-
عرض كامل الموضوع : عرب يحملون جنسيات اسرائيليه (عرب 48)
jevara_asa
18/08/2008, 01:37
هل اجدادهم مذنبون لبقائهم في بيوتهم بالرغم من فرض الهويات الاسرائيليه عليهم ؟
ما رايكم بالدروز الذين فرض عليهم الخدمه المدنيه في اسرائيل وقبلوها بشكل او باخر؟ (طبعا هناك بعض من الدروز يرفضون بشكل قاطع الخدمه المدنيه).
هل التخلي عن عروبتهم حل للعيش بكرامه في "بلادهم"؟
هل هم حياتهم افضل من حياة عربي تحت حكم عربي ؟
من أراد العيش هناك فعليه التماشي.. و إلا فهم منبوذون منبوذون ...
العروبة "أتكيتة" قديمة ... ماعد لزقت ..
كمان مرة
من أراد العيش .. فعليه التماشي
Sun Shine Art
18/08/2008, 06:58
لم يملكوا الكثير من الخيارت في الحياه.......
بتلك الفتره كان الموت على الحدين ....
بتصور النبذ كان من الطرفين ...اما عن الدروز ...لا نستطيع ان نحكم على الظروف الي عايشينها ...
العروبه .؟؟؟ مو اول شي ليكون في عروبه عند باقي الاخوهالعرب بعدين نحكي ونحاكم غيرنا ..
مـا بعرف ازا بحقللي جاوب ع الاسئلة بما اني من عرب ال 48 ..لان يمكن اسئلتك موجهة اكتر للعرب بالدول العربية ..
لكن ما قدرتش امنع حالي عن اني اجاوب:
هل اجدادهم مذنبون لبقائهم في بيوتهم بالرغم من فرض الهويات الاسرائيليه عليهم
والله انا عن نفسي فخورة باجدادي انهن ضلوا وانو اعطوني الفرصة اعيش بهالارض واتنفس هواها واندفن فيها لأنو ما الي تراب وولا سما وولا بحر غيرها.. واعتقد انو كل عرب ال 48 بتفقوا معي =)
ما رايكم بالدروز الذين فرض عليهم الخدمه المدنيه في اسرائيل وقبلوها بشكل او باخر؟ (طبعا هناك بعض من الدروز يرفضون بشكل قاطع الخدمه المدنيه).
بتعلق ازا هالدرزي عم يأديها بكل حب ووطنية لاسرائيل أم عم يأديها رغما عنو..يعني هو كيف حاسس من جوة..بالمجمل عندي تحفظات على هالنقطة!
هل التخلي عن عروبتهم حل للعيش بكرامه في "بلادهم"؟
كنت بفضل لو كان السؤال "التخلي عن هويتهم القومية".. لانو العروبة والعرب ما عم يجينا منهن اشي..
لأ طبعا العنصرية موجودة بكل مكان ان تخليت عن قوميتك ودينك او لا..يعني خد ع سبيل المتال الدروز اللي بيخدموا بالجيش وبكون عندهن انتماء قوي جدا لاسرائيل..حسب رأيك ما بتتعامل معهن الدولة بعنصرية؟!!!..بالعكس يمكن المسلم اللي ما بخدم عايش احسن من الدرزي اللي خدم..حاج نضحك ع حالنا العنصرية موجودة موجودة حتى لو بست ايديهن ..ولما نتخلى عن تاريخنا اكتر واكتر مش رح نعيش بكرامة بالعكس رح يطلّعوا علينا باحتقار اكتر!
