مُواطِنون درجة أولى وَ ثانية وَ ثالثة وَ رابعة

أطباء وَ مُهندسون .. فلاحون

الطبقة العامِلة وَ المؤقتة وَ الدائِمة

مُلاك أراضي وَ عقارات .. بورجوازيون !

صِغار كَسَـبة , عُشـاق وَ أنصاف عُشـاق

أناسٌ بـِ أشـكالهم المُتعددة الشُـقر وَ السُـمر , طفيليون وَ غيرهم ..

كُل هذهِ الشَـرائح الجَميلة في بلادي باتَ شُـغلها الشاغل بعدَ ان ارتاحت مِن تعريفِ العولمة

هوَ امتلاك " سيارة " !

و لإنجاز هذا الحُلم الشـرق أوسَـطي

أوجدنا مَدارس لتعليم قيادة السَـيارات وَ باتت مَصدراً وَ طنيا ً رهيبا ً !

بعدَ أنْ أصيبَ مُجتمعنا بـِ الهِيسـتيريا الجَماعية لـِ تحقيق هذا الحُلم

. . . " السيارة " . . .

فعجّت المَصارف بـِ المُراجعين وَ الحالمين بـِ الحُرية !

وَ كُلما أُدخِلَتْ سَـيارة جَديدة لـِ شـوارعنا العَريضة جداً

كُلما خسِـرنا جزءاً مِن مَسـاحة شَـوارعنا المَشـغولة سَلفاً

ما يحدثُ يا سادة في هذا المُجتمع الرشيق شَيءٌ يُشـبه ُ تماماً مَرض " الهسـتيريا الجَماعية "

فـَ صَديقي أبو سارة الذي كانَ مَشغولاً بـِ مُحاربة الرذيلة وَ الإنتهازية وَ الإرهاب أيضاً !

يُمضي حَديثه ُ اليومي مَعي هذهِ الأيام في تعدادِ مزايا السَـيارة وَ استخداماتها الخفية !

مُوجهاً حديثه ُ وَ نصائحه ُ دائماً نحوي كَوني " غشيم "

وَ لا ينسى أحمد بيك هذا المُنسق اللطيف أيضاً أن يُعلمني جوهر الحُرية التي جاءتْ بها سيارتهُ " الجوهرة "

وَ يشـرحُ لي أيضاً بـِ اعتباري " لا أفهم "

" تخيل يا أبو النور قيمة أن تذهب إلى أيِّ مكان يخطر في بالك في أي وقت

دونَ أن تأكل هَمَ المواصلات "

وَ الآخر أبو سارة يتابع موافقاً بـِ هزة رأس بـِ عبارتهِ المُشـهورة

" وَ الله يا أبو النور ما كنا عايشـين أيام ما كان عنا سَـيارة "

وَ كلما ازدادَ عَددُ المُصابين بـِ الهسـتيريا الجَماعية

كلما انتفخت بطون تـُجار السَـيارات في بلادي وَ أغلقت بطونهم شَـوارعنا


وَ حتى لا يظن أحدٌ ما , أني أتكلمُ من موقع ِ الحَسـود أو من منطق عين ضيقة لا سَـمَحَ الله

أقولُ لكم اشـتروا ما تشتهون الله يزيد وَ يبارك يارب

لكن لي رجاء وحيد !

وَ هو أن لا تغلقوا يوماً شُـرفتي وَ مَدخلَ بيتي المُتواضع بـِ سَـياراتكم الفخمَة يا " أوادم "

فـَ صَديقي أبو سارة الذي كانَ مَشغولاً بـِ مُحاربة الرذيلة وَ الإنتهازية وَ الإرهاب أيضاً !

يُمضي حَديثه ُ اليومي مَعي هذهِ الأيام في تعدادِ مزايا السَـيارة وَ استخداماتها الخفية !


