شو هوي الوطن [الأرشيـــــف]

yass

28/07/2004, 20:12

مرحبا شباب.. كيفكون و كيف البلد؟؟
بصراحة هيدي اول مرة افتح هالعنوان. وكلمة حق و الله كتير عجبني..
بلا طول سيرة.. انا حابب نناقش موضوع انا كتير مهتم انو اسمع رأي الشباب الطيبة / و الصبايا طبعا/ . سؤالي هو التالي: بالنسبة الكون شو هوي مفهوم الوطن؟؟
قصدي انو برأيكن الوطن هو البلد اللي ولدت و ربيت فيه, وللا هو البلد اللي تلقى فيه مين يقدرك و بيعطيك قيمتك و يوفرلك الفرص؟؟
أتمنى تعطوني رأيكن بهالموضوع..
مع أطيب التمنيات

Geeny

28/07/2004, 21:39

أول شي شكراً كتير لأنك طرحت الفكرة لأنو من فترة قصيرة انطرح السؤال و انصدمت أنو كتار يلي ما عرفوا يجاوبوا و منهم أنا مع أنو كنا نعتبر السؤال سخيف شوي
واحد من يلي كانوا معنا قال تعريف الوطن بالنسبة إله قال الوطن هو أنثى و الأنثى هي الحياة بقا شو بتقول انت ؟

SABE

28/07/2004, 22:01

بصراحة السؤال يلي طرحو الأخ yass سؤال كتير مهم ... بس بنفس الوقت سؤال كتير متشعب ... بتمنى انو الكل يعطو رأيون و يصير مناقشات كثيرة بهذا الموضوع ..
بالنسبة الي الوطن هو المكان يلي ولد فيه الشخص و عاش فيه معظم أوقات حياته .. يشارك فيه مع باقي أفراد الشعب أحلامهم بالوطن الأفضل ... يعني على سبيل المثال , شخص سوري شائت الظروف أن يخرج خارج سورية لسبب ما... لكن حتى في الغربة يكون معظم تفكير الشخص مرتكزاً حول وطنه ... يفكر بالعودة بعد أن يكون حسن وضعه قليلاً ان لم يكن وضعه جيداً في وطنه الأم ... و طبعاً عندما يصبح وضعه أفضل من الناحية المادية أو الدراسية .. هذا يعود ايجاباً على الشخص و الوطن أيضاً ...
بالإضافة انه كل شخص في وطنه يستطيع أن يجد الأصدقاء المخلصين ... الذين يشاركونه نفس طرق التفكير بطريقة أو بأخرى .. و الذين تربى معهم على نفس المبادئ و القيم ...
هذا هو الوطن برأيي ...

dimozi

29/07/2004, 00:39

الوطن ..................

هو الدمعة بعينك اللي بتحبسها كل ما سمعت حماة الديار بعيد كنت او قريب.

:D

SABE

29/07/2004, 00:43

الوطن ..................

هو الدمعة بعينك اللي بتحبسها كل ما سمعت حماة الديار بعيد كنت او قريب.

شو هالقوة ... بشرفي بتستاهل أكتر من 100 :D

Hus

29/07/2004, 02:40

الوطن ..................

هو الدمعة بعينك اللي بتحبسها كل ما سمعت حماة الديار بعيد كنت او قريب.

شو هالقوة ... بشرفي بتستاهل أكتر من 100 :D

و 100 :D من عندي

mhmary

29/07/2004, 08:07

الوطن ..................

هو الدمعة بعينك اللي بتحبسها كل ما سمعت حماة الديار بعيد كنت او قريب.

شو هالقوة ... بشرفي بتستاهل أكتر من 100 :D

و 100 :D من عندي
وكل مرة بتسمع صوت حيبتك على التليفون وبتزكر أول كف أكلتو منا

dimozi

29/07/2004, 09:49

I love you ..................I love you all ..................... ////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

:lol:

HashtNasht

29/07/2004, 23:31

Mr.yosef

31/07/2004, 15:11

وكل مرة بتسمع صوت حيبتك على التليفون وبتزكر أول كف أكلتو منا

اي ملّا ذكرى انشالله يا شباب بيرجعوا كل المغتربين وبيفرحو أهلون ورفقاتون وأهم شي بيفرحونا النا :)

marchella

31/07/2004, 19:19

الناس عندون وطن بيعيشو فيه...انا عندي وطن بعيش فيا

SIMON

31/07/2004, 19:52

Hus

01/08/2004, 02:52

الوطن هو مساحة محددة من الارض + مجموعة محددة من البشر حدث وان اتفقوا في الماضي على استثمار تلك المساحة المذكورة سايقاً
و لكي يكون الاستثمار فعالاً وجب توفير يد عاملة رخيصة الثمن تعمل بدافع الوطنية وتحمي هذه الارض وصولاً الى الموت من اجلها اذا استدعى الامر
و لكن هذا كله حدث للاسف في الماضي و بالمختصر يعني ما حدا اخد راينا ( بهالوطن )
باختصار الوطن يشبه المزرعة لكنه اكثر اتساعاً و يدر بارباح اعلى :!:

هوي ما اخدو راينا بكتر شغلات ومنها ومن اهمها انو اهلنا ما اخدو راينا بموضوع رغبتنا بانو نجي على الدنيا او لاء ..
وجرررررررررررر

بس هذا ما بيعني بحال من الاحوال رفض الافكار والنظريات والعادات والتقاليد الي ما اخدو راينا فيها

الوطن هو الوطن
الوطن هو لما كون مسافر وارجع احضن امي واخواتي
الوطن هو دمعة بشوفها بعيون صبية لما بدي سافر وميت ضحكة وبسمة لما برجع
الوطن هو رفقات لما بسلم عليهم بعد غيبة بحس بحياة عم تمتد من صدورهم وهي ملاصقة صردري بالضم و نهدات بقبلاتهم وانا بسلم عليهم
الوطن هو المحل الي بضلني بتابع اخبارو و بزعل لزعلو وبفرح بفرحو لما بكون بعيد
الوطن هو المحل الي بتمى لما موت يدفنوني بترابو ..

الوطن هو المحل الي ما بحس بقيمتو غير لما بعد عنو

yass

16/04/2005, 19:38

شباب!!!!!!!!!!! كنت أدور عليه و لقيتو
هاد أول موضوع لألي بالأخوية ( وطبعا نزلتو بالمنبر الحر :P )
بدي اسمع رأي الشباب اللي ما ردو على هالموضوع بزماناتو لأنو لسا ما كانو موجودين, بيهمني كتير أعرف آراءكون حول هالموضوع :D :D

krimbow

16/04/2005, 20:33

الوطن هو الأرض مع الحضارة
بس مو حايالله أرض.... أرض بتعيش أو بالأحرى بتحيا فيها أمة مو الشعب لأنو الشعب هو الجزأ الحاضر من الأمة فقط بدون الماضي و بدون المستقبل
الأمة يلي بتعيش بالأرض و مع مرور الزمن بتأسس حضارتها على هالأرض و ما بتقدر تستغني عنها فبتتحول الأرض لوطن
على هالأساس ما بيحق للشعب الفلسطيني مثلا أنو يعمل سلام مع اسرائيل لأنو هالسلام معناه أنو استغنوا عن جزأ من الأرض يلي هيي الوطن يلي هوي ملك للأمة يعني للأجيال القادمة من هالشعب
بس الوطن ما ألو حدود واضحة على مر العصور
يعني بيكبر بمنجزات شعبو و بيصغر معون
من زمان كانت الأمة الأرمنية مثلا واصلة لكسب أما هلأ رجعت لما بعد جبل أرارات
يعني الوطن السوري اليوم بيمتد من سعسع لباب الهوا
بوكرا يمكن تنفصل حلب و تصير دولة مستقلة (الله لا يقدر)
أو يمكن تصير لبنان محافظة سورية (كمان الله لا يقدر)
هادا الشي بيرجع لتأثير حضارة الأمة السورية بالأرض السورية
و دمتم

krimbow

16/04/2005, 20:41

ع فكرة
يعني لو طالبلي شي مليون دورار
كنت عم دور ع أول رسالة بعتتها قامت اجيت لحالا
ضل عاشق و أطرميز و جوي و ارشيتكتيرر و الحكيم و الكنغ و زين و زنو و نانا و........