هل هم حياتهم افضل من حياة عربي تحت حكم عربي ؟
هلأ ازا شلت مسالة العنصرية..وجيت ع مسألة حرية التعبير والتظاهر والتصويت..الى آخره..اعتقد انو عايشين بنعمة! ..يعني كمان الانسان لازم يحكي بعـدل =)
من أراد العيش .. فعليه التماشي
ممكـن توضح فكرة التماشي اكتر وتعرفلي ياها..لانو عم تختلط عليي الامور..هل التماشي هو التخلي عن قوميتنا؟..والاندماج الى درجة الذوبان وطمس الهوية بمجتمع الاكثرية؟
بعتقد ما يطلع لناس كتير يحكو عن عرب الـ 48 .. خصوصي الجماعة اللي متعنطزين ببيوتهون و عم يتفلسفو ع هالناس انو و الله كان لازم يهاجرو و كان لازم و كان لازم... لأ كان لازم بالأحرى انت تتفهم الوضع و تشوفو بواقعية بدل الفلسفة الفارغة
هاي أرضهون و هاي بيوتهون... و اذا استطاعو يثبتو بمكانهم رغم كل اللي صار فهاد مدعاة فخر و ليس العكس كما ينّظر البعض... و هنن لليوم رغم صعوبة هالأمر محافظين على هويتهم الخاصة (ارميلي العروبة ع جنب.... هاي شغلة العرب... يطالبو باثبات العروبة للمزنوق و للمعذب.. ما بيطالبو حالهم ببلادهم و بين آبار بترولهم) و عندهم انجاز كبير و هو انو لسى في طابع فلسطيني داخل الخط الأخضر مهما حاولو الاسرائيليين يطمسوه...
عرب الـ 48 يستحقون كل دعم -معنوي على الأقل- و تشجيع .. و المفروض باقي الدول تكون أكثر تفهما معهم و أكثر دعما لهم...
Marooshe
18/08/2008, 16:34
بما اني من عرب ال48.... ومعي جنسية اسرائيلية رح اعطي وجهة نظري بالموضوع...
هل اجدادهم مذنبون لبقائهم في بيوتهم بالرغم من فرض الهويات الاسرائيليه عليهم ؟
طبعا لاء...
اكيد نحنا مش مذنبين لانو بقينا في بيوتنا ورفضنا نتخلى عن ارضنا ونتركلون كلشي ونمشي... وحتى لو معي هوية اسرائيلية انا لساتني عربية وعربية حتى العظام كمان ولايوم الهوية الزرقا الاسرائيلية خلت هشي يتزعزع عندي... بعدين فرضا انو كنا تركنا بيوتنا وهاجرنا او نزحنا على شي دولة... شو رح نصفي مجرد شي مش مرغوب فيو مش اكتر... يعني حضرات المتفلسفين عن عرب ال 48 وين ما كانو انو شو كانو بيقترحو عليهن يعملو مثلا؟؟؟
ما رايكم بالدروز الذين فرض عليهم الخدمه المدنيه في اسرائيل وقبلوها بشكل او باخر؟ (طبعا هناك بعض من الدروز يرفضون بشكل قاطع الخدمه المدنيه).
هون ما بعرف شو بدي قول... لاني مابدي اجرح حدا... ومع احترامي لكل اصحابي الدروز... بس انا كتير بستحقر هشي... جد كتير...
ومتل ما انذكر في عم يصير حالات يلي فيها الدروز مش عم يخدمو جيش بس هي حالات قليلة للاسف...
ومشان اعطي رايي الشخصي وما اظلم حدا بقول... انو لوكنت شب درزي كان بيشرفني انسجن تلات شهور مشان ما اتخلى عن مبادئي وعن عروبتي ومشان ماحارب لبنانية ومشان ما اقصف فلسطينية... وبعمري ما كنت بروح اخدم بجيش هجر عيلتي وقتل اجدادي وكان مسؤول عن قتل وتشريد الي ما بينعدو...
هل التخلي عن عروبتهم حل للعيش بكرامه في "بلادهم"؟
بعمري ماكنت بحاجة للتخلي عن عروبتي وعن مبادئي حتى عيش بكرامة هون في بلادي وعلى ارضي... دايما كنت قول اني عربية ودايما كنت صرح عن مواقفي السياسية وين ماكنت ويلي عندو مشكلة معي هي مشكلتو مو مشكلتي...