أحياناً بحس أخلاق أبو سارة أقرب إلى الملائكة من البشر :lol:

المهم أبو النور هلأ شو بدك يعني؟؟ اذا بدنا نجي لعندك نصف السيارة بالحارة التانيه؟:frown:

هلأ يلي بيقلك انو عندو سيارة ومو مروق بيكون كذاب :pos:
هوي صحيح نحنا بعيلتنا .. يعني افراد اسرتي ما عنا سيارة ... بس لما يركب حضرتي مع شي حدا بسيارتو .... يا اخي مو معقول اديش بتحس حالك مروق ... بتحس حالك عايش بحياة الرفاهية ولو كانت هي الحياة مؤقتة :sosweet:

وبنفس الوقت بتحس باحساس الارستقراطيين ... او البرجوازيين ... يعني حتى لو كنت اشتراكي او شيوعي او يساري .... (الكل بيؤدوا لمعنى واحد تقريباً ) .... بتحس انك عايش حياة غير ... غير حياة بالفعل ولو كانت هالحياة للحظات .....:ss:

يعني مثلاً انا بحب اطلع كتيير على قاسيون .. اذا بدي استنى هاد وهداك لياخدني بسيارتو .. اي ما بطلع بحياتي ... اما لما يكون عندي سيارة بتلاقيني يمكن ... كل يوم سهران هونيك :cry:

حتى الحلم يلي منتمناه من لما كنا صغار ولهلأ ... انو بس لنكبر ... منتخيل حالنا قاعدين بهالسيارة ومسافرين من قرنة لقرنة .. ومنتخيل انو عنا هديك الفيلا الشبيهة بقصور الملوك والامراء ...... وطبعاً هاد مجرد حلم .. وعالاغلب ما رح يتحقق .... :cry:(وانا لهلأ بتخيل هاد التخيل .. مع اني عم اكبر وما عم يتغير شي بحياتي من الناحية المادية _تقريباً_):frown:

اما عن قصة المدارس .. فهشي .. رح يطيرلي عقلي .. عنجد هيستيريا ... يعني بتشوف وحدة فصعونة لسا ما فقست عنا البيضة ...:jakoush:
وين رايحة حبيبتي ؟؟....:pos:

والله على مدرسة السواقة !!! :?

مع انو بيجوز مافي غير سيارة وحدة عندهن بالبيت .. وسيارة معتة كمان ... عم تنتع ... بس هيك صاير الكبير والصغير والمأمط بالسرير بدو يتعلم السواقة !!! :frown:

هلأ بالنسبة لالي بحلم انو يكون عندي سيارة .. بس اذا ما عندي .. خير انشالله ... من شو بتشكي السيارات الصفر يلي بيقولولها تكسي ... يلي بالبلد !!! :sly:


سيدي ... الله يثبت علينا العقل والدين .... :gem:
ويحمي سيارة ابو سارة .. وسيارة أحمد بيك بالمعية :lol:


صحيح أبو النور .. انا متخيل انو عندك سيارة ... شو ما عندك سيارة ؟؟ :?
منشان هيك غيران !!؟:p



:D

انو يا عزيزي .. لم احلم يوما بهذه العلبة الكرتوينة المسماة سيارة ..

لماسا .. لانو ما بحب احلم وآكل خازوق مبشّم بآخر حياتي ..

على فكرة عم قول علبة كرتونية .. لانو ما بحب اتعلم .. ولا اعرف شوفي بقلب سيارة

غير ما يكون بجيبتي في حق سيارة ..

القناعة كنز لا يغنّي :D\

ليش السيارات بالله.....
يعني أبو النور....
من شو بيشكي الحذاء.....
اقتصادي أكتر.....
صحي... صديق للبيئة....أغلبو صناعة وطنية...ما بدو لا تزييت ولا تشحيم ... ووين ما كان بتصفو...ما بدو ضريبة رفاهية ولا بدو تجديد ميكانيك والشي الأهم مابدو حزام أمان ولا طفاية ولا عدة صحية ولا شهادة سواقة...
وخصوصي أنو نحنا بعصر ديموقراطية الأحذية

