سياسة التعتيم [الأرشيـــــف]

ooopss

10/07/2008, 18:30

سياسية التعتيم أو التكتم الإعلامي ..
عدم إيصال الأخبار الى وسائل الإعلام أو الى العامة ..
تنقسم الآراء حول تأييد هذه السياسة أو رفضها
فالبعض يؤيد أو يرفض
اقتناعا وتعقلا والبعض انقيادا و تعاطفا أولا مبالاة
والبعض يقف موقف البين بين ..
ماهو موقفك من هذه السياسة ؟
هل أنت مع هذه الطريقة في القيادة ؟ ولماذا ؟
هل أنت ضدها مهما كانت مبرراتها ولماذا ؟
حدد موقفك .
:D

VivaSyria

10/07/2008, 18:37

ooopss

10/07/2008, 18:47

yass

10/07/2008, 18:48

أحيانا الحكومات تقوم بالتعتيم على شغلات لأنو تعتبرها دون أهمية.. أو لأنو تعتبر انو الأفضل عدم نشرها مشان عدم اثارة البلبلة.. لكن ما بينتبهو انو يحققو النتيجة العكسية عدا عن انو تنضرب مصداقياتهون لأنو لما العالم يعرفو انو تم التكتم على شيء ما ما رح يصدقو وقت يحكو عن شي تاني

شكرا للموضوع...

و مداخلة تانية:

بس حابب قلك رأي بصراحه بموضوع الإستبيان انو فكرتو ضعيفة جداً... يعني كنت بتمنى انو يكون موضوع فقط بدون الاستبيان لأنو ما حدا رح يقلك انو أنا مع التعتيم و تخباية الحقيقة.. بصراحه كأنك عم تسألي انت مع المخدرات أما ضدها...

وشكراً

بدون ما أحوّل الموضوع الى نقاش تاني.. و بالتالي أخرب الموضوع... ما بعتقد ردك هاد موفق انو أول رد بالموضوع ما تجيب سيرة الموضوع و تقلها استبيانك ضعيف.. مانك مجبور تشارك بالاستبيان اذا ما بدك و بالتالي ما بعتقد ضروري كتير ينزل رد مخصوص لاعطاء هالنصيحة حول كيفية تنزيل استبيان من عدمو بشكل مالو داعي..

و شكرا

VivaSyria

10/07/2008, 18:50

فاجئتيني انك مع التعتيم ببعض الحالات... لأنو صدقيني متى ما شرعتي بعض الحالات معناه سمحتي للحكومات تعمم على كل الحالات يلي بدها ياها..

BL@CK

10/07/2008, 18:52

بس حابب قلك رأي بصراحه بموضوع الإستبيان انو فكرتو ضعيفة جداً... يعني كنت بتمنى انو يكون موضوع فقط بدون الاستبيان لأنو ما حدا رح يقلك انو أنا مع التعتيم و تخباية الحقيقة.. بصراحه كأنك عم تسألي انت مع المخدرات أما ضدها...

وشكراً

خيو دام الموضوع عاجبك فيك تعتبرو بلا إستبيان , و فيك تعطي رأيك أنو الإستبيان ضعيف أو قوي بغير مطارح مثلأ ً ماسنجر أو برايفت يعني مانو مطرح هالحكي هون الموضوع عن سياسة التعتيم .. للتنويه و التذكير فقط لا أكثر ..

ooopss

10/07/2008, 18:52

مالي خايف

10/07/2008, 18:53

أنا برأيي سياسة التعتيم هي ضعف من السلطات على مواجهة الحقائق وعدم دراية بكيفية التصرف بالمواقف الي بتواجهن وبظن هاد ان دل على شيء فبيدل انو هنن مو قد هالمسؤولية وما عندون خبرة أو حنكة بالتعاطي مع المواضيع يعني بتذكر لما اغتالو عماد مغنية من فترة بالشام وسائل الإعلام السورية والمسؤولين السوريين ولا واحد فيهون طلع وقال انو والله صار تفجير أو صار عملية بالمنطقة الفلانية هلأ بيجوز حدا يقلي انو بركي كان انفجار طبيعي حتى لو انفجار طبيعي يعني مو عملية اغتيال المفروض حدا يطلع ويحكي شو عم يصير يعني وقتها لتاني يوم بلشت تقرا بالشريط الأخباري الي تحت انو صار عملية اغتيال حتى مو بنشرة الأخبار