وعدا عن هيك اليوم فينا نشتغل ونتعلم ونبني مستقبلنا بدون ما نمسح جوخ لحدا... لانو الدولة في القالب ديموقراطية وما بتقدر تتحكم بكل شي... وكمان لانو العرب هون شريحة لا يستهان فيها ومضطرين يراعوهن ويراعو احتياجاتهن ولانو ازا ما راعو هشي الاقتصاد الاسرائيلي بيتضرر على عدة اصعدة...
هل هم حياتهم افضل من حياة عربي تحت حكم عربي ؟
مافيي جاوب على السؤال لاني ماجربت العيشة بدولة عربية فكتير صعب انو الواحد يحكم... فيي لخص هشي بانو كلو اضرب من بعضو...
بس ازا بدي قول هيك رايي وبصراحة...
ازا بدي اتمنى كون بدولة عربية... بس لانو مابدي موت بحسرتي وانا عم احلم يكون عندي وطن....
بس من الجهة الاخرى انا بشوف انو الحريات الفردية كتير مقموعة بالدول العربية... والعيشة فيها كتير صعبة بس طبعا اي شي بالدنيا عندو ميزان سلبيات وايجابيات...
هل اجدادهم مذنبون لبقائهم في بيوتهم بالرغم من فرض الهويات الاسرائيليه عليهم ؟
ما رايكم بالدروز الذين فرض عليهم الخدمه المدنيه في اسرائيل وقبلوها بشكل او باخر؟ (طبعا هناك بعض من الدروز يرفضون بشكل قاطع الخدمه المدنيه).
هل التخلي عن عروبتهم حل للعيش بكرامه في "بلادهم"؟
هل هم حياتهم افضل من حياة عربي تحت حكم عربي ؟
1 اجدادون عملو برايي الشي الصح .......الواحد ما لازم يترك ارضو ... اتخيلو فلسطين كلها غرباء ما فيها فلسطيني اصيل!!!!!
2 شغلة العمل مع الاسرائيلية شوي معقدة .... يعني قسم منون اتعامل بشكل كامل معون وقسم لا .. نفسيا ما قادرة اتقبل هيك شخص حتى الان... بس ما بيحق لحدا يحكم ع حدا ما بيعرف شو ظرفو وشو وضعو لما عمل هيك ..
3 العروبة ؟؟؟ بتقدرو اتذكروني شو تعريف العروبة ؟؟؟ احيانا بسالوني اذا انا عربية .. بفضل قول عن حالي سورية هيك امان اكتر .... بتوقع انو العروبة اتخلت عن كتار واتشوه معناها لهيك ما كتير تاكل هم اذا راحت العروبة ولا لا..
بس بتوقع انو هيدا ما رح يأدي لانو يعيشو بكرامة اكيد.... لانو العنصرية اولا واخيرا مسيطرة بين اليهود نفسون بين شرقيين وغربيين فكيف بالناس العرب هونيك؟
4 اذا اقدرنا انو نشيل العنصرية بتوقع الجواب اي للاسف ...الجكومة الاسرائيلية سعت تعمل لنفسها صورة الدولة الديمقراطية ضمن وسط طافح بالديكتاتورية ونوعا ما نجحت بهالشي وللاسف عزمي بشارة عكس هيك خالة انو ليكو عم يزور دول تعتبر معادية للدولة وبيحكي كلام مباشر ضدها ... ومع ذلك ضل وقت منيح لبعد ما ترك الكنيست لصدرة بحقو مجموعة اجراءات تعسفية .. حدا قادر بعطيني مثال عن هيك حالة بايا دولة عربية؟؟؟؟
يعني اذا كانت حياتون كتير سيئة فهيي متلها متل حياة الشعوب العربية ..... واذا كانت سيئة بس فبتكون احسن من حياتون ..!!!! مجرد راي ...
