مرحبا شباب وعذرا للغيبة بسبب بعض الظروف
اليوم كان أول نهار بشوف في قناة سوريا الجديدة وهي قناة معارضة
تبث عبر الهوتبيرد
البرامج جيدة ونشرة الاخبار المحلية أعجبتني
ما بعرف إذا حدا منكن شافها وشو رأيكن فيها؟
وهل وجود قناة للمعارضة السورية شيء جيد أم لا؟
أتمنى أن نتحاور بالموضوع

أهلا فاوست...

شوف حبيب في نقطة أول شي أنا مابسمي هي القناة معارضة على اعتبار انها بإدارة وتمويل عبد الحليم وابتو المستثمر المحترم جهاد... يعني يلي بدو يفتح ملفات فساد وبدو يحكي بالشفافية والديمقراطية ياريت يبلش بيحالو ويحكيلنا عن تاريخو كجزء من هالسلطة لمدة 40 سنة...

كتقييم عام للمحطة انا شفت انو لسا مو مستقرة امورن منيح وعلى مايبدو الكادر الحالي يفتقر للخبرة وفي مشاكل تقنيه كبيره عندون.. بس للحقيقة موضوع نشرة الأخبار المحلية عجبني يعني على أمل انو يكون رادع شوي لجماعة السلطه انو صار في مين عم يفضح مصايبون يلي عم يعملوها بالبلد...

كمان نقطه: حسيت بصياعة الأخبار في صيغة طائفية بغيضة لاتمت الى الوطنية بصلة ومانا غريبة على خدام... بحكم انو يلي سرق بلدو وكان شريك بالفساد 40 سنة ممكن يستغل أي شي لتحقيق أهدافه الدنيئة.

مرة تانيه المعارضة مابتتشرف بواحد متل عبد الحليم خدام انو ينحسب عليها

وهل وجود قناة للمعارضة السورية شيء جيد أم لا؟

قناة للمعارضة السورية؟ ليش من ايمت فينا نجمع "المعارضة السورية" و نحكي عنها ككيان واحد؟

هاي قناة خدام.. و زمرة المرتزقة اللي حوالي خدام.. لا تمثل المعارضة السورية و أرفض بشكل قاطع انو ينعطى لهالواطي شرف تمثيل المعارضة السورية.. هو مجرم و لص و سافل و لا يقل سفالة عمّن يدّعي انه يعارضهم.. هو كان شريكهم في السابق.. و شراكتهم انتهت لتغيّر المصالح و فقط..

تلاقي انو هو و زمرتو دائما يحكو عن وحدة المعارضة و ينتقدو اعلان دمشق و معارضة الداخل على رفضها التعامل معهم.. و تلاقيهم حاطين صور عارف دليلة و صور ميشيل كيلو و يعلكو باسمهم.. لما ما يطلعلهون.. اذا دوّرنا بالانترنت بنلاقي تصريحات خدام حول اعتقالات ربيع دمشق (كان نائب رئيس جمهورية .. و كان يحكي عن عارف دليلة و زملائه بانهم "مجرمين" و "خونة" و "عملاء")..

مافي تيار سياسي اسمو "معارضة".. انما في مشارب فكرية و اتجاهات سياسية متباينة فيما بينها بقدر تباينها مع السلطة.. و هاد مانو شي سلبي... هاد الأمر الصحيح و السليم..

طبعا في الجملة السابقة خدام و قيادة الاخوان مانهون محسوبين.. هدول سماسرة قضية و شلة انتهازيين من الطراز المقرف.. قيادة الاخوان حاملة قميص عثمان بقضية جريمة حماه .. لكن شوفهم تحالفو مع اللي كان محافظ حماه لما انقصفت و تدمرت و تذبحو أهلها.. هاد أمر كتير بيحكي عن أهمية جريمة حماه بالنسبة الهون..

بالعودة للقناة... عم يستثمر مصاريو... عفوا.. مصارينا... تمويل هالقناة انسرق من جيوبنا متلها متل الآي أن أن بالضبط ..

أعيد و أكرر رفضي لأنو هالقناة تعتبر "قناة المعارضة" و أرفض و أندد باعتبارهم يمثلون المعارضة حتى و لو جزئيا...