يمان Rooooonaldo

10/07/2008, 18:54

انو انا مع .. اي ببعض الاحيان .. لانو جد احيانا .. بكون في اخبار .. مالا طعمة انو تطلع .. وحتسببب .. فوضى وبلبلة وشوية مشاكل .. لزلك انو الافضل ببعض الحالات يكون التعتيم .. بس انو .. ازا انكشف شي ما يضلّو عم يكملو بكشتهم ..

:D

VivaSyria

10/07/2008, 18:55

أ
بدون ما أحوّل الموضوع الى نقاش تاني.. و بالتالي أخرب الموضوع... ما بعتقد ردك هاد موفق انو أول رد بالموضوع ما تجيب سيرة الموضوع و تقلها استبيانك ضعيف.. مانك مجبور تشارك بالاستبيان اذا ما بدك و بالتالي ما بعتقد ضروري كتير ينزل رد مخصوص لاعطاء هالنصيحة حول كيفية تنزيل استبيان من عدمو بشكل مالو داعي..

و شكرا

وأنا بدون ما حولو لنقاش تاني .. أنا حكيت عن الإستبيان مو عن الموضوع.. يعني الموضوع ممتاز للنقاش حول التعتيم الإعلامي و أسبابه و طرقه.. بس الإستبيان عن شو؟؟ يعني مين من الشعب بيحب انو يسمع شو عم يصير ببلدو من البي بي سي أو من محطات مو وطنية تسخر الخبر لخدمة مصالحها و كل حدا يصيغ الخبر متل ما بدو..
و أهلاً

barcawi

10/07/2008, 18:57

يعني في بعض الأحيان بيكون الامر جيد ولكن يبالغ كثير به ويستخدم في كل شئ وبطريقة سئ جدا

yass

10/07/2008, 18:57

ياس حكيك مزبوط مشان المصداقية
بس بنظرة واقعية شوي
بدون مانحكي موضوع معين بشكل عام
اذا كنت بموقع قيادة ما بتكون مضطر أحيانا تلجأ لهالشي
نظرا لأنو في فئات كتيرة ممكن تستغل أخبار معينة
وياريت ما يتم الخلط بين رأيي وحرية الاعلام

راح جيبلك مثال..

بوسط اسبانيا في مفاعل نووي لانتاج الطاقة الكهربائية صار فيه تسريب بسيط جدا ما تعدى ربع حدود نطاق الأمان تبع المفاعل (حوالي المفاعل في منطقة أمان واسعة مافيها سكان و ما يدخلها حدا الا بتصريح) فادارة المفاعل التابع لشركة كهربا خاصة قررو انو ما ضروري ينحكى كون التسريب ما وصل لشي و يمكن الحكي يعمل بلبلة بدون داعي... بعد اسبوع من التسريب دري صحفي عن طريق موظف بالشركة... قامت قيامة القرى اللي حوالي المفاعل و اضطرت الادارة تقدم استقالتها (رغم انو اثبتو انهون قانونيا ما كانو مجبرين يبلغو عن التسريب كون ما تعدى منطقة الأمان المملوكة من قبلهم) .. بس الضجة و البلبلة اللي عملوها و الرعب تبع الناس اللي ركبت سياراتها و هربت من هنيك خلى الحكومة تضغط عالشركة مشان تجبر الادارة على الاستقالة... الناس هون بيقولو انو و الله لو الشغلة بسيطة كان ما تسترو عليها و خبوّها.. كان حكو عنها و خلص...