jevara_asa
19/08/2008, 01:03
4 اذا اقدرنا انو نشيل العنصرية بتوقع الجواب اي للاسف ...الجكومة الاسرائيلية سعت تعمل لنفسها صورة الدولة الديمقراطية ضمن وسط طافح بالديكتاتورية ونوعا ما نجحت بهالشي وللاسف عزمي بشارة عكس هيك خالة انو ليكو عم يزور دول تعتبر معادية للدولة وبيحكي كلام مباشر ضدها ... ومع ذلك ضل وقت منيح لبعد ما ترك الكنيست لصدرة بحقو مجموعة اجراءات تعسفية .. حدا قادر بعطيني مثال عن هيك حالة بايا دولة عربية؟؟؟؟
يعني اذا كانت حياتون كتير سيئة فهيي متلها متل حياة الشعوب العربية ..... واذا كانت سيئة بس فبتكون احسن من حياتون ..!!!! مجرد راي ...
انا من عرب اسرائيل بس احنا صح منحكي بحريه "ببلادنا" بس الديموقراطيه نحكي او حدا يسمعنا مو بس حكي........................ما بدي افضح حقائق او اجرح حدا بس رح قولك انو عزمي بشاره ما هو ملاك للاسف.................................. او في اعضاء كنيست عرب احسن منو بكتير خليكو اتذكرو من ايا حزب طلع عزمي بشاره ترك حزبو او عمل حزب شخصي او في ناس اصيلين بحزبو السابق بردو اعضاء كنيست........................................ ..................رح جاوب على السؤال الي انا سالتو حياتنا منيحه مقارنه مع حياة عربي تحت حكم عربي بس حاولو تقارنو اسرائيل بسويسرا .....
بصراحة
من وجهة نظري فقد تصرفوا بعقلانية
والمسألة لم تنتهي بعد
ما زال بالامكان ان يساهموا بشكل او بأخر وخصوصا انهم بقلب الحدث
ان يساهموا بتغير الاسرائيلين نفسهم ( تغير افكارهم)
طبعا ليس بل حجر او بعملية انتحارة
انما بطرق حوارية منطقية وفنية وصحفية.......
العروبة لا تعني فقظ ان تكون عربي بالنسبة لي
slim6486
21/08/2008, 12:15
هل اجدادهم مذنبون لبقائهم في بيوتهم بالرغم من فرض الهويات الاسرائيليه عليهم ؟
اجدادهم برأيي مذنبين
ليش ؟؟
رح قلك ليش
اجدادهم اخدوا الهوية الاسرائيلية على اساس انهم يضلوا على ارضهم و يعيشوا بدولة اسرائيل و هالشي طبعا اعتبر بديل للنزوح الى اجزاء اخرى من فلسطين او خارج فلسطين و انتظار الجيوش العربية الموعودة للقضاء على اسرائيل
طيب السؤال اللي بيطرح نفسه شو اللي أكد لهالاجداد انو اسرائيل رح تتركهم عايشين
يعني بحرب الــ48 صار في عمليات قمع و قتل و ابادة جماعية بقى شو اللي خلى هالمجموعة تصدق و تآمن بانو اسرائيل رح تتركهم بشأنهم
ما خطرلهم انو ممكن اسرائيل تعطيهم هويات من هون و تقوم بعملية ابادة من هون
ما بيكونو حملوا عار كتير كبير ؟؟
معروف عن اسرائيل انها دولة عنصرية تكره العرب و خصوصا الفلسطينيين
و لا ننسى ان عرب 48 او عرب اسرائيل او عرب الشمال لا اعرف كيف يفضلون مناداتهم يشكلون نسبة 22% من المجتمع الاسرائيلي و هي نسبة كبيرة و مع مرور الزمن ممكن تشكل خطر على اسرائيل
و بهذا فان اسرائيل لن تتركهم و شأنهم
ما رايكم بالدروز الذين فرض عليهم الخدمه المدنيه في اسرائيل وقبلوها بشكل او باخر؟ (طبعا هناك بعض من الدروز يرفضون بشكل قاطع الخدمه المدنيه).
انا اللي بعرفه انو الجيش الزامي على الدروز اما على المسلمين و المسيحيين مو مفروض
بس في قلة قليلة من الدروز بتمتنع عن الخدمة و بيسبب هالشي مشاكل الها من سجن و ملاحقة و ...