وشغلة كمان..... تاري حتى المشرفين عم يطبقوا سياسة " كيف تجنن المشرف"

zen

16/04/2005, 20:45

ما قدرت فرق بين المفهومين الوطن هوي الي ربيت فيه وترعرعت فية وهوي الي بيعطيني الفرص
بس اذا قصر الوطن بهالشي مو معناها انو مانوا وطن بس لازم نتشارك ونحل التقصير
وميت وردي
:D :D :D :D :D :D :D :D :D :D :D

krimbow

16/04/2005, 21:11

بس اذا قصر الوطن بهالشي مو معناها انو مانوا وطن بس لازم نتشارك ونحل التقصير

الحدود بتكبر و بتصغر خلال قرون مو خلال سنين
بيوم من الأيام كان الوطن العربي بيضم الأندلس.....عشرين سنة تانية ع الحالة يلي نحنا فيها بتصير اسبانيا بحضني

zen

16/04/2005, 21:13

عشرين سنة تانية ع الحالة يلي نحنا فيها بتصير اسبانيا بحضني

انشالله كلو بيتغير
وقريبا وللاحسن
:D :D :D :D :D :D :D :D :D :D

Joe

16/04/2005, 22:27

مرحباا

كلمة "وطن" بحد ذاتها ما المفروض يكون إلها ارتباط عاطفي شديد مع الإنسان. بس باللغة العربية كلمة وطن عم تشمل بشكل تلقائي فكرة البلد الأم و مسقط الرأس و ما إلا هنالك... هدول نعم المفروض يكون الإنسان مرتبط عاطفيا فيهم... لانون بمثابة البيت و الملجأ و الأصل و الأهل و الأصدقاء و الطفولة و ألف شغلة و شغلة.

أما الوطن ككلمة عصرية بتعبر عن كيان الدولة فهيي مرتبطة فورا بتعريف المواطن. يعني حسب وضع الوطن الإقتصادي و حسبب حقوق المواطنة يلي عم تحصل عليها بيختلف وضع الوطن عند الشخص.

ع فكرة, انا ما بعتقد انو أي شخص عمره تحت ال45 سنة رح يقدر يعطي جواب حقيقي لهيك سؤال. لأنه ببساطة نحنا لسا ما عشنا مرحلة العمل و تحمل مسؤولية أسرة و أولاد... أو صرنا بعمر نفكر بترشيح انفسنا لمنصب حكومي... او وصلنا لمرحلة التقاعد مثلا و صار بدنا ضمان اجتماعي و ضمان صحي!

يعني نحنا هلأ منقدر نحكي كتير و نتفلسف كتير عن معنى البلد الأم ... و هل هوي فقط متل البيت.. لانو الواحد يمكن يكون بيكره بيتو... خصوصي مثلا اذا كان بيتعرض لاعتداء جنسي او جسدي من قبل الأهل مثلا... بالتالي رح يصير عندو نفور نفسي حتى من شوفة هل بيت من بعيد... فهل لو تعرض لاعتداء جسدي من قبل الحكومة بصير بيكره البلد الأم؟ او الوطن؟

مبدأيا ... انا بآمن بفكرة انو ممكن الإنسان يكون عندو أكتر من وطن. هاي هيي الفكرة الأساسية برأيي. يعني هل لو ذهبت لمكان تاني و عشت فيه فترة من الزمن ممكن تصير تعتبرو وطن؟ لو بمواصفات مختلفة؟ و الجواب حاليا عندي هوي نعم.. و لو إني لسا ما بعتبر كندا وطن...بس يمكن بعد 5 سنين لما صير اشتغل و اندمج اكتر... يمكن صير اعتبر كندا وطن تاني

بقى ما عندي جواب ع تعريف الوطن! عن جد سؤال صعب
:mrgreen:
و خصوصي للمغتربين

Abo rafik

17/04/2005, 01:06

اذا كان الوطن هو الانتماء لمجموعة فانا بنتمي للانسانية....
واذا كان الأنتماء لارض فأنا بنتمي لهالارض....
واذا كان هوي الجنسية اللي موجودة عالهوية فأنا عربي أولا" وسوري ثانيا"
واذا كان الوطن مزرعة فأنا فلاح زغير بدي كون اسرة بسيطة وعيش من خير هالارض وبيكون أفضل بكتير اذا عشت من خير الأرض اللي بملكها (قانونيا")بدون ما ضر أي حدا ...ولا حدا يضرني أو يتعدى ع حريتي...
اما بالنسبة للوطن اللي حابب عيش فيه :فهو وطن السلام ...لأنو حقي انو أرفض الموت...واللي بيرفض الموت لازم يحب....