ayhamm26

10/07/2008, 18:58

بس في كتير ناس مع هالسياسة
أنا مثلا مع هالسياسة "في بعض الأحيان "
تبعا لنوع الخببر ووضع البلد وبنظرة واعية شوي
في أخبار بتأدي للبلبلة وبلبلة على بلبلة بيخف تماسك البلد خاصة اذا كان وضعو مو متحمل

تحية:D

صدقيني البلبلة ما بتجي الا من ورا سياسة التعتيم , هلق ببعض الحالات متل مثلا حالة الحرب بصير تعتيم بس مؤقت هدفو حماية البلد وبعد ما تنتهي المشكلة بيطلع كل شي للعلن والشعب بيعرف التفاصيل

بس بالدول القمعية بتلاقي الناس مو عرفانة شي لا قبل ولا بعد الحدث, يعني عنا في حالات وقصص نهب و سرقة وقتل جماعي وخيانات صارت وعم تصير من 40 سنة ما حدا بيعرف عنها شي وكل واحد بيحكيلك قصة شي وهي هي البلبلة اللي جايبة اجل تماسك البلد

yass

10/07/2008, 18:59

وأنا بدون ما حولو لنقاش تاني .. أنا حكيت عن الإستبيان مو عن الموضوع.. يعني الموضوع ممتاز للنقاش حول التعتيم الإعلامي و أسبابه و طرقه.. بس الإستبيان عن شو؟؟ يعني مين من الشعب بيحب انو يسمع شو عم يصير ببلدو من البي بي سي أو من محطات مو وطنية تسخر الخبر لخدمة مصالحها و كل حدا يصيغ الخبر متل ما بدو..
و أهلاً

طيب ... هيي حبت تحط استبيان.. و نحنا حبينا نجاوب فيه.. ضروري كتير أول رد يتجاهل محتوى الموضوع و يروح لنقد وجود الاستبيان من عدمه؟ ما ضروري كتير...

نقطة انتهى

sona78

10/07/2008, 19:00

بصراحه كأنك عم تسألي انت مع المخدرات أما ضدها...

حبيت بس علق ع جملة فيفا، في حادثة عن المخدرات ما بتذكر تماما تفاصيلها بس رح احكيها :أيام حصار بيروت عناصر الجبهة الشعبية لتحرير فلسطين بدون يدخلو سلاح .. بالرغم من الحصار قدرو يهربو ..كيف؟؟ صاروا يقاضو الجنود الاسرائيلية انو هني بيعطون مخدرات مقابل انو يدخلو السلاح .. وفعلا هيك صار

بهيك حالة انت مع المخدرات ولا لأ؟؟؟؟؟؟؟؟؟ انا ما عرفت جاوب ع السؤال!!!

بالنسبة للاستبيان ...كان ممكن ينحط خيار ( لا أدري!!! ):D

ooopss

10/07/2008, 19:02

فاجئتيني انك مع التعتيم ببعض الحالات... لأنو صدقيني متى ما شرعتي بعض الحالات معناه سمحتي للحكومات تعمم على كل الحالات يلي بدها ياها..
لا تتفاجئ .
ومو معناة حكيي اذا شرعت لبعض الحالات الخاصة اني برضى يكون هالشي عام
أو برضى أني اسمع خبر انطبلت فيه كل المحطات الفضائية الا الفضائية تبعنا هاد ما بيكون بس تعتيم بيكون استغباء لألنا كمان
يعني مثلا هالشي بيرجع حسب وضع البلد كمان وطبيعة الخبر
مثلا بلد متل أمريكا بعتقد شو ماطلع خبر شو ما كان نوعه وانتشر بكل الدنيي مارح يأثر عليها سياسيا أو داخليا او عسكريا
بس اذا بلد حدا مستني على نكشة لتصير تدخلات خارجية أو حرب أهلية أو أي شي
فبظن ما بيكون في غير هالحل

بظن وضحت اسبابي
:D

VivaSyria

10/07/2008, 19:04

راح جيبلك مثال..