هل التخلي عن عروبتهم حل للعيش بكرامه في "بلادهم"؟
هلق الهوية اللي بيحملها الواحد بتحدد انتمائه بالدرجة الاولى
بس الهوية المكتسبة و اللي تعتبر متل جواز سفر جديد ما فينا نعتبرها تخلي عن الهوية الاساسية
يعني انا معي جواز سفر سوري بس بامكاني الحصول على جواز سفر تاني لتسهيل عملية السفر و بعض الاعمال الاخرى و هالشي ابدا ما بيغير من انتمائي و هويتي
و هيك صار مع اخواننا الفلسطينيين اكتسبوا هوية جديدة ليحظوا بفرصة عيش كريمة و بالفعل هننن عايشين حياة كريمة
هل هم حياتهم افضل من حياة عربي تحت حكم عربي ؟
هلق بقلك انو حياتهم افضل من حياة فلسطيني تحت حكم عربي
لأنو للأسف الفلسطينيي هلق اللي نزحوا و عاشوا بالاردن و لبنان و سوريا احوالهم مش احسن من احوال عرب 48
بحب قول انو هالموضوع تعرضت لنقاش متله من حوالي الشهر انا و اخت فلسطينية
و صرت اسأل الفلسطينيين اللي حواليي و اخذ اراء من الاخوان و بحب اذكرلكم هالرأي من اخ اسمه وسام فلسطيني اهله من عرب 48 و هو ولد في الاردن طبعا بتعرفوا عرب 48 ما فيهم يدخلوا غير دولتين عربيتين بس الاردن و مصر المهم ما قاله لي هذا الاخ انه يعتبر عرب الجولان افضل من عرب 48 و ذلك لأن عرب الجولان رفضوا الأخذ بالهوية و هم ما يزالون على ارضهم
حتى انه ذكر لي بعض المواقف عن ذوبان طبقة الشباب في الكيان الصهيوني مثلا انه اصبح بعض الشباب يغارون من اقرانهم المتطوعين في جيش العدو من بدلته الى سلاحه الى هيبته مثلا فأصبح يريد ان يتطوع في الجيش ليصبح مثله هذا على كلام بعض من اقربائه
اخيرا اخي لا ننسى ان هناك فئة ليست بالقليلة من عرب 48 ما زالت تناضل و تجاهد ليعود الحق الى اهله
و منهم من يرفع الاعلام الفلسطينية بوسط اسرائيل و يحرق الاعلام الاسرائيلية و يقومون بالمسيرات و الاحتفاليات و خصوصا في يوم الارض
اخيرا بحب اسأل سؤال واحد و هو موجه لعرب 48 فقط :
الى متى تظلون فلسطينيون
من المعلوم انكم تدرسون في مدارس اسرائيلية لم تعد تذكر في كتبها فلسطين ابدا
يعني في التاريخ تدرسون عن تاريخ اسرائيل و في الجغرافية ترسمون حدود اسرائيل و في القومية تدرسون الهوية الاسرائيلية
و عندما تتأهلون للجامعات يجب عليكم اجتياز امتحان يسمى كما اذكر ( البسيخوميتر ) مالي متأكد من الاسم
و الاهم من هذا كله ان دراستكم باللغة العبرية و فقط بالعبرية
حتى انكم عندما تريدون التعامل مع البقال او الحلاق او الفران تضطرون الى مكالمته بالعبرية
الا يعتبر هذا من التهويد المعتمد من اسرائيل لطمس اللغة العربية و مسحها من العقول الفلسطينية
اتمنى ان لا اكون قد اثقلت عليكم في المشاركة الاولى لي معكم خارج الصالون
هل اجدادهم مذنبون لبقائهم في بيوتهم بالرغم من فرض الهويات الاسرائيليه عليهم ؟
ما رايكم بالدروز الذين فرض عليهم الخدمه المدنيه في اسرائيل وقبلوها بشكل او باخر؟ (طبعا هناك بعض من الدروز يرفضون بشكل قاطع الخدمه المدنيه).