layla

17/04/2005, 03:18

الوطن هوي المكان اللي عشت من خيره و شربت من المي اللي فيه
الوطن هوي المكان اللي كل ما حدا قال عليه كلمة بالعاطل بتحس النار عم تشعل بعروقك و بتشتهي انك تخنق اللي عم يحكي
و اهم شي الوطن هوي المكان اللي ما بتحس بقيمتو اللا لما تتركوا و هوي المكان اللي بتنزل دمعتك كلما بتتذكر اسمو
و الله اشتقنا
:cry: :cry: :cry: :cry: :cry: :cry: :cry: :cry: :cry: :cry: :cry: :cry: :cry: :cry: :cry: :cry: :cry: :cry: :cry: :cry: :cry: :cry: :cry: :cry:
:jakoush: :jakoush: :jakoush: :jakoush: :jakoush: :jakoush: :jakoush:

to live is to die

17/04/2005, 04:35

الوطن هو صراع إنساني بين الخير والشر
بين الأنا والكل
الوطن هو الحياة
بكل أشكالها
الوطن هو علاقاتنا الاجتماعية والعملية
الوطن هو خبزنا وماؤنا
الوطن معطاء
لكنه يتعب أحياناً
لأننا نخونه
إن الوطن اليوم هو بحاجتنا أكثرمن حاجتنا إليه
كلنا للوطن

عاشق من فلسطين

17/04/2005, 12:41

الوطن هو شيء .. قد لا تستطيع التعبير عنه بالكلمات .. لكن كل حواسك تنطق به .. فأنت اذا كنت في المريخ .. ورأيت علمك .. تهتز مشاعرك .. وأنت عند كل أغنية وطنية تسمعها .. تذكر سوريا .. وانت عند كل قطرة دم تذرفها جراحك في الحرب أو في السجن .. ترسم خارطتك ..
الوطن بمفهومي .. أكبر من أن أستطيع انو أعطيه تعريف .. يعني شيء بيلفح وجهي متل النسمات الباردة في الصيف .. شيء بيدفعني للحياة رغم كل الذل والفقر والجوع للرغيف وللحرية اللي نحنا عايشين فيه .. بس أحيانا" الوطن بينفصل لعدة أبعاد بحالة متل حالة سوريا حاليا" .. يعني أنا وطني حاليا" هوي أرض سوريا .. بدون حكومتها وبدون خائنيها .. وبدون من يحبها ولكنه نائم وغافل عن تحريرها من سجانها .. يعني الوطن بمفهومي هو اولا" الأرض التي خلقت فيها .. ومن ثم المجتمع الذي أعيشفيه اذا كان جديرا" بهذه الأرض .. ومن ثم الجكومة اذا كانت جديرة بهذه الأرض أيضا" ... فالانسان اذا خلق في البرية دون مجتمع فأن وطنه هو الأرض التي خلق عليها .. ولو ذهب الى أرض مأهولة واندكج مع ساكنيها .. وعاش معهم وتفاهم معهم وأحس بهم كأسرة كبيرة له .. فهو يحن دائما" الى الأرض التي تربى عليها .. يعني انا عندما أذكر الوطن وأكتب الشعر عن الوطن .. لا أتذكر أهلي أو أصدقائي أو مجتمعي .. وأنما أذكر علم وطني .. أذكر تشردي في حارات دمشق القديمة في ليالي الشتاء الحزينة .. أذكر حضن حديقة تشرين الذي حضنني لشهر ونيف عندما كنت منبوذا" من اهلي ومعظم أصدقائي لأني نذرت نفسي لوطني .. هكذا أذكره .. ومن ثم يأتي الأصدقاء الحقييقين .. والأهل الحقيقيين ... يعني أهلي الذين خلقوني .. ليس بالضرورة أن يكونو الأهل الذين احسهم أهلي الحقيقيين والذين أستطيع العيش بتفاهم وراحة نفسية معهم .. ولكن تبقى رابطة الدم والعشرة موجودة ..
الأرض هي الوطن الحقيقي .. لأنه دون أرض لن يكون هناك تجمع سكاني .. وآمال وآلام مشتركة .. وعادات مشتركة ..

