-
دخول

عرض كامل الموضوع : مجلس الشعب يقر قانون تخفيض مدة خدمة العلم من 24 شهرا ً إلى 21 شهرا ً..

ابو ريتا
09/10/2008, 12:13
دمشق ..
تعديل المادة /3/ من المرسوم التشريعي /30/ لعام 2007 المتضمن قانون خدمة العلم كان العنوان الأبرز لنقاشات مجلس الشعب في جلسته التي عقدت مساء أمس برئاسة الدكتور محمود الأبرش رئيس المجلس بحضور وزير الصحة الدكتور ماهر الحسامي ووزير الكهرباء الدكتور أحمد قصي كيالي حيث تمت مناقشة مشروع القانون والذي تقضي المادة الأولى منه بتعديل المادة المذكورة بحيث تصبح مدة الخدمة الإلزامية واحد وعشرين شهرا ً تبدأ من تاريخ سوق المكلفين من المناطق التجنيدية إلى معسكرات السوق وتنتهي في اليوم الأول من الشهر الذي يلي تاريخ انقضائها وتعد الأيام الزائدة عن الواحد وعشرين شهرا ً خدمة إلزامية باستثناء المكلفين الذين لم ينجحوا في الصف الخامس من مرحلة التعليم الأساسي وما دون فتبقى مدة الخدمة الإلزامية أربع وعشرين شهرا ً ونصت المادة الثانية على أن ينشر هذا القانون في الجريدة الرسمية ويعتبر نافذا ً من تاريخ 1 / 1 / 2009وبعد ذلك تم إقرار المشروع وأصبح قانونا ً وجاء في الأسباب الموجبة لهذا القانون أنه لما كانت القيادة العامة للجيش والقوات المسلحة تولي اهتمامها الكامل بالمكلفين بالخدمة الإلزامية من كافة النواحي ومعالجة أوضاعهم بما فيها مدة الخدمة الإلزامية طالت أم قصرت والتأكد من تناسبها مع ظروفهم وفقا ً للهدف والغاية منها وتماشيا ً لمصلحة القوات المسلحة فقد ارتأت تخفيض مدة الخدمة الإلزامية للمكلفين السوريين ومن في حكمهم المشمولين بأحكام المادة المذكورة مع الأخذ بعين الاعتبار المؤهل الثقافي ودرجة التحصيل العلمي .وتساءل عدد من الأعضاء عن أثر تخفيض المدة على البدل النقدي كما عبروا عن الدور الكبير للقانون في القضاء على الأمية وأوضح فجر عيسى رئيس لجنة الأمن القومي في مجلس الشعب بأنه لم يتم تحديد أي تخفيض في قيمة البدل النقدي كما أوضح أن المكلفين الذي هم في الخدمة حاليا ًو قضوا فيها مدة 21 شهرا ً لغاية 1/1/2009 سوف ينطبق عليهم القانون .
////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////













شام برس (////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////):larg:
بنفسجة
09/10/2008, 12:15
مبروووووووووووووووووووووو ووووووووك
وعقبال ماتصير سنة ونص بيكون احلا واحليين
VivaSyria
09/10/2008, 12:17
لك الله 3 شهور تخفيض دفعة وحدة؟؟؟ ليش هيك كتير جايين على حالون؟ ومجلس شعب ومرسوم؟؟ انو بفرد مرة ما يعملو مؤتمر قطري للحزب مشان يقروا هالتخفيض الخطير...

بشرفي تسالي.
بنفسجة
09/10/2008, 12:18
لك الله 3 شهور تخفيض دفعة وحدة؟؟؟ ليش هيك كتير جايين على حالون؟ ومجلس شعب ومرسوم؟؟ انو بفرد مرة ما يعملو مؤتمر قطري للحزب مشان يقروا هالتخفيض الخطير...