هل التخلي عن عروبتهم حل للعيش بكرامه في "بلادهم"؟
هل هم حياتهم افضل من حياة عربي تحت حكم عربي ؟
بدي احكي اشي واجري على الله مع اني تعبت من هالموضوع تحديدا !
بالحواجز العسكرية الاسرائيلية الموجودة بين مدن ومحافظات الضفة بيكون في جنود اسرئيليين من عرب ال 48
وكلمة وبتحاسب عليها هم اللي بيمرمرولنا عيشتنا عالحواجز وبيبهدلونا اكتر من الجنود الاسرائيليين اصلا !!
:) ما حدا بينلام ع اشي صار زمان بس في كتير لوم ع اشياء بتصير هلأ ويا ريت ما انفهم غلط :)
رجل من ورق
21/08/2008, 14:50
طب فيني اسال عن شي مشابه
في جزء من اللي كانوا بجنوب لبنان انفرض عليهون انو يابا يا بتلتحق بجيش لبنان الجنوبي شيت انطوان لحد او بتتقلع لبرا
في كتار قالوا انو انجبروا ولادون يخدموا بجيش لحد
يعني شو كان فيهون يعملوا مثلا ؟
صح هيي كتير صعبة بس شو الحل
طبعا هون ما فينا ننسى انو في كتار كمان فاتوا لجيش لحد لانو الزعيم تبعون مع اسرائيل او لانو عطوهون امتيازات كتير او ...............................
طب فيني اسال عن شي مشابه
في جزء من اللي كانوا بجنوب لبنان انفرض عليهون انو يابا يا بتلتحق بجيش لبنان الجنوبي شيت انطوان لحد او بتتقلع لبرا
في كتار قالوا انو انجبروا ولادون يخدموا بجيش لحد
يعني شو كان فيهون يعملوا مثلا ؟
صح هيي كتير صعبة بس شو الحل
طبعا هون ما فينا ننسى انو في كتار كمان فاتوا لجيش لحد لانو الزعيم تبعون مع اسرائيل او لانو عطوهون امتيازات كتير او ...............................
هلأ اذا بدنا نستخدم التاريخ لوصم الناس بالعار فما رح نخلص...
أول حرب لبنان تلاقي حركة أمل هي أكتر فصيل دبّح بالفلسطينيين جنوب لبنان.. و مشهورة صور أهل قرى الجنوب و هنن عم يطشو رز و ورد عالدبابات الاسرائيلية من كتر ما كانو معبين عالفلسطينيين....
كلو أضرب من كلو... و كلو بيزاود على كلو.. و ما نخلص... الواحد يحكي عن الامبريالية فيعصّب شوي .. و صار بدها سيكارة.. هات باكيت المارلبورو يا ولد... و يلعن أخت الامبريالية
أخ سليـم اسمحلي اعلق على كلامـك:
اجدادهم برأيي مذنبين
ليش ؟؟
رح قلك ليش
اجدادهم اخدوا الهوية الاسرائيلية على اساس انهم يضلوا على ارضهم و يعيشوا بدولة اسرائيل و هالشي طبعا اعتبر بديل للنزوح الى اجزاء اخرى من فلسطين او خارج فلسطين و انتظار الجيوش العربية الموعودة للقضاء على اسرائيل
طيب السؤال اللي بيطرح نفسه شو اللي أكد لهالاجداد انو اسرائيل رح تتركهم عايشين
يعني بحرب الــ48 صار في عمليات قمع و قتل و ابادة جماعية بقى شو اللي خلى هالمجموعة تصدق و تآمن بانو اسرائيل رح تتركهم بشأنهم
ما خطرلهم انو ممكن اسرائيل تعطيهم هويات من هون و تقوم بعملية ابادة من هون
ما بيكونو حملوا عار كتير كبير ؟؟
كلامـك بالنسبة لأنو اجدادنا اخدوا الهويات الاسرائيلية على اساس يضلوا بالارض كلام مش صحيح ومش دقيق..وفيو اهانة لأنك عم تلمح انو اجدادنا ارتشوا وخانوا الارض كرمال يعيشوا!!