يعني الوطن هو عقيدة ..
وأذكر هنا محمد الماغوط الذي خان وطنه في كتاب (سأخون وطني) وهو هنا خان كل من ينتمي الى أرض سوريا ولا يقدرها وتبرأ منهم ولكن لم يخن ارضه ولم يتبرأ منها ..

مشكور كتير أبو مارل على هالموضوع الرائع ..

:D :D :D :D :D

Danito

18/04/2005, 00:46

مرحبا يا حماعة!
ردا على سؤال شو هوي الوطن؟ أي شو فيني أحكي لأحكي؟
الوطن هو سوريا.... سوريا اللي من حبها ..سوريا اللي منكرها.. سوريا السورية.. سوريا العربية.. سوريا الكردية.. سوريا الشرق أوسطية .. سوريا المسلمة .. سوريا المسيحية.. سوريا اليهودية..سوريا المؤمنة .. سورية الملحدة.. سوريا الغنية .. سوريا الفقيرة .. سوريا السهل .. سوريا الجبل .. سوريا البحر.. سوريا الصحرا.. سوريا الأبية.. سوريا الغالية

سوريا التين و الزيتون .. سوريا الحب الأول .. و الوسطاني .. و الأخير و ما بينهم.. سوريا القبلة الأولى و ما بعدها..

سوريا الطبيعة الساحرة.. سوريا الشوارع الوسخة.. سوريا الحضارة .. و سوريا التخلف..

سوريا التفاصيل الصغيرة .. سوريا الصورة الكبيرة..

عايشة فينا و عايشين فيها.. هي معنا بأقاصي الأرض و نحنا معا بآخر ما عمر الله...

لا لا هي مو مسبات و لا مديح هي سوريا بكل تناقضاتا الذاتية و تجسداتا الموضوعية..

من حبا كيف ما كانت كيف ما رح تكون و شو مارح تكون..

نقطة انتهي (أي يس ما انتهى.. )

ما سبق يمكن وصفه تعريف قومي عاطفي يمكن أن يكتب مثله أي إنسان عن وطنة الأم .. و خاصة كل ما شرقنا (ذهبنا شرقا)
أما الوطن فبعيداً عن المعاني السياسية و اللغة القانونية و الأسلوب الأكاديمي "الممنهج" (قال عم اتفهمن حضرتي) و حسب ما فهمت من سؤال الأستاذ الله يخليلنا ياه (طبعاً كله حسب رايّ المجعلك دام خيركم) هو هذا الحيز الذي نختار أن ننتمي له.. و يمكن في بعض الأحيان أن لا نختار بل هو من يختارنا .. و الحيز قد يكون أرض أو بقعة جغرافية و قد يكون قرية .. مدينة .. جماعة .. مجتمع .. فضاء.. خيال... كل ما سبق و غيره.. أو بعضه ... او ولا شئ منه أبداً...

بعيداً عن الفلسفة و التفلسف.. أي هو بلدك لما بتحس أنو بلدك .. حتى و لو عضك.. أو عضيتو... يعنيى بس الوطن كمفهوم ما لازم نحصره بشعور .. يعني الشغلة أخذ و عطا .. يعني بتحبو و بتضحي منشانو و بيحبك و بيضحي منشانك

ممكن يعطوك 500 ورقة ثبوتية للوطن أي يس أنت ما بتنتميلو بورقة سوري..أو حتى تركي (القديمة مو الجديدة) و يمكن ينزعوا عنك الجنسية و يسلخوا قائمة تهم تخوين و عمالة بتكفي قبيلة أي بس أنت بتنتمي ألو أكثر من الكل

و بيضل القلب شايل هموم هالوطن...

chalice

10/05/2006, 18:20

^
^
^
عن جد بتستاهل على هالكلام بوسة 8)

أنا بشبه الوطن للأم والأب
بيزعلوا مني وبيخاصموني وبيزعلوني بس برضو بيحبوني وبحبهم

نفس الشي الوطن...بيزعل مننا وبنزعله...وبيبقا بقلبنا

يمكن ما اخترته...بس لو رجعت وكان ألي الخيار كنت اخترته بكل محاسنه وعيوبه وما بختار غيره
وعلى العموم حتى عيوبه بسببنا...بس محاسنه منه وفيه

وتحيا سوريا بقولنا

was616im

04/11/2007, 17:05

الوطن ..................