بشرفي تسالي.
شو يلي تسالي بالموضوع؟
ابو ريتا
09/10/2008, 12:20
لك الله 3 شهور تخفيض دفعة وحدة؟؟؟ ليش هيك كتير جايين على حالون؟ ومجلس شعب ومرسوم؟؟ انو بفرد مرة ما يعملو مؤتمر قطري للحزب مشان يقروا هالتخفيض الخطير...

بشرفي تسالي.
بس بتتذكر قديش كانت الخدمة ، سنتين ونص وهلأ سنة وتسع شهور والبدل خفضوا ، صحيح انو هاد كلو اجى بفترة زمنية بطيئة ، بس المشكلة انو نحنا لا بيعجبنا العجب ولا الصيام برجب .:larg:
VivaSyria
09/10/2008, 12:24
شو يلي تسالي بالموضوع؟

التسالي انو الجيش يلي ما حارب من 35 سنة لازم يلتغى مو تتنقص مدة الخدمه فيه 3 شهور... احكيلك عن جيشنا أما ما في داعي؟؟ الجيش يلي ماعمل شي طول هالسنين غير استنزاف لموارد البلد وسرقات ونهب وفوق كل هاد بيسرقو أحلى سنين من عمر الشب...لك عالقليلة يعملوه 12 شهر وزياده بيكون عليه...

الله ستر يلي ما كنا متل أميركا فاتحين 3 جبهات حروب وناشرين جيشنا بكل الأرض كنا عملنا الخدمة الالزامية 45 سنه...

برجع بقلك تسالي
VivaSyria
09/10/2008, 12:29
بس بتتذكر قديش كانت الخدمة ، سنتين ونص وهلأ سنة وتسع شهور والبدل خفضوا ، صحيح انو هاد كلو اجى بفترة زمنية بطيئة ، بس المشكلة انو نحنا لا بيعجبنا العجب ولا الصيام برجب

اي والله يا أبو ريتا شعبنا مفتق كتير ونقاق كمان.. ماعم يستوعب انو كل قرار بدو عشر سنين ليطلع.. انو الغريب ليش القرارت الغلط تاخدت بسرعه كتير وقرارات إصلاح هالبلاوي على أقل من مهلون...

أنا بقلك السر هنن بيخافو الشعب ما يستوعب.. حتى خدمة الجيش بينزلوها بالتنقيط... بتعرف شعبنا مابيلبقلو الدلال المفاجئ.
butterfly
09/10/2008, 12:31
لك هني ما يخفضو الوقت ويعملو عسكرية متل الناس ..
يعني مو ذل لهالشباب
وودفع رشاوي
اللي بيكون متعلم كلمتين بيطلع نسيانن من العسكرية
ابو ريتا
09/10/2008, 12:33
التسالي انو الجيش يلي ما حارب من 35 سنة لازم يلتغى مو تتنقص مدة الخدمه فيه 3 شهور... احكيلك عن جيشنا أما ما في داعي؟؟ الجيش يلي ماعمل شي طول هالسنين غير استنزاف لموارد البلد وسرقات ونهب وفوق كل هاد بيسرقو أحلى سنين من عمر الشب...لك عالقليلة يعملوه 12 شهر وزياده بيكون عليه...

الله ستر يلي ما كنا متل أميركا فاتحين 3 جبهات حروب وناشرين جيشنا بكل الأرض كنا عملنا الخدمة الالزامية 45 سنه...

برجع بقلك تسالي
بس كلامك مو مظبوط ، وإسرائيل شو قاعدة عم تسوي ، يعني عاكلامك
بيطبّق عالأردن أو السعودية .:larg:
ابو ريتا
09/10/2008, 12:38
اي والله يا أبو ريتا شعبنا مفتق كتير ونقاق كمان.. ماعم يستوعب انو كل قرار بدو عشر سنين ليطلع.. انو الغريب ليش القرارت الغلط تاخدت بسرعه كتير وقرارات إصلاح هالبلاوي على أقل من مهلون...