....ليس من باب الصدفة ان يحدث كل هذا
فللحقيقة والتاريخ...جارنا رجل دين كان يتحدث عن مزايا المغفرة ودهستو سيارة
وصديقي الشيوعي كان يتحدث عن التطورية المادية وارتباطها بالتاريخ دهستو سيارة وصار جزء من التاريخ
وكمان محمود افندي موظف بالداخلية دهستو سيارة....وابن جارتنا طالب جامعي في قسم هندسة الميكانيك دهستو سيارة
وكل هولي صاروا حديث المجالس وكيف فعصتهن السيارة وما حدا جاب سيرة مواصفات السيارة ولا نوعها...ايه نحنا شعوب مافي عنا بالمجالس شي محرز نحكي عنه وقاتلنا البريستيج والاتكيت من ايام حاتم الطائي والبغل اخوها للسيارة........وحتى في بعض الدول العربية ازا بتحكي في هيك موضوع بتيجي سيارة وبتخطفك للمعتقل...يالطيف شو بتبكي قصة السيارة وشو حلو طرحك للموضوع!

الله يرحم أيام السيارة :cry:

لك شو ماكانت ها لو إنا طرطيرة بس بتقضي غرض

هلأ هي السيارة بحد ذاتها يعني شغلة منيحة ..و منيحة كتير ...فظيعة قد ما منيحة .!!

أنو هالاختراع اللي بخليك تمشي بسرعة 160 كيلومتر و انت ساند ضهرك و عم تدخن سيجارة و تسعم غنية أو نشرة أخبار !!! ..اي ما حدا يقلي أنو السيارة شغلة عاطلة ...بزعل منو


السيار بحد ذاتها ما فيها أي عيب طبعاً اذا غضينا النظر عن حجم التلوث البيئي الناتج عن النشاطات اللازمة و المرافقة لتشغيل السيارات .

من حيث المبدأ و بنظرة للواقع منشوف أنو قدرة شخص ما لا على التعيين بالعالم على امتلاك سيارة بتتعلق بانتاجيتو كفرد بالنسبة للناتج القومي , مثلاً بالصين انتاجية الفرد بالمتوسط حوالي 2000 دولا سنوياً ( تقسيم اجمالي الناتج القومي على عدد السكان ) , و عدد السيارات الخاصة بالصين حوالي 11 مليون و نص سيارة و بمعدل 9 سيارة لكل 1000 بني ادم !!!

الولايات المنتحرة الامريكية متوسط انتاجية الفرد بتطلع شي 44000 دولار بالسنة , و عدد السيارات الخاصة شي 137 مليون سيارة !!!!! يعني تقريبا لكل 1000 بني ادم 450 سيارة !

هلأ هيك الأمور بسيطة و منطقية ...بس هي ما هيك !

بدون شك أنو بالصين في اكتر بكتير من 12 مليون شخص بيقدرو من ناحية مادية يشتروا سيارات , بس هني ما بيشتروا ..أو بالأحرى هني عملياً ما بيقدرو يشتروا .

امتلاك سيارة هو شي مختلف عن امكانية تأمين سعر السيارة أو القدرة على دفع أقساط السيارة , وهيك عادةً يعني , عالمياً بقصد .

عالمياً كل واحد عندو سيارة بدو وقود , و الوقود غالي ..و بيغلا ..و رح يغلا و يغلا و يغلا !!..

كل واحد عندو سيارة بدو يدفع ليكون عندو شوارع بيمشي فيها ..و هالشي بكون عن طريق ضرايب TAX عالية بتنفرض ع تسجيل السيارات أو عن طريق رسوم مباشرة متل رسوم التعرفة المرورية المطبقة بدبي TOLL SYSTEM .