بوسط اسبانيا في مفاعل نووي لانتاج الطاقة الكهربائية صار فيه تسريب بسيط جدا ما تعدى ربع حدود نطاق الأمان تبع المفاعل (حوالي المفاعل في منطقة أمان واسعة مافيها سكان و ما يدخلها حدا الا بتصريح) فادارة المفاعل التابع لشركة كهربا خاصة قررو انو ما ضروري ينحكى كون التسريب ما وصل لشي و يمكن الحكي يعمل بلبلة بدون داعي... بعد اسبوع من التسريب دري صحفي عن طريق موظف بالشركة... قامت قيامة القرى اللي حوالي المفاعل و اضطرت الادارة تقدم استقالتها (رغم انو اثبتو انهون قانونيا ما كانو مجبرين يبلغو عن التسريب كون ما تعدى منطقة الأمان المملوكة من قبلهم) .. بس الضجة و البلبلة اللي عملوها و الرعب تبع الناس اللي ركبت سياراتها و هربت من هنيك خلى الحكومة تضغط عالشركة مشان تجبر الادارة على الاستقالة... الناس هون بيقولو انو و الله لو الشغلة بسيطة كان ما تسترو عليها و خبوّها.. كان حكو عنها و خلص...

طيب بدي إسألك سؤال:
لو بدل هالتعتيم يلي صار جابو سكان المنطقه و عملولهن اجتماع و عرفوهن بالمشكلة يلي صايرة و بأبعادها و خلو وسائل الإعلام توضح الموضوع من الألف الى الياء بكل شفافية .. ما كانو جنبو حالهن كل المشاكل و ردات الفعل من الناس؟؟ الناس دائماً بتخاف من المخبى أكتر من الظاهر

VivaSyria

10/07/2008, 19:10

بس اذا بلد حدا مستني على نكشة لتصير تدخلات خارجية أو حرب أهلية أو أي شي
فبظن ما بيكون في غير هالحل
:D

صدقيني هاد يلي عم تحكيه جزء من السياسة الإعلامية الفاشلة لحكومتنا.. دائماً بيحاولو يحسسونا انو نحنا ببلد على حافة الهاوية.. واقل قصة بدها تجي جيوش العالم تدخل بسوريا و اقل كلمة بينهز كيان الدولة... يعني بصراحه حكيهون صار رخيص و مو مقنع لطفل... اذا هيك عن جد بلدنا بهاهشاشه هي بيكون عيب علينا انو نعيش و انو نحمل هالجنسية.. بس هي الكذبة تبعيت مقومات الصمود و المواجهة و الممانعة قدمت كتير..

ooopss

10/07/2008, 19:16

... الناس هون بيقولو انو و الله لو الشغلة بسيطة كان ما تسترو عليها و خبوّها.. كان حكو عنها و خلص...
كلامك مزبوط ..
بس كل الفئات هيك رح يكون موقفها رح تقول لو الشغلة بسيطة ما كان تستروا عليها ؟
مو في فئات ممكن تستغل اخبار معينة ؟

مالي خايف

10/07/2008, 19:19

كلامك مزبوط ..
بس كل الفئات هيك رح يكون موقفها رح تقول لو الشغلة بسيطة ما كان تستروا عليها ؟
مو في فئات ممكن تستغل اخبار معينة ؟
أنا رأيي متل ما قال فيفا موضوع استغلال المواقف هاد الشي الدولة الي عملتو بإيديها وهي الي بتخلي الناس تستغل المواقف يعني بموضوع أحداث صيدنايا لو شي مسئول كسر على انفو بصلة وطلع وحكا لهالشعب شو صار بالحرف الواحد ما كان خلا حدا يألف حكي من عندو ويقولوا انو القصة فيها تدنيس قرآن ويعملوها قصة بقصد تحريك النزعة الطائفية