والواقـع أبـدا ما كان هيك..احنا لما اجدادنا ضلوا هون ضلوا لانو ما بدهن يتركوا الارض..بس ما كانوا عارفين شو رح يكون مصيرهن!!..بالعكس هني تحدوا الموت بشجاعة..فالفلسطيني اللي ما لجأ لدولة تانية ضلو بوطنو حتى لو رح يموت..هلأ شو السبب انو ياللي ضلو اليهود ما قتلوهن وخلوهن عايشين واعطوهن هوية اسرائيلية؟..السبب انو اليهود كانوا بدهن يفرجوا انو هني عندهن دولة ديمواقراطية بتحافظ على حقوق الاقلية ( واحنا اغرب اقلية بالعالم صدقا لانو احنا الاقلية صاحبة الارض!!!!!) .. فـ كانوا بدهن يفرجوا انو شوفوا ما احلانا كيف منحافظ على الاقلية وع العالم وعلى الحقوق!!..وبالتالي اجدادنا كانوا مجبرين على حمل الهوية الاسرائيلية..وما اشتروها كرمـال يعيشوا!!
اخيرا بحب اسأل سؤال واحد و هو موجه لعرب 48 فقط :
الى متى تظلون فلسطينيون
من المعلوم انكم تدرسون في مدارس اسرائيلية لم تعد تذكر في كتبها فلسطين ابدا
يعني في التاريخ تدرسون عن تاريخ اسرائيل و في الجغرافية ترسمون حدود اسرائيل و في القومية تدرسون الهوية الاسرائيلية
و عندما تتأهلون للجامعات يجب عليكم اجتياز امتحان يسمى كما اذكر ( البسيخوميتر ) مالي متأكد من الاسم
و الاهم من هذا كله ان دراستكم باللغة العبرية و فقط بالعبرية
حتى انكم عندما تريدون التعامل مع البقال او الحلاق او الفران تضطرون الى مكالمته بالعبرية
الا يعتبر هذا من التهويد المعتمد من اسرائيل لطمس اللغة العربية و مسحها من العقول الفلسطينية
اتمنى ان لا اكون قد اثقلت عليكم في المشاركة الاولى لي معكم خارج الصالون
أي نعـم انا فلسطينية ورح اضل فلسطينية..واعتقد انك برد سابق قلت انو الهوية هية اللي بالقلب مش المكتسبة,, وهكذا الوضع معنا..فحتى لو اضطرينا نحكي بلغة عبرية ونتعلمها وندرس فيها..فهاد لا يعني انو صرنا يهود وتخلينا عن قوميتنا وهويتنا.. وبالنسبة للاجيال القادمـة..انشالله رح نربيهن كيف ما ربونا اهالينا..
وأهلا :D
slim6486
21/08/2008, 17:51
أخ سليـم اسمحلي اعلق على كلامـك:
اتفضلي و اهلا و سهلا
كلامـك بالنسبة لأنو اجدادنا اخدوا الهويات الاسرائيلية على اساس يضلوا بالارض كلام مش صحيح ومش دقيق..وفيو اهانة لأنك عم تلمح انو اجدادنا ارتشوا وخانوا الارض كرمال يعيشوا!!
اول نقطة بحب وضحها انو انا ما بحب هين حدى ابدا
تاني شي الاجداد اخدوا الهوية ليش عشان يبقوا بارضهم و هادا اللي انا قلته
والواقـع أبـدا ما كان هيك..احنا لما اجدادنا ضلوا هون ضلوا لانو ما بدهن يتركوا الارض..بس ما كانوا عارفين شو رح يكون مصيرهن!!..بالعكس هني تحدوا الموت بشجاعة
ما هم اخدوا الهوية و اسرائيل وعدتهم يضلوا عالارض وين تحدي الموت بالموضوع
وبالتالي اجدادنا كانوا مجبرين على حمل الهوية الاسرائيلية..وما اشتروها كرمـال يعيشوا!!