عالمياً كمان , كل واحد عندو سيارة لازم يدفع تكلفة صيانة البيئة , يعني اذا انت عم تركب سيارة فأنت مسؤول عن ضرر عم يلحق بالبيئة بمراحل تصنيع و تشغيل السيارة و انت و بس انت ما حدا غيرك لازم يدفع تمن هالشي , لأنو ما معقول أنت تسوق سيارة و الناس تنضف وراك ببلاش !
طبغا الضريبة اللي بتنفرض ع الصانع بتتحول للزبون كجزء من تكاليف الانتاج , و الضريبة ع الوقود جزء منها بكون متعلق بالبيئة , و ضريبة التشغيل بتندفع بشكل تصاعدي حسب عمر السيارة و نوع الوقود ..الخ

طبعا الى جانب كل هالتكاليف في تكاليف الصيانة و السلامة ..الصيانة الدورية و غيرها ( الاطارات , المكابح , الزيوت , سوائل التبريد , مانعات التجمد ..الخ ) , و في غسيل السيارة مثلاً , و رسوم المواقف , و رسوم التأمين ضد السرقة أو الحوادث.

هلأ هي باختصار شو هيي الاعباء اللي لازم و المفروض انو يتحملها مالكي السيارات . , منجي للوضع عنا بالبلد و منشوف أنو فعلأ في كتير أعباء مزاحة عن كتف مالكي السيارات , و اللي عم يدفع هني بقية الناس ّ!!

كم واحد بيدفع رسوم مواقف مثلاً ؟
كم واحد بيدفع رسوم طريق ؟
كم واحد بيهتم بصيانة سيارتو ع الاصول للتطابق معايير السلامة و البيئة ؟
هل فعلاً مالكي السيارات عم يتحملوا سعر الوقود الحقيقي ؟ ولا عم ياخدو الوقود بسعر مدعوم ؟
غسيل السيارة ..أي أي الغسيل ..و ما حدا يتبسم منوب ..ما تلاترباع العالم بتغسل سياراتها بمية الشرب !! ..المي المخصصة لشرب المواطن ما لغسيل السيارات , اللي بدو يغسل سيارتو لازم يروح ع مغسلة عندها مي مكررة للغسيل و بيدفع , مافي شي ببلاش !!
بالنسبة للبيئة بتصور الرسوم بين ال 600 لل 4000 ليرة حسب عمر السيارة ,و هاد ما مبلغ منوب !! شو 600 ليرة !! ولا شو ال 4000 !!! لسيارة موديل ال 1973 !!

أنا رأيي و بتمنى ما حدا يزعل مني ..أنو لازم يكون في رسوم حقيقية ع السيارات , و أنا ماني عم أحكي ع الجمارك , هي ما دخلنا فيها , عم أحكي عن السيارة نفسها شو عم تستهلك من البيئة و المحيط و شو تكلفة هالاستهلاك , من ناحية الشوارغ , المواقف , التلوث , الوقود , السلامة . و الى اخره .. هي المسائل مكلفة و المستفيد هو اللي لازم يدفع و اذا بيتطبق هالشي للواقع عنا منفهم ليش بالصين مافي لهلأ غير شي 12 مليون سيارة ,و منفهم أنو الجماعة ما قادرين يدفعو تكاليف سيارات متل ما كتير ناس مالكة سيارات عنا بسوريا و هني ما قادرين يدفعوا الكلفة الحقيقية لسياراتهن ..و بالنهاية ما كل واحد معو 400000 ليرة صار فينو يشتري سيارة حتى لو عملياً كان مشتري السيارة و عم يشفط كمان !!

و تحياتي

كم واحد بيدفع رسوم مواقف مثلاً ؟
كم واحد بيدفع رسوم طريق ؟
كم واحد بيهتم بصيانة سيارتو ع الاصول للتطابق معايير السلامة و البيئة ؟
هل فعلاً مالكي السيارات عم يتحملوا سعر الوقود الحقيقي ؟ ولا عم ياخدو الوقود بسعر مدعوم ؟
غسيل السيارة ..أي أي الغسيل ..و ما حدا يتبسم منوب ..ما تلاترباع العالم بتغسل سياراتها بمية الشرب !! ..المي المخصصة لشرب المواطن ما لغسيل السيارات , اللي بدو يغسل سيارتو لازم يروح ع مغسلة عندها مي مكررة للغسيل و بيدفع , مافي شي ببلاش !!
بالنسبة للبيئة بتصور الرسوم بين ال 600 لل 4000 ليرة حسب عمر السيارة ,و هاد ما مبلغ منوب !! شو 600 ليرة !! ولا شو ال 4000 !!! لسيارة موديل ال 1973 !!