هو الدمعة بعينك اللي بتحبسها كل ما سمعت حماة الديار بعيد كنت او قريب.

:D

وكل مرة بتسمع صوت حيبتك على التليفون وبتزكر أول كف أكلتو منا
اول شي هي 1000 :D عالجمل الرائعة
تاني شي الوطن بالنسبة الي هو وطن احلامك وطن مشاعرك وطن طفولتك (ولو كانت معذبة بس اكيد ايامها لا تنسى) وطن امك اللي نطقت اسمها اول كلمة بحياتك و منها شفت الضو
وطن اصدقاء الطفولة و معاناة الطفولة و براءة الطفولة
و وين ما رحت و قد ما انبسطت بالغربة اكيد رح ترجع بيوم من الايام لوطنك لانك بداخل و صميم قلبك بتحبو اكتر من اي مكان تاني بالعالم
:D

yass

04/11/2007, 17:15

اول شي هي 1000 :D عالجمل الرائعة
تاني شي الوطن بالنسبة الي هو وطن احلامك وطن مشاعرك وطن طفولتك (ولو كانت معذبة بس اكيد ايامها لا تنسى) وطن امك اللي نطقت اسمها اول كلمة بحياتك و منها شفت الضو
وطن اصدقاء الطفولة و معاناة الطفولة و براءة الطفولة
و وين ما رحت و قد ما انبسطت بالغربة اكيد رح ترجع بيوم من الايام لوطنك لانك بداخل و صميم قلبك بتحبو اكتر من اي مكان تاني بالعالم
:D

عالم آثار انت شي خيو؟؟؟؟ شو ذكرك بهالموضوع؟؟؟ :lol::lol:

يالله شوفو تاريخو. هاد أول موضوع كتبتو بالأخوية :cry:

was616im

04/11/2007, 17:36

عالم آثار انت شي خيو؟؟؟؟ شو ذكرك بهالموضوع؟؟؟ :lol::lol:

يالله شوفو تاريخو. هاد أول موضوع كتبتو بالأخوية :cry:
هههههه سيدي والله وقت اللي بشوف هيك مواضيع باخوية و بقارنها بالوضع الحالي اي شي بيخجل يا رجل
مو قصدي عالاعضاء ما شاء الله فيهن البركة بس المشكلة انو ما عاد في هديك الردود اللي بتحمس الغير عالمناقشة بمنطقية و واقعية و احترام فهيك حبيت نكوش و حركش بالماضي بلكي العالم بتتلحلح شوية و خصوصا انتو القديمين الشبه غايبين :D

phoenixbird

05/11/2007, 00:24

تسجيل متابعة ولاقلكون رح رد

من وين ناكشن هالموضوع

الوطن هو حماة الديار عليكم سلام
الوطن هوي حضن ماما وكف بابا وتسقية تيتي وكتب جدو
هوي ساحة باب توما وكتب الطب والسياسة والمسرح
هوي فيروز الصبح واخوية بالليل

الوطن هو 185الف كيلومتر مربع
الوطن ببساطة يا ياس هوي الوطن

Nirvana

05/11/2007, 00:32

الوطن هوي الاحساس اللي خلاني لما قرأت كل ما ذكر أعلاه ابكي .. واضحك .. وحن .. واغضب .. احلم ... وفوت بمية حيط ورا بعض ...