ooopss

10/07/2008, 19:21

صدقيني هاد يلي عم تحكيه جزء من السياسة الإعلامية الفاشلة لحكومتنا.. دائماً بيحاولو يحسسونا انو نحنا ببلد على حافة الهاوية.. واقل قصة بدها تجي جيوش العالم تدخل بسوريا و اقل كلمة بينهز كيان الدولة... يعني بصراحه حكيهون صار رخيص و مو مقنع لطفل... اذا هيك عن جد بلدنا بهاهشاشه هي بيكون عيب علينا انو نعيش و انو نحمل هالجنسية.. بس هي الكذبة تبعيت مقومات الصمود و المواجهة و الممانعة قدمت كتير..
أنا ماعم احكي تأثرا بسياسات اعلامية معينة ماشي
مو اعلامنا بالذات يلي بحسسنا هيك
كلنا بنعرف من أي إعلام انو نحنا مرينا بوضع حرج ولهلأ التساؤلات بتنطرح اذا رح يصير حرب أو لا

بس الجزء الاخير يلي بالأحمر مافهمتو ياريت توضح

yass

10/07/2008, 19:23

كلامك مزبوط ..
بس كل الفئات هيك رح يكون موقفها رح تقول لو الشغلة بسيطة ما كان تستروا عليها ؟
مو في فئات ممكن تستغل اخبار معينة ؟

أي هون ممكن نحكي ببراغماتية و ممكن نحكي كقضية مبدء...

ازا بدنا نحكي ببراغماتية ممكن نحكي عن حالات بعض ناس بتقلك "أحسنلك و أريحلك ما تعرف" أو حتى في ناس ما بدها تعرف...

لكن كمبدء.. كمنطق.. و خصوصي اذا أمر يمسني كمواطن من حقي أعرف شو بيصير و لازم اعرفو مهما كان الأمر ليكون و مهما كانت النتائج.. يعني انو حكومتي تخبي عني شي ما لأنو و الله في حدا راح يستغلو..

في شي تاني مختلف تماما وهو السرية القضائية .. في قضايا بفترة التحقيق لازم ما حدا يدرى فيها و لا يدرى بنتائج التحقيق كون نشر نتائج التحقيق ممكن يأثر سلبا على القضية (مثلا الحالات اللي لسى ما انمسك كل المتورطين و ممكن نشرها يؤدي الى فرارهم) لكن السرية هاي مؤقتة و اجباري الاعلان بعد انقضاء المدة.. و حتى المدعي العام يقبل سرية التحقيق لازم الجهة المحققة تقدم ايضاحات و تبريرات لطلبها..

و بعدين بعض ما يخص عمل قوى الأمن (قوى الأمن الحقيقية مو عصابات البلطجة تبعات الموزمبيق) و كمان هالأمور منظمة بقانون و يعلم عنها من يجب أن يعلم.. و السرية تخص بعض الأمور فقط مثل بعض الهويات و بعض التمركزات أو الوحدات المموهة.. الخ.

و بالنهاية ما بيخطر ع بالي سبب وجيه لحتى حكومة بلدي تخبي عني شي... خارج الأمور الموضحة فوق و المنظمة بالقانون و الدستور... اللي شغلو دغري ما يحتاج يخبي شي.. هيك رأيي

VivaSyria

10/07/2008, 19:31

أنا ماعم احكي تأثرا بسياسات اعلامية معينة ماشي
مو اعلامنا بالذات يلي بحسسنا هيك
كلنا بنعرف من أي إعلام انو نحنا مرينا بوضع حرج ولهلأ التساؤلات بتنطرح اذا رح يصير حرب أو لا

بس الجزء الاخير يلي بالأحمر مافهمتو ياريت توضح

لهلأ بعدها التساؤلات؟؟ بعد 40 سنة و ما وصل الجواب؟ أنا رح جاوبك الحرب ممكن تصير بحالة وحده هي انو يحسو الشباب انو في شي رح يأثر على الحكم أو يبعدهون عن السلطه و قتها بيعملو حرب مشن يخلطو الوراق..