أنا بقلك السر هنن بيخافو الشعب ما يستوعب.. حتى خدمة الجيش بينزلوها بالتنقيط... بتعرف شعبنا مابيلبقلو الدلال المفاجئ.
هيك شوي صعبة المناقشة ، أنا ماعندي حجج واجهك فيها ، وكلامك بيشمل كل شي بيتعلق بسوريا ، يعني صار الموضوع كبير كتير ، سيدي في عالم كتير رضيانة بالواقع وبدها بس لقمة عيشها ، عم أرجع اتذكر التاريخ العثماني ، أخخ .:larg:
VivaSyria
09/10/2008, 12:40
بس كلامك مو مظبوط ، وإسرائيل شو قاعدة عم تسوي ، يعني عاكلامك
بيطبّق عالأردن أو السعودية .:larg:

لك يلعن رب إسرائيل برجلي.. لسا كل شي اسرائيل... عمي سؤال ايمت أخر مره حاربنا اسرائيل؟؟ سؤال التاني مدة الخدمة الالزامية ارتفعت من سنة لسنتين ونص بمرسوم وبعشر دقايق.. ليش عم تتخفض بالتنقيط؟؟؟ سؤال تالت اسرائيل المسؤولة عن الفساد بالجيش.. يلي صرلو من أيام مصطفى طلاس لليوم؟؟؟ اسرائيل عم تقلون سرقو موارد الجيش وعمرو قصور وفلل؟؟؟ اسرائيل يلي عم تقلون خدو مصاري من العسكر وفيشون؟؟؟ اسرائيل يلي عم تقلون لعنو ربون لهالشباب؟؟؟ اسرائيل عم تقلون عيشيون عالبرغل سنتين العسكرية؟؟؟ اسرائيل عم تقول ذلوهن وهينيهون؟؟؟ لك هالشي ماعد عم يصير بجيش بالأرض غير بجيشنا...

بشرفي هالموضوع تحديداً بيضربلي عالعصب ... انو جيشنا تحديداً يلي هو رمز لكرامتنا وسيادتنا لعنو ربو... خلصنا دخيلك
Reemi
09/10/2008, 12:43
كتير معذبين حالون ...شو تلت شهور؟
شم ولا ادوق يعني ... شو عم يعملو الشباب بهالجيش غير عم تتوقف حياتون عالفاضي وتتكسر نفسياتهون والي بيسوا والي ما بيسوا يتمقطع فيهن!

بس لو بايدي :sly:
souriana
09/10/2008, 12:44
على ما يبدو في عالم انمحت من ذاكرتها انو في 14 الف جندي سوري استشهدوا بلبنان
على كل خطوة كتير مليحة وعقبال ما تصير سنة
VivaSyria
09/10/2008, 12:50
على ما يبدو في عالم انمحت من ذاكرتها انو في 14 الف جندي سوري استشهدوا بلبنان
على كل خطوة كتير مليحة وعقبال ما تصير سنة

شو رأيك توجه حكيك ليلي مقصود فيه بدون طريقة في عالم وفي واحد مارق بالشارع....

14 ألف شهيد بيبررو سرقة الجيش؟؟؟ بيبرروا سرقة مصطفى طلاس وولاده للجيش 30 سنة؟؟؟ احكيلك عن مجموعة ماس الاقتصادية وانجازات فراس طلاس بالمرتديلا؟؟ احكيلك عن ثروات قادة الفرق وقادة الألوية عنا؟؟ لك احكيلك عن رتبة عقيد ومافوق؟؟؟ احكيلك عن 70% من موازنة البلد كانت عم تروح لوزارة الدفاع ولليوم العسكري عنا بيلبسوه كل فردة بوط شكل.... احكيلك عن العسكري عنا يلي كل همو يأمن بالشهر 10 تالاف ليرة لمعلمو مشان يقعد بالبيت؟؟