Nirvana

05/11/2007, 00:34

أذكر تشردي في حارات دمشق القديمة في ليالي الشتاء الحزينة .. أذكر حضن حديقة تشرين الذي حضنني لشهر ونيف عندما كنت منبوذا" من اهلي ومعظم أصدقائي لأني نذرت نفسي لوطني

مو بس لانو تأثرت كتيييييييير بجمال هالصورة .. بس لانو .. فعلا لما ما يضل في شي الك بالدنيا .. بضل الوطن حدك والك وهوي الحق الوحيد اللي ما حدا بيقدر ينكرو عليك .. :pos:

phoenixbird

05/11/2007, 00:37

هلا كنت عاطفي شوي فوق رح احكي بالعقل

الوطن هو المكان اللي بنعيش فيه وننتمي اله بغض النظر عن هالمكان

فغرفة النوم اللي مقضيين تلت رباع حياتنا فيها وطن

والصف المدرسة وطن

وقاعة الجامعة وطن

المكتبة خشبة المسرح شاشة السينما الكتاب الكومبيوتر هني اوطان بنعيش معون اوقات بحالها

حضن ماما هو وطن

وبيتنا والحارة والشارع والحي والمدينة والبلد والدولة والقارة والارض كلها وطننا الكبير

phoenixbird

05/11/2007, 00:41

حابب بس قول شي صغير قبل ما نام

يمكن اهلي يتركوني

يمكن غرفتي تتغير

يمكن كتبي تحترق

يمكن الحارة تروح

يمكن الحضن يموت

يمكن بلدي نفسا اتركا

بس الوطن اللي جواتي ما بيتغير ولا بيروح ولا في قوة بالعالم بتشيله من جواتنا

تصبحوا على خير

sweetbaby

17/02/2008, 23:02

الوطن هوي الام القاسية... يللي بتضل تقسى ع ولادها ويمكن ماتعطيون فرص ليطورو حالون بس بالاخير بتضل تحبوووووووون لو شو ماصار....بتضل الحضن اللي بيشتاقو يبكو ع صدروو

حبيت ارجع انكش هالموضوع لانو عجبني
شكرا ياسوو:D

x52

17/02/2008, 23:10

عالوجع اسمحلي قلك انك ضربت عالوتر الحساس

يعني كوني مجرب, مش وطنك هو اللي بتربى فيه لأنو انا عايش بالاردن ولا مرة حسيت انو بلدي, نفسي مرة احس بانتماء يعني وصلت لأقصى درجات الفقد بدي روح على بلدي بس ما بطلعلي "انا فلسطيني "

البلد يا سيدي هو اللي انت اصلك منو يعني يمكن المكان اللي قرعة ابوك منو
بس انا بعرف اني يمكن روح على بلدي وما يقدروني ويعطوني فرصتي بس بحبها خلص هيك .......

BL@CK

08/03/2008, 02:57

الوطن هو سوريا.... سوريا اللي من حبها ..سوريا اللي منكرها.. سوريا السورية.. سوريا العربية.. سوريا الكردية.. سوريا الشرق أوسطية .. سوريا المسلمة .. سوريا المسيحية.. سوريا اليهودية..سوريا المؤمنة .. سورية الملحدة.. سوريا الغنية .. سوريا الفقيرة .. سوريا السهل .. سوريا الجبل .. سوريا البحر.. سوريا الصحرا.. سوريا الأبية.. سوريا الغالية

سوريا التين و الزيتون .. سوريا الحب الأول .. و الوسطاني .. و الأخير و ما بينهم.. سوريا القبلة الأولى و ما بعدها..

سوريا الطبيعة الساحرة.. سوريا الشوارع الوسخة.. سوريا الحضارة .. و سوريا التخلف..

سوريا التفاصيل الصغيرة .. سوريا الصورة الكبيرة..

هاي هيه , يا زلمي لو ما الواحد شاف الزبالة هيك منتشرة على طول الشارع و عرضوه ما بيحس أنو ب سوريا .. :lol:

المهم برأيي الوطن أو الإنتماء لهالوطن إنتماء لشيء معنوي ..

يعني الوطن مش حدود يعني مثلاً السوري ما بينتمي لقبل الحدود بمتر بعد الحدود بمتر بحس حالو غريب و ما في إنتماء ..

شيء معنوي الوطن جدا ً اكتر من كونو ماديـّات ..

طفوله

08/03/2008, 10:18

الوطن...هوه /التاريخ/ الي ما فيكـ تستغني عنو ....وين ما رحت بتاخدو معكـ ...