أما مشان الحكي يلي بالأحمر فمعناه انو اذا عن جد الشعب مقتنع بهالكذبة تبع أجهزة إعلام السلطة انو نحنا بوضع خطر و ممكن تصير حرب أهلية بأي لحظه و لأتفه سبب أو انو ممكن تدخل الجيوش بسوريا بأي لحظه اذا صار أي تغيير بلبلد و كأنو دول العالم ما عندهون هم الا سوريا... و انو استمرار الحكم هو استمرار لنهج الممانعة و التصدي و المقاومة و كأن هاد النظام هو النخبة الشريفة الوحيدة من الشعب السوري... هاد الحكي الإعلامي الموجه صار كتير قديم و مكشوف لدرجة كبيرة..
و بالعوده لموضوع التعتيم الإعلامي السبب الرئيسي هو انو النظام قائم بدون رغبة الشعب و ضد مصالحو مشان هيك مجبور يخبي كل شي و ما يحكي الحقيقة عن أي شي مشان يبقى معيش الشعب بدوامة و مشان يبقى منعزل عن الشعب لأنو أي مصارحة بينو و بين الشعب رح تكون نتائجها كارثية بالنسبة للنظام و تسبب بسقوطه.

ooopss

10/07/2008, 19:34

ياس انا ما قصدي من مبدأ أحسن مانعرف أو من باب اللامبالاة أبدا ماهيك
كل قصدي أنو لو خيروني بين أني أعرف وبين أنو يصير بلبلة ممكن تسيء لوضع بلدي
بختار أني ما أعرف طبعا مع غصة بقلبي لكتير أسباب
يمكن هالتجربة متل تجربة الديمقراطية ما بتزبط دغري على قياسنا
لأن يمكن مافي ضمانات اذا نقال شي خبر معين ماتصير انقلابات أو تدخلات

ooopss

10/07/2008, 19:43

أما مشان الحكي يلي بالأحمر فمعناه انو اذا عن جد الشعب مقتنع بهالكذبة تبع أجهزة إعلام السلطة انو نحنا بوضع خطر و ممكن تصير حرب أهلية بأي لحظه و لأتفه سبب أو انو ممكن تدخل الجيوش بسوريا بأي لحظه اذا صار أي تغيير بلبلد و كأنو دول العالم ما عندهون هم الا سوريا... و انو استمرار الحكم هو استمرار لنهج الممانعة و التصدي و المقاومة و كأن هاد النظام هو النخبة الشريفة الوحيدة من الشعب السوري... هاد الحكي الإعلامي الموجه صار كتير قديم و مكشوف لدرجة كبيرة..
و بالعوده لموضوع التعتيم الإعلامي السبب الرئيسي هو انو النظام قائم بدون رغبة الشعب و ضد مصالحو مشان هيك مجبور يخبي كل شي و ما يحكي الحقيقة عن أي شي مشان يبقى معيش الشعب بدوامة و مشان يبقى منعزل عن الشعب لأنو أي مصارحة بينو و بين الشعب رح تكون نتائجها كارثية بالنسبة للنظام و تسبب بسقوطه.
عم تقولني حكي ما قلتو ومالي بالسذاجة لأقصدوا
هلأ أول شي أنا ما قلت رح تصير حرب أهلية لأتفه سبب
ومابظن أني قلت أنو هي النخبة الشريفة الوحيدة ... وماعم احكي دفاعا عن نخبة معينة أو ضد نخبة معينة
وحتى ما قلت أني مع التعتيم بشكل عام عم احكي عن حالات خاصة جدا تبعا لظروفنا

