب هادا أكبر مطب بيشل الحركه تماما بيبلش هالمطب كيف ؟ هالمطب عامل متل الثقب الأسود بيشدك ألو من غير ما تحس فيه مثلاً عمو أنت هيك ماشي بالشارع لا بك ولا عليك فجأه صبيه حلوة تخبط فيك على أساس أنها مو شافتك وأنت ماشي بس هاي ألاعيب يا ولدي وتبلش معاك بشي حدة طباع وأنت أكمنك شب جنتل عم تتأسف ألها وعشان هيه تخفف من حدة الموضوع تتبسم ألك أنت متل الحلو هيك تتبسم وتقع في شبكتها وتقوم تسألها أنت بتيجي هون دايماً هيه تحكيلك أيه أكيد أنت تحكي يعني أقدر أشوفك هون تاني هيه ترد عليك وتقول مو بعرف بس أن شاء الله وحضرتك كل يوم تمرق من الشارع من شان تشوفها وفجأه لما تشوفها هيه تتبسم ألك وأنت تبتسم أبتسامه عريضه جداً وبعدين أنت تطلب منها رقم الموبايل وهيه على طول تعطيك رقمها وتبلش هيه تعمل الك ميسد كول وأنت تشتري في بطاقات وتحكي وطول الليل تحاكيها وياليل ما أطولك وكلام مزوق وحلو وأشي بوسه على الموبايل وفي يوم تحكيلك بابا جايب ألي عريس وهو مافي لا عريس ولا من يحزنون مين أصلاً راح يتطلع ألها المهم أنت تعصب وتخنف وتبلش تحرق سجاير وتروح لأبوك وتقول ألو بابا أنا بدي أتزوج أبوك يتطلع فيك هيك بشي من الأستهزاء والقرف ويقولك أنت أصلاً عندك شغل ولا قادر تفتح بيت لحالك أنت تعصب أكتر وتروح تحكي لأمك أمك طبعاً قلبها حنين مو راح يهون عليها الجحش أقصد أبنها وتقوم أمك رايحه تبيع حتتين الدهب اللي حيلتها وهوب تلاقي حالك أتزوجت وهوب تلاقي أجالك أول مولود وهوب تكتر المشاكل وهوب تلاقيك قاعد في البلكون قرفان من مرتك ومن حياتك ومن البيت وعم تسب على اليوم اللي شوفتها فيه وأديك يا حلو أكلت مطب .

بس يا أخوان هاي مو كل المطبات هاي بس الأشياء اللي بنقابلها كل يوم في حياتنا وعم نعاني منها بس فيه بعد مطبات تانيه بس راح تطول الحكايه هيك وراح أترك ألكو المجال كل واحد يحط المطب اللي عم يشوفو في حياتو ومخنوق منو .
هاموش : أنا مو أعرف أذا كان الموضوع مكررولا شو بس أنا والله أجاتني الفكره أمبارح وأنا نايم قلت على طول لازم أكتبها ونشوف شو رأي الجهابذه هون

تحياتي يا حلوين !!
////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -/////////////// (////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////)