وما فيك تكون اليوم ...وتعمل بكرا ...بدون وطنك

هوه الطاقه الي بداخلك...بس هاي ا/لطاقه مالها بدائل/.../طاقه زائد لا نهايه/

ما بتوقف عند حاجز معين...او مغريات معينه ....او مكان معين...او ظرف ..او ..او

الوطن.../النخوه/....و..../الضمير/

stormsmaker

07/12/2008, 17:58

الوطن هو الي بيخلي رقبتك تنمل و بدنك يأشعر كل ما تقرا هالموضوع
و
حماة الديار عليكم سلام

توم و جيري

07/12/2008, 20:22

الوطن : ؟؟؟؟؟؟؟؟؟؟؟؟؟؟؟؟
اسمعو فيروز بحبك ياوطني
او موطني بيعبرو شوي عن محبتي لالو

basbos

10/12/2008, 03:03

الوطن : ؟؟؟؟؟؟؟؟؟؟؟؟؟؟؟؟
اسمعو فيروز بحبك ياوطني
او موطني بيعبرو شوي عن محبتي لالو

وبضيف الهم " سائليني يا شآم "

THE_unforgiven

10/12/2008, 13:32

بدك تعرف شو هوي الوطن ...
طبعاً .. وليس أي وطن ..
سوريا ...
.
.
هون بقا ... بتفرق ..
الوطن ...
هوي لما كل يوم بتفيق ع صوات فيروز .. وبياعين الغاز ...
هوي الهوا اللي بتتنفسو ..
هوي شقفة الأرض ... اللي بتحسا أغلا من كلشي بتحبو ..
هالأرض .. اللي إذا بعدت عنا ليوم واحد .. بتحس حالك ناقص ...
....
.
.
الوطن ... هوي المزارع اللي بيروح كل يوم ع حقلو ..
الوطن .. هوي العامل .. الفقير .. المهندس ... الطبيب ... الغني ... والمسؤول ..
الوطن .. هوي نحنا ... شباب وصبايا .. ختايرة ورجال .. نساء وأطفال ..
وطالما نحنا موجودين ... فالوطن باقي ...
وطالما الوطن باقي ... رح نحميه بدمنا ... طالما دمنا عم يخفق بالقلب ...
القلب ... اللي عايش من تراب الوطن الغالي ..
.
.
THE,unforgiven ... " :D

satoman

10/12/2008, 14:26

وتخلص الدني ومافي غيرك ياوطني 00000000

sandra

10/12/2008, 15:43

الوطن ..................

هو الدمعة بعينك اللي بتحبسها كل ما سمعت حماة الديار بعيد كنت او قريب.

:D

هاد هو وطني ...:D

مجنون يحكي وعاقل يسمع

10/12/2008, 19:52

الوطن الفضاء الذي يستقبل صرختنا الأولى عند خروجنا من رحم الأم الحنون إلى رحمه , وبالتالي فهو الرحم الذي يستقبلنا , هو الهواء الذي يحافظ على خفقان القلب ودورة الحياة , وصدر الأم الحنون الذي يسقيك نسغ الحياة , أنشودة الأم التي تهدهدنا حتى نغفو على صدرها , هو الأرض التي تمسحها بثيابك وجسدك البط عندما تحاول الأعتماد على نفسك محاولاً الاقتراب من الأشياء , فتزحف باتجاهها أشياؤك التي تحاول العبث البريء بها فتحطمها بكل براءة , هو ضحكة أبيك التي ليس لها حدود وهو يراقب تطوراتك وأنت طفل كل يوم وكل ساعة , وهو الفرح الذي تعطيه للآخرين , من دون وعي منك , وهو الضحكة المرسومة على شفاه الأطفال , هو نجمة الصبح, و فرحة طفل يداعبها , ولا يستطيع أن يقبض عليها بكفيه الحريريين , فيبتسم لإخفاقه بالتقاطها وتبقى لغزاً ويبقى على موعد مع محاولة الإمساك بها غداً , هو الموسيقا التي تعزفها أوركسترا الغيوم , فتتغلغل في أعماق الأرض , لتعيد دورة الحياة من جديد ’ إنه تراقص وريقات الشجر كحبات الذهب , في أيلول , ,انشودة النسيم يتلاعب بتلك الأوراق المذهبة
يتبع