أنا رأيي و بتمنى ما حدا يزعل مني ..أنو لازم يكون في رسوم حقيقية ع السيارات , و أنا ماني عم أحكي ع الجمارك , هي ما دخلنا فيها , عم أحكي عن السيارة نفسها شو عم تستهلك من البيئة و المحيط و شو تكلفة هالاستهلاك , من ناحية الشوارغ , المواقف , التلوث , الوقود , السلامة . و الى اخره .. هي المسائل مكلفة و المستفيد هو اللي لازم يدفع و اذا بيتطبق هالشي للواقع عنا منفهم ليش بالصين مافي لهلأ غير شي 12 مليون سيارة ,و منفهم أنو الجماعة ما قادرين يدفعو تكاليف سيارات متل ما كتير ناس مالكة سيارات عنا بسوريا و هني ما قادرين يدفعوا الكلفة الحقيقية لسياراتهن ..و بالنهاية ما كل واحد معو 400000 ليرة صار فينو يشتري سيارة حتى لو عملياً كان مشتري السيارة و عم يشفط كمان !!


حكي نظيف.. جدا جزيلا


على عيني أب نهلة الغالي :D

بالنسبة للبيئة بتصور الرسوم بين ال 600 لل 4000 ليرة حسب عمر السيارة ,و هاد ما مبلغ منوب !! شو 600 ليرة !! ولا شو ال 4000 !!! لسيارة موديل ال 1973 !!
كلام كتير حلو ..... و مبارح كنا بهالسيرة ..
بس يا ترى ...شو عم تستفيد البيئة من هالـ600 ليرة ( خليني احكي بالحد الادنى )..؟؟
شو عم تعمل الدولة بهالأموال يللي عم تجنيها من كل هالضرائب

دمشق صارت من أكتر مدن العالم تلوث .. أذا مو الاكتر عالاطلاق ..
يعني تصور بتكون واقف تحت جبل قاسيون .. بس ما بتقدر تشوفو من ضباب دخنة السيارات

أنا شايف أنو الضرايب مو هي الحل الامثل لهيك قصص
خاصة انها صارت ذريعة ..لتشليح المواطن ....
و كملت مع القانون الجديد يللي وصلت فيه ضريبة بعض السيارات لأكتر من 150 الف ليرة بالسنة


هادا اذا ما حكينا بضريبة الرفاهية ..و ضريبة الزفت ..... حدا سمعان بضريبة للزفت ..؟؟
مع انو الزفت بكل شي بحياتنا ... الا بالطريق ...:sick:

هلئ انو العالم عم تدفع ضرايب اي اوك

كلو عم يدفع ضرايب و مخالفات ومدري شو

يعني كل سنة عندك ترسيم ومن هالترسيم في ضريبة بيئة

وضريبة مازوت وضريبة علاك

بس انو ما عم يصير تحسن


انو العالم عم تدفع بس ما عم يصير شي جديد

كلمالا الطرق عم تصير اديق

والزحمة عم تزيد والدخان عم يكتر


يعني هلئ مين عم يركب بمحروقات مدعومة غير سيارات الدولة

وين في مي صالحة للشرب وعم تنغسل فيها السيارات غير بالمزة

وأحل شي بالهستيريا . لما بتنصب بموديلات وأنواع معينة كل فترة

وبيقولولك مامنتفق على شي :lol:

نقاشك للموضوع اكتر من رائع يا hashnash
بس بدك مين يفهم هيك كلام
ويطبقو .. وما يتهمك بالرجعية

لكن لي رجاء وحيد !

وَ هو أن لا تغلقوا يوماً شُـرفتي وَ مَدخلَ بيتي المُتواضع بـِ سَـياراتكم الفخمَة يا " أوادم "

بضم صوتي لصوتك .......لما برجع ع البيت ما بدي ضل برعب انو يمكن اضرب بسيارة من الغراض العاتلتون وتطلع اجرة التعويض براسي