لك أخ بس انو ايمت بدنا نصير صادقين مع حالنا مابعرف...
almurtaja
09/10/2008, 13:13
على ما يبدو في عالم انمحت من ذاكرتها انو في 14 الف جندي سوري استشهدوا بلبنان
على كل خطوة كتير مليحة وعقبال ما تصير سنة :D :D

هيك الظاهر يا حبيب تناسوا :jakoush:

بعدين ليش مننسى انو اسرائيل دولة توسعية ولا كمان هاد الحكي تأليف الحكومة عنا :larg:
almurtaja
09/10/2008, 13:23
شو رأيك توجه حكيك ليلي مقصود فيه بدون طريقة في عالم وفي واحد مارق بالشارع....

14 ألف شهيد بيبررو سرقة الجيش؟؟؟ بيبرروا سرقة مصطفى طلاس وولاده للجيش 30 سنة؟؟؟ احكيلك عن مجموعة ماس الاقتصادية وانجازات فراس طلاس بالمرتديلا؟؟ احكيلك عن ثروات قادة الفرق وقادة الألوية عنا؟؟ لك احكيلك عن رتبة عقيد ومافوق؟؟؟ احكيلك عن 70% من موازنة البلد كانت عم تروح لوزارة الدفاع ولليوم العسكري عنا بيلبسوه كل فردة بوط شكل.... احكيلك عن العسكري عنا يلي كل همو يأمن بالشهر 10 تالاف ليرة لمعلمو مشان يقعد بالبيت؟؟

لك أخ بس انو ايمت بدنا نصير صادقين مع حالنا مابعرف...

هي مو قصة انو مانا صادقين مع حالنا يا ابن العم نحنا مانا عمننفي السرقات والنهب الخيالي اللي عميصير بالجيش وبرات الجيش ونحنا أول العالم منطالب بالمحاسبة اللي ما عمتصير لهلق بس على أمل انو تصير المهم هالحكي كلوا ما بيلغي انو لازم يكون الدعم كبير للجيش بس اذا الضابط اللي هو بالنهاية مواطن مو فارقة معولا الجيش ولا العسكري ولا البلد ولا ابن البلد شو بدنا نحكي :jakoush:

موضوع عدم المحاسبة عنا غصة بقلبي الله وكيلك :sick:
Reemi
09/10/2008, 13:25
لازم يكون الدعم كبير للجيش

للجيش .. مو لجيبات ضباط الجيش !
فسحة أمل
09/10/2008, 13:29
أنا برأيي أنو العسكرية لازم تكون بس سنة لن بعد الدورة الي مدتها 6 شهور بيقعد الشب يعد أيام لتخلص عسكريتو لا شغلة ولا عملة , بعدين اوفر اقتصادياً للدولة .
MadMax
09/10/2008, 13:50
لك هني ما يخفضو الوقت ويعملو عسكرية متل الناس ..

يعني مو ذل لهالشباب
وودفع رشاوي
اللي بيكون متعلم كلمتين بيطلع نسيانن من العسكرية




معك حق مرسيل ..
الأهم أنو يهتموا بأوضاع المجندين ... قبل التفكير بتقصير المدة
خاصة أنو مدة الخدمة بتدخّل فيها عدة أمور و و عدة اعتبارات

لأنو جيشنا معظموا من المجندين ... مو من المتطوعين ( المحترفين )
يعني تخفيض 3 أشهر من المدة .... بيعني إخراج 1\8 من المجندين أو 1\9 من الجيش ككل .... خارج الخدمة
و هادا ما بصير يكون قرار اعتباطي

يعني ممكن هالقانون .... يكون بالاساس عبارة عن قرار لتخفيض عدد القوات المسلحة .... بس بشكل ما يثير التساؤلات
almurtaja
09/10/2008, 20:49
معك حق مرسيل ..
الأهم أنو يهتموا بأوضاع المجندين ... قبل التفكير بتقصير المدة
خاصة أنو مدة الخدمة بتدخّل فيها عدة أمور و و عدة اعتبارات