للعلم أنو القناة الجديدة تمويلها الكامل من السعودية
وجريدة المدار من حوالي أربعة شهور حطت الخبر تبع تمويل الفضائية المعارضة الجديدة وحتى حطت رقم الشيك يللي قدمتو السعودية لخدام "مدري كم مليون دولار" ..و انشاءالله اذا لاقيت الخبر بالأرشيف تبع الجريدة رح حطوا هون

يعني عم بينفضحوا هدول بعض المعارضين يوم بعد يوم وعم تنكشف ولاءتن ..
كيف ممكن أنو الشعب السوري يوثق فيهن أو بأخبارن اذا كانو هني أدوات بأيد النظام السعودي.. وعم بيشتغلوا لحساب الملك السعودي والحريري

هلق سؤال اب جمال و اب دريد صارو معارضة هههههههههههههههههههههههه

يعني شي بيضحك نسي حالو اب جمال

و صفقة النفايات يلي انكبت بتدمر

معارضة على شو و مشان شو

بس سؤال

يعني هالقناة شو عما تطالب

و شكرا

يعني عم بينفضحوا هدول بعض المعارضين يوم بعد يوم وعم تنكشف ولاءتن .. كمان مرة هدول مو معارضين... وياريت ماتحكي بطريقة "المعارضين عم تنكشف ولاءاتن" المعارضة يلي انت عم تحكي عنها يلي لحد الأن مانها منطوية تحت لواء واحد "ياستثناء اللص خدام وجماعته لأنو لايمت للمعارضة ولا للوطنية بصلة.. هي المعارضة عبارة عن مثقفين وشباب وطنيين و وطنيتهن مو ناطره تقييم من حدا ولا اثبات أو شهادة من حدا..

ونصيحة مشانك: لا تسوق كتير بقصة السعودية وفلم التخوين هاد لأنو بكرا بيتصالحو معها وبيرجعو بينزلو السعودية وملكها من عند الله "متل قطر وفرنسا...

شوية منطق بس

لن اقتنع بقناة يكون عبد الحليم خدام طرفاً فيها

لن اقتنع بقناة يكون عبد الحليم خدام طرفاً فيها
ولا انا ............

يسعدكون وعن المزابل يبعدكون عند الصبح
الدبانة ما بتحط على علبة العطر , وين بتروح ؟ على المزبلة , والمزبلة شو بتعطي؟ صح بتعطي ريحة مقرفة , وخاصة إذا كانت المزبلة بعيدة كتيييييير عن الشمس وما بتحب الشمس ,يالطيف شو بتكون ريحتها مقرفة , وأكبر إهانة لسوريا وللسوريين , وللناس اللي رح يخسروا شباب عمرون بالسجون , انّو تكون هيك مزابل أسمها معارضة سورية
أنا بقترح نشوف لهالناس هدول اسم تاني مشان ما ندنس أسماء كتير ناس نحن منحترمها ونحبها ومنقدرها ولك منجّلها كمان , وشو رايكون هيك ناس نسقط عنها على الأقل بين بعضنا الجنسية السورية , يعني ممكن تكون اسمها المعارضة ............ هيك شي اسم بيشبهون والصبح لسا المخ بارد رغم أنو الحرارة فوق الأربعين
وكل إناء ينضح بما فيه

بعيدا عن رأيي الرافض للقنوات المعارضة

انا ما شفتا لسا... بس استغربت من الكلام ...انها لخدام ومدري شو

سبب الاستغراب انو عم يوصل عالموبايلات رسايل اعلانات لهالقناة وانو الافتتاح يوم الاحد ومدري شو
والرسالة بدون رقم عم توصل باسم نيو سيريا


:?:jakoush:

بعيدا عن رأيي الرافض للقنوات المعارضة

انا ما شفتا لسا... بس استغربت من الكلام ...انها لخدام ومدري شو

سبب الاستغراب انو عم يوصل عالموبايلات رسايل اعلانات لهالقناة وانو الافتتاح يوم الاحد ومدري شو
والرسالة بدون رقم عم توصل باسم نيو سيريا


:?:jakoush:

دمشق - وكالة (آكي) الإيطالية للأنباء
بدأت الأحد قناة (سورية الجديدة) الفضائية المعارضة بثها الرسمي بعد أيام من البث التجريبي، وهي تهدف بشكل أساسي إلى "فضح جرائم النظام السوري" وفق لبيان إطلاق القناة.
واستقبل آلاف السوريين في الداخل رسائل قصيرة عبر هواتفهم المحمولة تدعوهم إلى متابعة انطلاقة القناة وتقدم لهم معلومات عن كيفية التقاط بثها والتردد الأثيري الذي يحمله، دون أن تربطهم بالقناة أو مالكيها أي علاقة أو معرفة، وكانت هذه الرسائل مفاجئة بالنسبة للسوريين كون المحطة معارضة للنظام، في الوقت الذي قال فيه خبراء أن هذه الرسائل يتم بثها "بشكل عشوائي" إلى آلاف أرقام الهواتف في سورية.



هي الخبر اللي جابتو اخبار الشرق عن قصة الرسائل القصيرة

بس اللي عجبني اكتر الشي قصة انو دون أن تربطهم بالقناة أو مالكيها أي علاقة أو معرفة، ذكرتني بقصة المظاهرات والمسيرات العفوية في دولة المخابرات الاسدية

يعني شلون بدكن هيك معارضة تخرط مشط الشعب وهي عم تستخدم نفس اساليب النظام الوسخة

الاتنين اوسخ من بعض

أنا لم أقصد بقولي للمعارضة السورية أن المعارضة كيان واحد متجانس لا أبداً
لكن المحطة ومنذ بداياتها أعلنت هذا بانها لجميع المعارضين
ام عن مالكها ومن هو؟فلا يهمني صراحة وأعتبره كما يقول الإسلاميين تائب وكفر عن ذنب؟طالما القناة ليست بهدف تمجيد شخص بعينه خلاصة ما سأقوله أنا مع المحطة ومع فكرة وجود محطة لن أقول للمعارضة إنما تنقل أخبار المعارضة وتتحدث عنها وعن ما يجري بسوريا إلى حد الان ما تحدثوا عنه لم يكن في إساءة لأحد هذا ما رأيته لكني لا أستطيع ان أحكم حكماً نهائي حالياً أحتاج لأشاهد المحطة أكثر وبعدها يأتي حكمي

أتمنى من الشباب يلي ما شافو المحطة أن يشاهدوها ويعطو رأيهم فيها هنا

على القمر الأوروبي "هوت بورد" على التردد 12149 عمودي.

بالبداية اكيد متل ما قالو الشبابخدام واشباهو صارو (معارضة) بعد ما شبعو من مركزون القديم وصار بدون مركز اعلى
فلهيك برجع بطلب متل ما طلبت مرة من زمان بخبر قديم
لما الواحد يحكي انو المعارضة السورية عملت هيك او بدها تعمل كذا
بس يحط بالعنوان انو يا معارضة
هيدا تمييز كتير ضروري
من شان مثلا ما يصيرو الاخوان شيوعية... او العكس

فكرة فتح قناة الها خط سياسي تاني غير الحكومة بعتبرها اكيد خطوة ايجابية ولو انو كمان فيها خطورة لما بتصير مجرد منبع جديد للاخبار الكاذبة... بس هيدا اكيد افضل من سيطرة اعلام واحد

بس كمان اكيد ما بتامل ايا خير من قناة خدام ولا قناة الاخوان
لانو خطابون السياسي طائفي بالدرجة الاولى
ولا همون لا وطن ولا سورية حرة وانما تغير مصالح وولاءات وشو ممكن ينهشو من جديد
وبيستغلو الناحية الطائفية لانو هيدا الموضوع صاير سبحانو محبوب من الشعوب العربية يعني شو بيصير بسنة الهونولولو بياخد تاييد من سنة العرب وشو بيصير بشيعة الواق واق بتفاعل معو شيعة العرب شو بيصير بمسيحية اوروبا بيتفاعل معها مسيحية العرب ولسا بيقولو شعب واحد امة واحدة ولغة واحدة
يعني الله يجيرنا

والرسالة بدون رقم عم توصل باسم نيو سيريا



ايييه الله يرحم ايامو هدا نيو سيريا .. فوت واتضحك

بالنسبة للقناة .. ما بتصور رح تكون احسن من ال ANN

ما بقدر احكي عليها .. لاني ما شفتا