VivaSyria

10/07/2008, 19:47

عم تقولني حكي ما قلتو ومالي بالسذاجة لأقصدوا
هلأ أول شي أنا ما قلت رح تصير حرب أهلية لأتفه سبب
ومابظن أني قلت أنو هي النخبة الشريفة الوحيدة ... وماعم احكي دفاعا عن نخبة معينة أو ضد نخبة معينة
وحتى ما قلت أني مع التعتيم بشكل عام عم احكي عن حالات خاصة جدا تبعا لظروفنا

الغريب اني ما قولتك لإلك و لا كلمه.. أنا عم إحكي بشكل عام و عن سياسة الحكومه و عن الغلط يلي عم يوقع فيه شعبنا..

ooopss

10/07/2008, 20:13

الغريب اني ما قولتك لإلك و لا كلمه.. أنا عم إحكي بشكل عام و عن سياسة الحكومه و عن الغلط يلي عم يوقع فيه شعبنا..
طيب سوء تفاهم ومشي الحال
بنتابع بالموضوع:D

ooopss

10/07/2008, 20:32

.. اللي شغلو دغري ما يحتاج يخبي شي.. هيك رأيي
جملة استوقفتني و حكيك تمام :D
رح قلك شي أنا ما عم خص فيه سوريا تحديدا حتى مايكون حكيي مع او ضد حدا معين
بشكل عام .. بين دول عربية وظروفها هيك
ممكن الواحد يعتمد انو اذا انا شغلي دغري مالي محتاج خبي شي ورح تكون أوضاعي _ أوضاع البلد بقصد-تمام التمام ؟

yass

10/07/2008, 21:13

مكن الواحد يعتمد انو اذا انا شغلي دغري مالي محتاج خبي شي ورح تكون أوضاعي _ أوضاع البلد بقصد-تمام التمام ؟

يمكن ما فهمت قصدك تماما... اللي فهمتو هو انو عم تقصدي انو اذا أنا بشتغل صح= وضع البلد منيح.. أو بطريقة أخرى: أحيانا أنجبر اشتغل غلط مشان وضع البلد يكون صح.. يعني بشكل أو بآخر بنناقش اذا الغاية تبرر الوسيلة..

بعتقد انو أي بلد بالعالم عرضة لظروف و متغيرات و عوامل تساهم بتوجيه مسيرها.. ان كان اقتصاديا أو اجتماعيا أو سياسيا... و يجوز هالظروف أقوى من الحكومات.. بيصير.. و خصوصي بالمنظومة العالمية الحالية..

لحتى نقدر نناقش سؤالك (أو اللي فهمتو انا انو سؤالك) لازم يمكن يكون عنا وضوح حول تعريف نظام الحكم و دوره.. و ماننا بصدد هالشي.. اللي أنا بشوفو انو الحاكم مؤتمن على انو يشتغل دغري و يكون صادق مع نفسو و مع الشعب اللي عطاه هالأمانة... انو الشغل الدغري يتعارض مع المتغيرات هذا أمر ما يقدر الواحد يتحكم فيه أبدا.. ممكن كذلك يصير مصالحة ما بين الأمرين.. لكن ضمن حد معين و محدد جدا و هو حقوق و حريات الشعب.. هاد خط أحمر