لأنو جيشنا معظموا من المجندين ... مو من المتطوعين ( المحترفين )
يعني تخفيض 3 أشهر من المدة .... بيعني إخراج 1\8 من المجندين أو 1\9 من الجيش ككل .... خارج الخدمة
و هادا ما بصير يكون قرار اعتباطي

يعني ممكن هالقانون .... يكون بالاساس عبارة عن قرار لتخفيض عدد القوات المسلحة .... بس بشكل ما يثير التساؤلات

كلامك سليم تماما بس يا حبيب الدعم موجود للمجندين وبشكل كبير بس عتبك على اللي بوصلون حقون يعني الضباط عنا ببيعوا مخصصات المجندين بالسوق و بضبوا المصاري بجيبتون و ياعسكري دبر راسك :jakoush:

منرجع للمشكلة الأكبر الموجودة عنا هي عدم المحاسبة اللي بتخالي العالم تطمع بزيادة :x
بنفسجة
11/10/2008, 00:42
انو غريب اذا بنكون مش راضين على تصرفات ضباط الجيش نقوم نطلب حل الجيش
وانو لما جيش مابيحارب نروح نطلب حلو
جد انا احيانا بفكر كيف الناس بتقيس الامور
مستقلين كتير بتلات شهور تخفيض
هلق بنحكي انو في كتير فساد بالجيش بس هاد ما بيعني انو نلغيه
في كتير فساد بالدولة بس هاد ما بيعني انو نلغي كيان هالدولة
بنحاول نصلح
والاصلاح ما بيكون بحل الجيش
انا بعتبرو كلام بالهوى
Abu ToNi
11/10/2008, 00:58
وشو مشان طلاب الجامعة اللي خدموا المعسكرين التدريبيين شقد صارت ؟!
بنفسجة
11/10/2008, 01:02
وشو مشان طلاب الجامعة اللي خدموا المعسكرين التدريبيين شقد صارت ؟!

حسب ما حسبلي ياها احدهم
سنة وتلات شهور على ذمته ها:lol:
Abu ToNi
11/10/2008, 01:28
المعسكرين لا لا انا ماني محشش لهي الدرجة .. انه بعد الساعة 1 ما بيفصل القاطع عندي لهي المرحلة بس من فترة صار لخبصة بهي القصة شي بقولوا لنا كل معسكر بقلل من العسكرية 3 اشهر يعني المعسكرين = 6 اشهر تخفيض وبمعنى آخر العسكرية للجامعي سنة ونص
شي بقولوا لنا انه المعسكر بخفص من العسكرية قيمة ايامه
يعني المعسكر الاول مدته 15 يوم
والتاني 15 يوم
صاروا شهر وبتصير عسكرية الطالب 23 شهر ب 24
فهلق بعد ما صار الوضع هيك ضرب الحامي على البارد وفصل القاطع عندي نظامي
:larg:
بنفسجة
11/10/2008, 01:34
بسيطة مانها القصة معقدة
روح عاشعبة التجنيد واسال
TheLight
11/10/2008, 01:51
أنا اكره بيع الوطنيات وبائعي الوطنيات....:sly:
أم الجود
25/08/2009, 13:33
يا جماعة اليوم سمعت خبر تازا و حابة أتأكد منو ..

هل صحيح انو طلع مرسوم لغى حكاية دفع البدل لجماعة الخدمات الثابتة !!؟
I_Love_Syria
25/08/2009, 14:05
يا جماعة اليوم سمعت خبر تازا و حابة أتأكد منو ..

هل صحيح انو طلع مرسوم لغى حكاية دفع البدل لجماعة الخدمات الثابتة !!؟

الله يبشرك بالخير على هالخبرية

إن شا الله ماتكون مزبوطة
وردة حماة
25/08/2009, 14:59
هلأ بس خفضوا 3 شهور وما خفضو البدل

ما استفدنا شي...