برأيك في حدى بيجبر حدى على شي
أي نعـم انا فلسطينية ورح اضل فلسطينية..
يا رب و الله ما منتمنى لفلسطين و شعب فلسطين غير كل خير
وهكذا الوضع معنا..فحتى لو اضطرينا نحكي بلغة عبرية ونتعلمها وندرس فيها..فهاد لا يعني انو صرنا يهود وتخلينا عن قوميتنا وهويتنا..
بس بتكونوا اتخليتوا عن كتير اشيا مهمة يعني عامل اللغة اكتر عامل مهم بكون الانسان عربي
وبالنسبة للاجيال القادمـة..انشالله رح نربيهن كيف ما ربونا اهالينا..
صديقي وسام اللي ذكرته بالرد السابق حكى لي مرة كان ببيت خاله فات عليهم ابن خاله التاني و هو بالاردن و ابن خاله جاي من فلسطين فالخال وطني حاطط خارطة فلسطين ورا الباب دخل الابن و سكر الباب شاف الخارطة كبيرة قله يا خال معقول كل هالقد كبيرة اسرائيل صدق من عنا ما بتبين اي ساعتها قام الاب بدو يصربه للابن و يروحه بشربة مي لولا هدوه الشباب
النتيجة انو الجيل القادم عم يذوب و بشكل كبير في البوتقة الصهيونية و هادا الحكي حكي فلسطينيين
على كل متل ما قلت ما منتمنى لفلسطين و شعب فلسطين غير الخير
و منعرف انو في مهمة كبيرة على عاتقهم و منتمنالهم التوفيق يا رب
شكرا اختي على المناقشة
يا أستاز سليم نـعـم هني اخدوا الهوية بس بتفرق كتير كيف اخدوها..
يعني هل هني راحوا ركضوا وسعوا وخانوا ارضهن ووطنهن من البداية وتعاونوا مع اليهود لحتى ياخدوا الهوية؟ أم هل هني قرروا يبقوا بأرضهن وما ينزحوا وبالنهاية لاقوا حالهن مهزومين ومحاصرين وازا بدهن يضلوا مجبورين ياخدوا الهوية؟..فهمت هون في فرق وفرق بيأثر كمـان!
وبصراحة انا حـاولت افهم وجهة نظرك ونظر المعترضين الاخرين على وجودنا باسرائيل ما قدرتش!..يعني هل كان المفروض انو كل الشعب الفلسطيني يترك ارضو ويلجأ لدول تانية ويخلي كل اراضيه لليهود ويقعد يقول انشالله رح نرجع شي يوم؟!
حسب رأيي احنا حجر دعم للقضية الفلسطينية ..احنا اللي عم نحافظ على المقدسات داخل الخط الاخضر واحنا اللي عم ندافع عنها وعن ما تبقى من تراثنا وحضارتنا وهويتنا هـون.. واحنا اللي عم نخلي كيان الدولة الفلسطينية يمتد فعليا الى حيفـا ويافـا وعكـا..
LiOnHeArT.3LA2
21/08/2008, 19:28
طبعا ليس بل حجر او بعملية انتحارة
..........؟؟؟؟؟؟؟؟؟؟؟........
شرحلي شو قصدك منا ؟
بعد اذنك يعني
achelious
26/08/2008, 16:59
هلئ عرب٤٨ وضح اسرائيل شو بدا تعمل فيون، بعد زيارة بوش الأخيرة لإسرائيل وتصريحه إنو مع يهودية "الدولة" مابقي قدام اسرائيل عقبة غير الرأي العام العالمي لتهجرن، بقى أنا مع بقاؤن بأرضن.. بكرامتن..
وبالطبع أنا ضد الخدمة بجيش العدو مهما كان.. هي جريمة أصلا
اخوية نت
بدعم من : في بولتـين الحقوق محفوظة ©2000 - 2015, جيلسوفت إنتربـرايس المحدودة