طبعا هاد رأي

The morning

10/07/2008, 21:14

اعتقد انو دائما بترجع لطبيعه الخبر , مصداقيه الدوله , طبيعه المتلقي .
بمعنى تاني انا مع التعتيم طالما لا يرتبط باستغباء و استغلال المتلقي .. يعني بتختلف القصّه وقت الحكومه بتقرر انو الشعب ما لازم يعرف عن حدوث حدث ما بالبلد لانو هالشي ممكن يأثر سلبا عليها , عالدوله بقصد, لكن وقت بيكون الحدث رح بيأثر عالشعب و ينشر حاله من الفوضى و الخوف فالافضل التعتيم عليه لحتّى تتم السيطره و عدم اثاره الزعر بين الناس .. المتلقي عنّا بيفوت بحاله دراميّه سريعه يعني لو بتخبر حدن انو معه مرض خطير مثلا فهو بيتعامل مع الامر كأنو رح بموت بكرى و ما عاد بشوف اي شي تاني قدامو هلئ لو وسعنا هالنطاق هاد على شعب كامل فرح بصير في حاله مش طبيعيه بالبلد قد تؤدي الى اضعاف الموقف و يخلي الدوله يصير عندها مشكله داخليه و اخرى خارجيه - او مشكلتها الاصليه- لتقلق بشأنهم.
لذلك بترجع دائما للموقف و قابليه تلقيه , في بعض المواقف بتحتاج لتهيئ الشعب نفسيا لتلقيها اولا ..

yass

10/07/2008, 21:18

يعني بتختلف القصّه وقت الحكومه بتقرر انو الشعب ما لازم يعرف عن حدوث حدث ما بالبلد لانو هالشي ممكن يأثر سلبا عليها

عندي فضول اعرف ايمتى (خارج الحدود القانونية المنظمة للسرية) معرفتي لأمر حدث في بلدي يمكن أن يؤثر سلبا على البلد...

The morning

10/07/2008, 21:22

عندي فضول اعرف ايمتى (خارج الحدود القانونية المنظمة للسرية) معرفتي لأمر حدث في بلدي يمكن أن يؤثر سلبا على البلد...
مش عالبلد , وضحت بعدها انو يؤثر سلبا على الحكومه ضد المواطن

بمعنى تاني انا مع التعتيم طالمالا يرتبط باستغباء و استغلال المتلقي .. يعني بتختلف القصّه وقت الحكومه بتقرر انو الشعب ما لازم يعرف عن حدوث حدث ما بالبلد لانو هالشي ممكن يأثر سلبا عليها , عالدوله بقصد .

yass

10/07/2008, 21:25

ها أوكي.. حقك علينا :lol:

ooopss

10/07/2008, 23:05

اي تمام متل ما فهمت عليي - وتمام متل ما قلت أنو ضمن حدود

rawazhera

11/07/2008, 00:44

أنا رأيي متل ما قال فيفا موضوع استغلال المواقف هاد الشي الدولة الي عملتو بإيديها وهي الي بتخلي الناس تستغل المواقف يعني بموضوع أحداث صيدنايا لو شي مسئول كسر على انفو بصلة وطلع وحكا لهالشعب شو صار بالحرف الواحد ما كان خلا حدا يألف حكي من عندو ويقولوا انو القصة فيها تدنيس قرآن ويعملوها قصة بقصد تحريك النزعة الطائفية
يعني بفهم منك أنو اذا طلع مسؤول وكسر على انفو بصلة وحكى أنك رح تصدقو .
واحترنا ياقرعا منين بدنا نمشطك

طفوله

11/07/2008, 01:48

نئطــه ..اذا الخطاب فــيو تئــســيم .. احلالي التعتيــم ..

نئطــه تــانيــه .. بــعض الامــور يفضــل ويفــضل جــدا التعتيـم عليــها ..

/وئــت بيكــون الشــعب ما رح يئــدم او يأخــر .. وئــت بيــكون نســبة التفــهم والوعــي غيــر كافيــه ../

الجــهه المقــابله

شــو هيه يــاحلــوه !..نحنــا الشــعب هــوه الاول والاخــير .. وعنــدو ثــقه كبيــره بالخطــاب والخــبر .. بحيث بيعــرف انــو الثقه اساس .. وانــو بس راحــت مـاعــاد تــرجــع .. وآخد حــقو الكــافي وعايش المستوى الحدي للحيــاه واكتــر .. وكــل شي لمصلحــتو .. لذلك عــاطـي اهميــه هـائله للخبــر .. كيــف ما اجــى

(خــام .. نصـف مصــنع .. صنــاعه تــامــه )

عـــبــايــه

.